တရုတ်နိုင်ငံသည် အီသီယိုးပီးယားကော်ဖီတင်ပို့မှု၏ ထိပ်တန်းနေရာများအနက်မှ တစ်ခု ဖြစ်လာသောကြောင့် အီသီယိုးပီးယားအစိုးရသည် လျင်မြန်စွာကြီးထွားလာသော တရုတ်ကော်ဖီ ဈေးကွက်ကို ထပ်မံထိုးဖောက်ရန် စိတ်အားထက်သန်လျက်ရှိကြောင်း သိရှိရသည်။

Ethiopian Coffee and Tea Authority (ECTA)မှ တာဝန်ရှိသူများသည် အရှေ့အာဖရိက ရှိ အီသီယိုပီးယားနိုင်ငံ၏ ကော်ဖီကို စိတ်ဝင်စားသော တရုတ်စီးပွားရေးကိုယ်စားလှယ်များနှင့် ဆွေးနွေးခဲ့ကြောင်း ECTA က ထုတ်ပြန်သည့်ကြေညာချက်တွင် ဖော်ပြထားကြောင်း သိရှိရသည်။

ဆွေးနွေးမှုအတွင်း တရုတ်နိုင်ငံသည် အီသီယိုးပီးယားကော်ဖီကို တင်သွင်းသည့်ထိပ်တန်း (၁၀)နိုင်ငံအနက်မှ တစ်နိုင်ငံဖြစ်လာသောကြောင့် တရုတ်စျေးကွက်သည် အီသီယိုးပီးယား ကော်ဖီ တင်ပို့ရောင်းချသူများအတွက် ပို၍အရေးပါလာကြောင်းကို ECTA မှ တာဝန်ရှိသူများနှင့် အီသီယိုးပီးယား ကော်ဖီတင်ပို့ရောင်းချသူများက အလေးပေးပြောကြားခဲ့သည်ဟု သိရှိရသည်။

မကြာသေးမီနှစ်များအတွင်း အီသီယိုးပီးယားမှ တရုတ်နိုင်ငံသို့ ကော်ဖီတင်ပို့မှု အရှိန် အဟုန်ဖြင့် မြင့်တက်လာကြောင်းနှင့် တရုတ်လူမျိုးများအကြားတွင် ကော်ဖီသောက်သုံးသူ များပြားလာပြီး အီသီယိုးပီးယားကော်ဖီ၏ လူကြိုက်များမှု မြင့်တက်လာခြင်းသည် အီသီယိုး ပီးယား၏ ကော်ဖီတင်ပို့မှုဈေးကွက်ကို တွန်းအားပေးလျက်ရှိကြောင်း အီသီယိုပီးယားမှ တာဝန်ရှိ သူများနှင့် ကော်ဖီတင်ပို့ရောင်းချသူများက ပြောကြားခဲ့သည်ဟု သိရှိရသည်။

အီသီယိုးပီးယားမှ ကော်ဖီကို တိုက်ရိုက်တင်သွင်းသည့် တရုတ်ကော်ဖီဝယ်သူများ သိသိ သာသာ တိုးလာခြင်းကြောင့် လွန်ခဲ့သည့် သုံးနှစ်အတွင်း တရုတ်နိုင်ငံသို့ အီသီယိုးပီးယား ကော်ဖီတင်ပို့မှုပမာဏသည် နှစ်စဉ် ပျမ်းမျှ (၂၇)ရာခိုင်နှုန်း တိုးလာကြောင်း အာဏာပိုင်များ၏ အချက်အလက်များအရ သိရှိရသည်။

ကော်ဖီထုတ်လုပ်မှုတွင် ကျော်ကြားသော အီသီယိုးပီးယားနိုင်ငံသည် ၂၀၂၄ ခုနှစ်၊ ဇူလိုင် လ ၇ ရက်နေ့တွင် ပြီးဆုံးခဲ့သည့် ဘဏ္ဍာရေးနှစ်တွင် ကော်ဖီတင်ပို့မှုမှ အမေရိကန်ဒေါ်လာ (၁.၄၃)ဘီလီယံ ရရှိခဲ့ကြောင်းနှင့် လက်ရှိ ၂၀၂၄-၂၀၂၅ ဘဏ္ဍာနှစ်တွင် အဆိုပါပမာဏကို အမေရိကန်ဒေါ်လာ(၂)ဘီလီယံအထိ တိုးမြှင့်သွားရန် ရည်မှန်းထားကြောင်း သိရှိရသည်။

အာရေဗီကာကော်ဖီ၏ မူလအစအဖြစ် သတ်မှတ်ခံထားရသော အီသီယိုးပီးယားနိုင်ငံသည် အာဖရိက၏ အကြီးဆုံးကော်ဖီထုတ်လုပ်သူနှင့် တင်ပို့ရောင်းချသူဖြစ်ပြီး ကော်ဖီထုတ်လုပ်မှုကို စိုက်ပျိုးရေးဦးဆောင်သော နိုင်ငံ့ စီးပွားရေး၏ အဓိကကျောရိုးအဖြစ် သတ်မှတ်ထားကြောင်း၊ ၎င်း၏ ကောင်းမွန်သည့် ကော်ဖီအရည်အသွေးနှင့် အရသာများကြောင့် ၎င်း၏ ကော်ဖီသည် ကမ္ဘာတစ်ဝန်းတွင် ဝယ်လိုအား မြင့်မားလျက်ရှိကြောင်း သိရှိရပါသည်။

Source: en.people.cn/n3/2024/1210/c90000-20252089.html

(စီးပွားရေးသံမှူး၊ နန်နင်းမြို့)