အမေရိကန်နိုင်ငံမှပြောင်းတန်ချိန် ၁ သန်းတင်သွင်းရန်ပြင်ဆင်နေသည့် စီမံကိန်းသည် ပြည်တွင်းရှိ ပြောင်းစိုက်တောင်သူများနှင့်ပြောင်းဈေးနှုန်း အပေါ် သက်ရောက်မှုရှိမည်မဟုတ်ဘဲ၊ လက်ရှိကုန်ကြမ်း ပြတ်လပ်မှုနှင့် စရိတ်ကြီးမားမှုဒဏ်ကြုံတွေ့နေရသည့် ပြည်တွင်းတိရစ္ဆာန်အစာထုတ်လုပ်မှုနှင့် မွေးမြူရေးကဏ္ဍအတွက်သာ အထောက်အကူပြုစေမည်ဖြစ်ကြောင်း အစာစပ်လုပ်ငန်းနှင့် မွေးမြူရေးအသင်းအဖွဲ့များက ထုတ်ဖော်ပြောကြားလိုက်သည်။

ထိုင်းတိရစ္ဆာန်အစာစပ်လုပ်ငန်းရှင်များအသင်း(Thai Feed Mill Association)၏ဥက္ကဋ္ဌနှင့် မွေးမြူရေးနှင့်ရေလုပ်ငန်းအဖွဲ့ချုပ်၏ အတွင်း ရေးမှူးချုပ်ဖြစ်သူ Mr. Pornsil Patcharintanakul က ထိုင်းနိုင်ငံ၏ မွေးမြူရေးကဏ္ဍသည် ပြည်ပမှ တိရစ္ဆာန်အစာကုန်ကြမ်းတင်သွင်းမှုအပေါ် များစွာမှီခိုနေရကြောင်း ရှင်းလင်းခဲ့သည်။

တိရစ္ဆာန်အစာပြောင်းလိုအပ်ချက်နှင့် ပြတ်လပ်မှုပမာဏ

လက်ရှိတွင် ထိုင်းနိုင်ငံ၌ တစ်နှစ်လျှင် တိရစ္ဆာန်အစာအတွက် ပြောင်းတန်ချိန် ၉ သန်းခန့်လိုအပ်သော်လည်း ပြည်တွင်း၌ တန်ချိန် ၅ သန်းသာထုတ်လုပ်နိုင်သဖြင့် တန်ချိန် ၄ သန်းခန့်လိုငွေပြနေသည်။

• ပုံမှန်ပြည်ပတင်သွင်းမှု: အိမ်နီးချင်းနိုင်ငံများမှ ပြောင်းတန်ချိန် ၁.၅ သန်းနှင့် ပြည်ပမှ ဂျုံ(Wheat) တန်ချိန် ၁.၇ သန်း (စုစုပေါင်း ၃.၂ သန်း)တင်သွင်းသော်လည်း၊ တစ်နိုင်ငံလုံးအတိုင်းအတာဖြင့် တန်ချိန် ၈၀၀,၀၀၀ ခန့်လိုအပ်ချက်ရှိနေဆဲဖြစ်သည်။
• မြန်မာ့ပြောင်းသွင်းကုန်လျော့ကျနိုင်ခြေ: နယ်စပ်ဖြတ်ကျော်လေထုညစ်ညမ်းမှု(PM2.5)ကို ထိန်းချုပ်ရန်အတွက် ထိုင်းအစိုးရက တင်သွင်းမည့် ပြောင်းနှင့်ဂျုံများတွင်"မီးရှို့စိုက်ပျိုး ခြင်းမရှိကြောင်း သက်သေခံလက်မှတ်(Burn-free Certification)"ပါရှိရမည်ဟု တင်းကျပ်လိုက်သဖြင့်၊ ယခုနှစ်တွင် မြန်မာနိုင်ငံမှ ပြောင်းတင်သွင်းမှုမှာ တန်ချိန် ၁.၁ သန်းအထိ လျော့ကျသွားနိုင်ကြောင်း သိရသည်။

"၃:၁ မူဝါဒ" အကာအကွယ်ကြောင့် ပြည်တွင်းတောင်သူများ မထိခိုက်နိုင်

အမေရိကန်မှ ပြောင်းတန်ချိန် ၁ သန်းတင်သွင်းမည့်အစီအစဉ်သည် ပြည်တွင်းပြောင်းများကို အစားထိုးမည်မဟုတ်ဘဲ၊ လက်ရှိတင်သွင်းနေသည့် ဂျုံတန်ချိန် ၁.၇ သန်း၏အစိတ်အပိုင်းအချို့ကိုသာ အစားထိုးသွားမည်ဖြစ်သည်။

ထို့အပြင် အစိုးရ၏ ၃:၁ အချိုးကျ စည်းမျဉ်း(ပြည်ပမှ ပြောင်း သို့မဟုတ် ဂျုံ ၁ ဆတင်သွင်းလိုလျှင် ပြည်တွင်းဖြစ်ပြောင်း ၃ ဆကို မလွဲမသွေဝယ်ယူရမည်ဟူသောကန့်သတ်ချက်)ရှိနေခြင်းကြောင့် ပြည်တွင်းပြောင်းဈေးကွက်ကို ထိခိုက်စရာမရှိကြောင်း Mr. Pornsil က ထောက်ပြခဲ့သည်။ ဤတင်သွင်းမှုသည် လက်ရှိအမေရိကန်နှင့် ထိုင်းအကြား ဆွေးနွေးနေဆဲဖြစ်သော ကုန်သွယ်ရေးအခွန်အတားအဆီး(US Trade Tariffs)သက်ရောက်မှုများကို လျှော့ချရန်အတွက်လည်းရည်ရွယ်သည်။

ကုန်ကြမ်းဈေးတက်မှုကြောင့် ကြက်မွေးမြူရေးကဏ္ဍအရှုံးပေါ်နေ

လက်ရှိတွင် ထိုင်းပြည်တွင်း၌ တိရစ္ဆာန်အစာပြောင်းဈေးနှုန်းမှာ အစိုးရ ၏သွင်းကုန်ထိန်းချုပ်မှု တင်းကျပ်ခြင်း၊ ရာသီဥတုမိုးခေါင်ပြီး စိုက်ပျိုးချိန်နောက်ကျခြင်းတို့ကြောင့် တစ်ကီလိုဂရမ်လျှင် ၁၃ ဘတ်ကျော်အထိ မြင့်တက်နေသည်။

ထိုင်းကြက်ကင်စိုက်ပျိုးထုတ်လုပ်သူများအသင်း(Thai Broiler Association)၏ဥက္ကဋ္ဌ Mr. Somboon Watcharapongphan က ပြောင်းဈေးနှုန်းမြင့်တက်မှုကြောင့် အစာကျွေးစရိတ်ဝန်ထုပ်ဝန်ပိုးကြီးမားလာပြီး မွေးမြူရေးတောင်သူများ ထိခိုက်နေရကြောင်းဆိုသည်။ "လက်ရှိမှာ ကြက်မွေးမြူရေးတောင်သူတွေအရှုံးပေါ်နေပြီး အချို့က ထုတ်လုပ်မှုပမာဏကို လျှော့ချနေကြပါပြီ။ ဒါက ရေရှည်မှာ ကြက်သားပြည်ပတင်ပို့မှုကို ထိခိုက်စေမှာဖြစ်သလို၊ နောက်ဆုံးမှာ စားသုံးသူတွေအပေါ်ပါ သက်ရောက်မှုရှိလာမှာပါ"ဟု ၎င်းက သတိပေးထားသည်။ ထို့ကြောင့် အသင်းအဖွဲ့များက အစိုးရအနေဖြင့် ကဏ္ဍစုံအတွက် မျှတမည့် သွင်းကုန်မူဝါဒများကို ပြန်လည်သုံးသပ်ပေးရန် တောင်းဆိုထားကြသည်။

 ကိုးကား။  Bangkok Post

(ရည်မွန်လှိုင်၊ စီးပွားရေးသံမှူး၊ ဗန်ကောက်မြို့)