တရုတ်နိုင်ငံမှ ဗီယက်နမ်နိုင်ငံသို့ ပို့ကုန်အမှာစာများ တိုးမြင့်ရရှိလျက်ရှိပြီး ထင်ရှားသော ပို့ကုန်ဝယ်လိုအားများ တိုးလာကြောင်း The Voice of Vietnam အွန်လိုင်းသတင်းဖော်ပြချက်အရ သိရှိရပါသည်။

ဗီယက်နမ်နိုင်ငံသည် တရုတ်နိုင်ငံသို့ အမေရိကန် ဒေါ်လာ ၁.၄၅ ဘီလီယံတန်ဖိုးရှိ ဖုန်းများတင်ပို့ခဲ့ပြီး ၁၈ ရာခိုင်နှုန်း တိုးလာကြောင်း၊ ကွန်ပျူတာ အမေရိကန် ဒေါ်လာ ၁.၂၄ ဘီလီယံဖိုး တင်ပို့ခဲ့ပြီး ၅၇ ရာခိုင်နှုန်းတိုးလာကြောင်း၊ ရော်ဘာ အမေရိကန်ဒေါ်လာ ၁၇၃ သန်းဖိုးတင်ပို့ခဲ့ပြီး ၁၂၄ ရာခိုင်နှုန်းတိုးမြင့်လာခဲ့ကြောင်း ဖော်ပြထားပါသည်။

တရုတ်နိုင်ငံသို့ ဗီယက်နမ်နိုင်ငံ၏ ပို့ကုန်တန်ဖိုးသည် ၇.၅ ရာခိုင်နှုန်း တိုးလာပြီး အမေရိကန် ဒေါ်လာ ၃၃.၄ ဘီလီယံရရှိကာ ယခင်နှစ် အလားတူကာလထက် ဒေါ်လာ ၂.၄ ဘီလီယံ တိုးမြင့်လာခဲ့သည်။ အထူးသဖြင့် သစ်နှင့်သစ်ပါးလွှာ တင်ပို့မှုသည် ၄၈ ရာခိုင်နှုန်းတိုးတက်ခဲ့ပြီး အမေရိကန်ဒေါ်လာ ၁ ဘီလီယံကျော်ရှိကြောင်း သိရှိရပါသည်။

ကင်မရာများ၊ ကင်မရာများနှင့် အစိတ်အပိုင်းများ တင်ပို့မှုမှာ ၈၅ ရာခိုင်နှုန်းရှိပြီး အမေရိကန်ဒေါ်လာ ၂.၄၃ ဘီလီယံအထိ မြင့်တက်လာခဲ့ကြောင်း၊ သစ်သီးနှင့် ဟင်းသီးဟင်းရွက်  တင်ပို့မှုမှာ ၂၂.၅ ရာခိုင်နှုန်းရှိကာ အမေရိကန်ဒေါ်လာ ၂.၂ ဘီလီယံနီးပါးအထိ မြင့်တက်လာခဲ့ကြောင်း၊ ဖိနပ်တင်ပို့မှုမှာလည်း အကြမ်းဖျင်းအားဖြင့် အမေရိကန်ဒေါ်လာ ၉၅၀ သန်းအထိ ရောက်ရှိကာ ၈၈.၇ ရာခိုင်နှုန်း တိုးတက်ခဲ့ကြောင်း ဖော်ပြထားပါသည်။

ထုပ်ပိုးမှုနှင့် အစားအစာဘေးကင်းရေးညွှန်းကိန်းများဆိုင်ရာ တင်းကြပ်သော လိုအပ်ချက်များနှင့်ကိုက်ညီသည့် ဗီယက်နမ်လယ်ယာထွက်ကုန်များ၏ ထုတ်ကုန်အရည်အသွေးနှင့်အတူ ကမ္ဘာ့စားသုံးမှုဝယ်လိုအား ပြန်လည်ကောင်းမွန်လာခြင်းကြောင့် သိသိသာသာတိုးလာကြောင်း သိရှိရပါသည်။

ယခုနှစ်ကုန်ပိုင်းအတွင်း စားသုံးသူဝယ်လိုအားမြင့်မားမှုကြောင့် ယခုနှစ်လက်ကျန်လများတွင်လည်း ဗီယက်နမ်နိုင်ငံမြောက်ပိုင်းရှိ တရုတ်နိုင်ငံသို့ တင်ပို့မှုမှာ ဆက်လက်အားကောင်းနေမည်ဟု ကျွမ်းကျင်သူများက ပြောကြားခဲ့သည်။

ထို့အပြင် အာဆီယံ-တရုတ် လွတ်လပ်သောကုန်သွယ်မှု သဘောတူညီချက် (ACFTA)နှင့် ဒေသတွင်း ဘက်စုံစီးပွားရေး ပူးပေါင်းဆောင်ရွက်ရေး သဘောတူညီချက် (RCEP) ကဲ့သို့သော နှစ်နိုင်ငံနှင့် ဘက်စုံ ပူးပေါင်းဆောင်ရွက်ရေး သဘောတူညီချက်များသည် ဗီယက်နမ်ကုန်ပစ္စည်းများ စျေးကွက်သို့ ထိုးဖောက်ဝင်ရောက်ရန် အခွင့်အလမ်းများစွာ ဖန်တီးရန် မျှော်လင့်ကြောင်း ဖော်ပြထားပါသည်။

အမေရိကန်နှင့် EU တို့၏ ကုန်သွယ်ရေးတင်းမာမှု၊ သင်္ဘောစရိတ်ကြီးမြင့်မှုများကြောင့် တရုတ်ကုမ္ပဏီအများအပြားသည် အိမ်နီးချင်း ဒေသများတွင် ကုန်ပစ္စည်းတင်သွင်းမှုများကို ရှာဖွေလျက်ရှိပြီး ဗီယက်နမ်နိုင်ငံအား ထိပ်တန်းရွေးချယ်မှုအဖြစ် ရွေးချယ်လာကြောင်း တွေ့ရှိရ ပါသည်။

ဗီယက်နမ်ဈေးကွက်မှ အုန်းသီးလတ်လတ်ဆတ်ဆတ်များ တင်ပို့မှုဆိုင်ရာ ပရိုတိုကော လက်မှတ်ရေးထိုးခြင်းသည် ပို့ကုန်လုပ်ငန်းရှင်များအတွက် တစ်နှစ်လျှင် အမေရိကန်ဒေါ်လာ သန်း ၃၀၀ မှ သန်း ၄၀၀ ကြား ၀င်ငွေရလိမ့်မည်ဟု စက်မှုလုပ်ငန်းရှင်များက မျှော်လင့်ထားကြောင်း ဖော်ပြထားပါသည်။  

Source: VOV

(စီးပွားရေးသံမှူး၊ဗီယက်နမ်)