တရုတ်အမျိုးသားစာရင်းအင်းဗျူရိုမှ ထုတ်ပြန်ကြေညာခဲ့သည့် အချက်အလက်များအရ တရုတ်နိုင်ငံ၏ စီးပွားရေးဆိုင်ရာ အညွှန်းကိန်းများ မျှော်မှန်းသည်ထက် ပိုမိုကောင်းမွန်လာခဲ့ကြောင်း၊ ၂၀၂၀ ပြည့်နှစ်၊ တတိယ လေးလပတ်ကာလအတွင်း ပြည်တွင်းအသားတင်ထုတ်လုပ်မှုတန်ဖိုးသည် တိုးတက်မည့်လက္ခဏာရပ်များ ဖြစ်ပေါ်လျက်ရှိပြီး တစ်နှစ်ပတ်လုံးအနေဖြင့် စီးပွားရေးဖွံ့ဖြိုးတိုးတက်မှုသည် (၂) ရာခိုင်နှုန်း ထက် ကျော်လွန်နိုင်ဖွယ် ရှိသည်ဟု ခန့်မှန်းထားကြောင်း၊ ယခုကဲ့သို့ ဖွံ့ဖြိုးတိုးတက်သည့် အရှိန်အဟုန်သည် ၂၀၂၀ ပြည့်နှစ်၊ စက်တင်ဘာလအတွင်း ဆက်လက်ကောင်း မွန်မည်ဆိုပါက တရုတ်နိုင်ငံ၏ တတိယလေးလပတ်၏ ပြည်တွင်းအသားတင် ထုတ်လုပ်မှုတန်ဖိုးသည် ဒုတိယလေးလပတ် ထက်ကျော်လွန်မည်ဖြစ်ကြောင်း စီးပွားရေးဆိုင်ရာ လေ့လာစောင့်ကြည့်သူများမှ ပြောကြားခဲ့ကြောင်း သိရှိရပါသည်။
၂၀၂၀ ပြည့်နှစ်၊ ဩဂုတ်လအတွင်း၌ တရုတ်နိုင်ငံ၏ အခြေခံနှင့် အလယ်အလတ် အဆင့်ကဏ္ဍများသည် နိုဗယ်ကိုရိုနာဗိုင်းရပ်စ် ကူးစက်ပျံ့နှံ့မှု မဖြစ်ပေါ်မီကာလများအတိုင်း ပြန်လည်နလန်ထူလာပြီဖြစ်ကြောင်း၊ သို့ရာတွင် တတိယအဆင့်ကဏ္ဍများမှာမူ နဂိုမူလအခြေအနေသို့ ပြန်လည် ရောက်ရှိခြင်းမရှိသေးကြောင်း၊ ယခုကဲ့သို့ စီးပွားရေး ပြန်လည်ဉီးမော့လာခြင်းသည် တရုတ်နိုင်ငံ၏ ပြည်တွင်းအသားတင်ထုတ် လုပ်မှုတန်ဖိုး (၂) ရာခိုင်နှုန်းကျော် တိုးတက်ရန် သေချာစေမည်ဖြစ်ပြီး စတုတ္ထလေးလပတ်အတွင်း၌ (၆) ရာခိုင်နှုန်းအထိ တိုးတက်နိုင်ဖွယ်ရှိသည်ဟု တရုတ်စီးပွားရေးပညာရှင်များမှ ပြောကြားခဲ့ကြောင်း သိရှိရပါသည်။
စက်မှုလုပ်ငန်းများ ပြန်လည်နလန်ထူလာခြင်းသည် တရုတ်နိုင်ငံ၏ ထုတ်လုပ်ရေးလုပ်ငန်းများ၊ စက်မှုလုပ်ငန်းချိတ်ဆက်ဆောင်ရွက်မှုများ၌ တည်ငြိမ်မှုရရှိခြင်းကြောင့်ဖြစ်ကြောင်း၊ သို့ရာတွင် ပြည်တွင်းစားသုံးမှုသည် ထုတ်လုပ်မှုနှင့် နှိုင်းယှဉ်ပါက များစွာ နှေးကွေးလျက်ရှိသည်ကို လေ့လာတွေ့ရှိရကြောင်း၊ ဝန်ဆောင်မှုလုပ်ငန်းများအနေဖြင့် နဂိုမူလအခြေအနေသို့ ပြန်လည်ရောက်ရှိနိုင်ရန် အချိန်ကာလလိုအပ်လျက်ရှိပြီး ပြည်တွင်းသုံးစွဲမှုများ နဂိုမူလအခြေအနေသို့ ပြန်လည်ရောက်ရှိလာခြင်း မရှိသေးဘဲဝန်ဆောင်မှုလုပ်ငန်းများ အပေါ်ဖိစီးမှုများ ဖြစ်ပေါ်လျက် ရှိကြောင်း၊ အလားတူပင် တစ်ကမ္ဘာလုံး ကပ်ရောဂါနှင့်ရင်ဆိုင်နေခြင်း၊ ပြင်ပမှမသေချာမှုများ၊ ပြည်တွင်း၌ ပြန်လည်စီးပွားရေး ပြန်လည်ကောင်းမွန်လာမှုများသည် မညီမျှခြင်းကြောင့် နောင်လာမည့်ကာလများ၏ စီးပွားရေးအပေါ် ခြိမ်းခြောက်လျက်ရှိသည့် အန္တရာယ်များ ဖြစ်ကြောင်း၊ ၂၀၂၀ ပြည့်နှစ်၊ ဩဂုတ်လအတွင်း၌ တရုတ်နိုင်ငံ၏ အလုပ်အကိုင် ဈေးကွက်ဆက်လက် တည်ငြိမ်လျက်ရှိပြီး မြို့ပြ၌ အလုပ်လက်မဲ့ ရာခိုင်နှုန်း (၅.၆) ရာခိုင်နှုန်းသို့ ရောက်ရှိခဲ့သည့်အတွက် ပြီးခဲ့သည့်လထက် (၀.၁) ရာခိုင်နှုန်း ကျဆင်းခဲ့ကြောင်း သိရှိရပါသည်။
(မြန်မာစီးပွားရေးသံမှူး၊ ပေကျင်းမြို့)
