နိုင်ငံတကာသို့ ငွေလွှဲပြောင်းပေးပို့နိုင်ရေးနှင့် အခြားသောငွေလွှဲမှုများ ဆောင်ရွက်နိုင်ရေးအတွက် ဂျပန်ဘဏ္ဍာရေးဝန်ကြီးဌာနအောက်ရှိ ဘဏ္ဍာရေးဝန်ဆောင်မှုအေဂျင်စီအနေဖြင့် ယန်းငွေအခြေပြု Stablecoin အား ပထမဆုံးအကြိမ်အဖြစ် နိုဝင်ဘာလမှစတင်၍ ထုတ်ဝေသုံးစွဲခွင့်ပြုပေးသွားမည်ဖြစ်ကြောင်း ၁၈-၈-၂၀၂၅ ရက်နေ့ထုတ် The Nikkei Asia သတင်းစာတွင် “Japan to greenlight first yen-based stablecoin” ခေါင်းစဉ်ဖြင့် ဖော်ပြခဲ့ပါသည်။
အဆိုပါသတင်းတွင် တိုကျိုအခြေစိုက်ဘဏ္ဍာရေးကုမ္ပဏီ JPYC အနေ ဖြင့် ငွေလွှဲဝန်ဆောင်မှုလုပ်ငန်းလုပ်ကိုင်နိုင်ရေးအတွက် ဂျပန်ဘဏ္ဍာ ရေးဝန်ဆောင်မှုအေဂျင်စီထံ နိုဝင်ဘာလအတွင်း မှတ်ပုံတင်သွားမည်ဖြစ်ကြောင်း၊ ကမ္ဘာ့ဘဏ္ဍာရေးဈေးကွက်တွင် ဒေါ်လာအခြေပြု Stablecoin သုံးစွဲမှုမှာ အမေရိကန်ဒေါ်လာ ၂၅၀ ဘီလီယံအထိရှိခဲ့ကြောင်း၊ Stablecoin များသည် Blockchain နည်းပညာကို အခြေခံထားပြီး၊ Coin တစ်ခုစီ၏တန်ဖိုးကို ဒေါ်လာကဲ့သို့သောငွေကြေးတန်ဖိုးများသတ်မှတ်ထားကြောင်း၊ ၂၀၂၃ ခုနှစ်၊ ဇွန်လတွင် ဂျပန်နိုင်ငံ၌ ဥပဒေပြင်ဆင်ကာ Stablecoin များကို ငွေကြေးအမျိုးအစားအပေါ်မူတည်သည့်ပိုင်ဆိုင်မှုများ(Currency-denominated Assets)အဖြစ် သတ်မှတ်ခဲ့ပြီး ဘဏ်များ၊ အာမခံကုမ္ပဏီများနှင့် ဘဏ္ဍာရေးဝန်ဆောင်မှုလုပ်ငန်းများအား လုပ်ငန်းဆောင်ရွက်ခွင့်ပြုခဲ့ကြောင်း ဖော်ပြထားပါသည်။
ယန်းငွေအခြေပြု Stablecoin ကို JPYC ဟုအမည်ပေးသွားမည်ဖြစ်ပြီး၊ Stablecoin ၁ ခုလျှင် ယန်းငွေတန်ဖိုးပုံသေသတ်မှတ်ပေးသွားမည်ဖြစ်ပြီး၊အဆိုပါငွေကြေးများကို လိုင်စင်ရဘဏ္ဍာရေးကုမ္ပဏီအနေဖြင့် အပ်နှံငွေနှင့် အစိုးရငွေချေးစာချုပ်များကဲ့သို့ ထိန်းသိမ်းပေးထားမည်ဖြစ် ကြောင်း၊ ဘဏ္ဍာရေးကုမ္ပဏီ JPYC အနေဖြင့် ဂျပန်ဘဏ္ဍာရေးဝန်ဆောင်မှုအေဂျင်စီထံ ငွေလွှဲဝန်ဆောင်မှုလုပ်ငန်းများဆောင်ရွက်ရန် မှတ်ပုံတင်ပြီးပါက Stablecoin များကို စတင်ရောင်းချပေးသွားမည်ဖြစ် ကြောင်း ဖော်ပြထားပါသည်။
JPYC Stablecoin အသစ်ကို အသုံးပြုလိုသူများအနေဖြင့် Stablecoin ဝယ်ယူခွင့် လျှောက်ထားရမည်ဖြစ်ပြီး၊ ဝယ်ယူခွင့်ရရှိပါက ဝယ်ယူလိုသည့် Stablecoin နှင့်ညီမျှသည့် ယန်းငွေကို ငွေလွှဲပြောင်းပေးပို့ရမည်ဖြစ်ကြောင်းနှင့် ငွေလွှဲပြောင်းပေးပို့ပြီးပါက Electronic Wallets ထဲသို့ Stablecoin များ လွှဲပြောင်းပေးသွားမည်ဖြစ်ကြောင်း၊ ထို့နောက် Stablecoin များအသုံးပြု၍ ပြည်ပနိုင်ငံများတွင် ပညာသင်ကြားနေသော ကျောင်းသားများထံ ငွေလွှဲခြင်း၊ လုပ်ငန်းအတွက် ငွေပေးချေမှုများဆောင်ရွက်ခြင်းနှင့် Blockchain အခြေပြုငွေကြေးဝန်ဆောင်မှုလုပ်ငန်းများ ဆောင်ရွက်နိုင်မည်ဖြစ်ကြောင်း ဖော်ပြထားပါသည်။
JPYC ကုမ္ပဏီအနေဖြင့် ၃ နှစ်အတွင်း ယန်း ၁ ထရီလီယံယန်း(အမေရိကန်ဒေါ်လာ ၆.၈၁ ဘီလီယံ)နှင့်ညီမျှသော JPYC Stablecoin များထုတ်ရောင်းနိုင်ရေး ရည်မှန်းဆောင်ရွက်လျက်ရှိကြောင်း၊ လက်ရှိတွင် ခရစ်တိုငွေကြေးတွင် ရင်းနှီးမြှုပ်နှံထားသည့် ဘဏ္ဍာရေးလုပ်ငန်းအများအပြားအနေဖြင့် JPYC Stablecoin များကို စိတ်ဝင်စားလျက်ရှိကြပြီး၊ အထူးသဖြင့် ကုန်သွယ်မှုတွင် အသုံးပြုလိုကြပြီး၊ ငွေလဲလှယ်နှုန်းအပြောင်းအလဲမှတစ်ဆင့် အမြတ်ရရှိလိုကြကြောင်း ဖော်ပြထားပါ သည်။
လက်ရှိတွင် ကမ္ဘာတစ်ဝန်း၌ အမေရိကန်ကုမ္ပဏီများဖြစ်သော Tether မှထုတ်လုပ်သည့် USDT နှင့် Circle Internet Financial Ltd. မှ ထုတ်လုပ်သည့် USDC ကဲ့သို့သော ဒေါ်လာအခြေပြု Stablecoin များကိုသာ အသုံးပြုလျက်ရှိကြကြောင်း၊ အမေရိကန်ဘဏ္ဍာရေးကုမ္ပဏီ Citigroup အနေဖြင့် Stablecoin များ၏ဈေးကွက်မှာ ၂၀၃၀ ပြည့်နှစ်တွင် ၁၀ ဆကျော်တိုးတက်လာနိုင်ပြီး၊ အမေရိကန်ဒေါ်လာ ၃.၇ ထရီလီယံအထိ ရှိနိုင်သည်ဟု ခန့်မှန်းထားကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)