တရုတ်နိုင်ငံတောင်ပိုင်းရှိ မဟာပင်လယ်ကွေ့ဒေသနှင့် ပတ်သက်၍ ပြန်လည် သုံးသပ်ရာ တွင် မဟာပင်လယ်ကွေ့ဒေသ (Greater Bay Area-GBA) ကို အဆင့်မြင့်နည်းပညာ အချက်အချာကျသည့်ဒေသအဖြစ်ဆောင်ရွက်မည့် ပေကျင်း၏စီမံချက် နှေးကွေး နေမှုမှာ သု‌တေသနလုပ်ငန်းများ လုံလောက်စွာပြုလုပ်နိုင်ခြင်းမရှိခြင်း၊ GBA ဒေသတွင်ပါဝင်သည့် မြို့ကြီးများအကြား ထူးချွန်ထက်မြတ်သည့်ပညာရှင်များနှင့် ငွေသားစီးဆင်းမှုများအတွက် ပူးပေါင်းဆောင်ရွက်မှုများ နည်းပါးခြင်းကြောင့်နှင့် သိပ္ပံနှင့်နည်း ပညာအခြေခံအဆောက်အအုံများ မရှိခြင်းတို့ကြောင့်ဖြစ်ကြောင်း၊ နိုင်ငံတကာတီထွင်ဆန်းသစ်မှုများအားဆွဲဆောင်မှုများတိုးပွားရန် လိုအပ်လျက်ရှိကြောင်း၊ ဟောင်ကောင်နှင့် မကာအိုဒေသတို့၌ သိပ္ပံနှင့်နည်းပညာသုတေသနဖွံ့ဖြိုးတိုးတက်မှုများ မရှိကြောင်း၊ အဆိုပါတွေ့ရှိချက်များကို အမျိုးသားနိုင်ငံရေးအကြံပေးအဖွဲ့ အစည်းအ‌ဝေး၌ ဟောင်ကောင်၊  မကာအို၊ ထိုင်ဝမ်နှင့် တရုတ်နိုင်ငံပြင်ပရှိ တရုတ်ကော်မတီများ၏အကြီးအကဲနှင့် ကွမ်တုံးပြည်နယ် အုပ်ချုပ်ရေးမှူးဟောင်းဖြစ်သူ Mr.Zhu Xiaodan ကတင်ပြခဲ့ ကြောင်း ၂၀၂၀ ပြည့်နှစ်၊ ဇူလိုင်လ ၂၄ ရက်နေ့ထုတ် South China Morning Post သတင်းစာ၌ Matt Ho က“ Problem hit regional plans for hi-tech hub” ခေါင်းစဉ်ဖြင့် ရေးသားဖော်ပြထားပါသည်။

တရုတ်လူမျိုးနိုင်ငံ‌ရေးအတိုင်ပင်ခံကွန်ဖရင့်၏ ဥက္ကဋ္ဌ ဖြစ်သူ Wang Yang ကလည်း နယ်မြေများအကြား ပူးပေါင်းဆောင်ရွက်ရန်နှင့် ကမ္ဘာလုံးဆိုင်ရာဆန်းသစ်တီထွင်မှုဗဟိုဌာနအဖြစ် ပြောင်းလဲဆောင်ရွက်နိုင်ရန် ကြိုးစားအားထုတ်သင့်သည်ဟု ပြောကြားခဲ့ ကြောင်း သိရပါသည်။

GBA ဒေသတွင်ပါဝင်သည့် တူညီမှုများရှိသည့်မြို့များအကြား ယှဉ်ပြိုင်မှုများနှင့် အရင်းအမြစ်ကွာဟချက်များကြောင့် အခက်အခဲများဖြစ်စေကြောင်း၊ တီထွင်ဆန်းသစ်မှု နည်းပညာစီမံကိန်းများတွင် ပူးပေါင်းဆောင်ရွက်မှုများနှင့် ရင်းနှီးမြှုပ်နှံမှုများတွင် ကန့်သတ်ချက်များရှိနေကြောင်း၊ နယ်စပ်ဖြတ်ကျော် သုတေသနဖွံ့ဖြိုး တိုးတက်ရေးအတွက် ရန်ပုံငွေများမရှိခြင်း၊ ဥပ‌ဒေနှင့် နည်းဥပဒေများ သဟဇာတမဖြစ်ခြင်း၊ ကျွမ်းကျင်ပညာရှင်များ၏ အရည်အသွေးကို အပြန်အလှန် အသိအမှတ်မပြုခြင်း၊ အသိဉာဏ ပစ္စည်းမူပိုင်ခွင့် အကာအကွယ်‌ပေးရေး အုပ်ချူပ်မှုစနစ်မရှိခြင်း တို့ကြောင့်လည်းဖြစ်ကြောင်း ရေးသားဖော်ပြထားပါသည်။

ကော်မတီမှထောက်ခံပေးခဲ့သည့် မြို့ကြီးများအနေဖြင့် ၂၀၂၁ ခုနှစ်တွင် အမျိုးသားဥပဒေပြု လွှတ်တော်မှအတည်ပြုမည့် ပေကျင်း၏ (၅) နှစ်စီမံကိန်းတွင် သိပ္ပံနည်းကျ အခြေခံအဆောက်အအုံများစီမံချက်တွင် ပါဝင်နိုင်ရန် တောင်းဆိုခဲ့ကြောင်း၊ နယ်စပ် ဖြတ်ကျော်ငွေကြေးကဏ္ဍ တိုးတက်ရန် ဘဏ်ငွေချေးလုပ်ငန်းနှင့် ပုဂ္ဂလိကရှယ်ယာ ရင်းနှီးမြှုပ်နှံမှုများကို ဟောင်ကောင်နှင့် ရှန်းကျန့် နယ်စပ်ရှိ Lok Ma Chau Loop-Qianhai ၊ မကာအိုနှင့်ကျူးဟိုင်ဒေသတို့အကြားရှိ ဟန်ကျင်း (Hengqin) နှင့် ကွမ်ကျိုးရှိ Nansha Huangpu  တို့၌ အားပေးဆောင်ရွက်သင့်ကြောင်း၊ အဆိုပါဒေသများ၌ နယ်စပ်ဖြတ်ကျော် ရင်းနှီးမြှုပ်နှံမှုနှင့် ငွေကြေးရန်ပုံငွေများအတွက် ဖြစ်နိုင်ချေရှိသည့် အခြေအနေများကို အာဏာပိုင်အဖွဲ့များကလည်း လေ့လာဆောင်ရွက်သင့်ကြောင်း ရေးသားဖော်ပြထားပါသည်။

(မြန်မာစီးပွားရေးသံမှူး၊ ဟောင်ကောင်)