ဗီယက်နမ်နိုင်ငံသို့ ပြည်ပငွေလွှဲပို့မှုသည် ပြီးခဲ့သည့် ဆယ်စုနှစ်နှစ်ခု (၁၉၉၃-၂၀၂၃) အတွင်း အမေရိကန်ဒေါ်လာ ၂၃၀ ဘီလီယံရရှိခဲ့ပြိး အလားတူကာလအတွင်း နိုင်ငံခြားတိုက်ရိုက် ရင်းနှီးမြှုပ်နှံမှု (FDI) အရင်းအနှီး စုစုပေါင်းပမာဏနှင့် ညီမျှသည်ဟု အစိုးရသတင်းထုတ်ပြန်ချက် အရ သိရှိရပါသည်။
နိုင်ငံခြားရေးဝန်ကြီးဌာန ဒုတိယဝန်ကြီး Le Thi Thu Hang က ဒီဇင်ဘာ ၂၅ ရက်နေ့က ဟနွိုင်းတွင် ကျင်းပပြုလုပ်သည့် ၆၅ နှစ်မြောက် ပြည်ပရောက်ဗီယက်နမ်လူမျိုးများအား မွေးရပ် မြေနှင့် ချိတ်ဆက်ခြင်း ညီလာခံအတွင်း ပြောကြားချက်ကို အစီရင်ခံစာတွင် ကိုးကား၍ ဖော်ပြ ထားပါသည်။
၂၀၂၀ ခုနှစ်မှစတင်၍ ဗီယက်နမ်နိုင်ငံသို့ ပြည်ပငွေလွှဲဝင်ရောက်မှုသည် FDI အရင်းအနှီးနှင့် တရားဝင်ဖွံ့ဖြိုးတိုးတက်ရေးအကူအညီ (ODA) ပမာဏထက် ကျော်လွန်သွားပြီဖြစ်ကြောင်း ဒုတိယ ဝန်ကြီးကပြောကြားခဲ့ပါသည်။ ၎င်းသည် ငွေပေးချေမှုချိန်ခွင်လျှာမြှင့်တင်ပေးခြင်း၊ စီးပွားရေး တည်ငြိမ်စေခြင်း၊ ဆင်းရဲမွဲတေမှုမှ လွတ်မြောက်စေရန် မိသားစုများကိုကူညီပေးခြင်း၊ လူနေမှု အဆင့်အတန်း မြှင့်တင်ပေးနိုင်ကြောင်း သိရှိရပါသည်။
၂၀၂၃ ခုနှစ်စာရင်းများအရ နိုင်ငံနှင့် နယ်မြေ ၃၂ နိုင်ငံတွင် နေထိုင်သည့် ပြည်ပရောက် ဗီယက်နမ်နိုင်ငံသားများသည် ဗီယက်နမ်နိုင်ငံရှိ ပြည်နယ် ၆၃ ခုအနက် ၄၂ ခုရှိ စီမံကိန်း ၄၂၁ ခု တွင် ရင်းနှီးမြှုပ်နှံထားပြီး အမေရိကန်ဒေါ်လာ ၁.၇၂ ဘီလီယံ မြှုပ်နှံထားကြောင်း၊ အဆိုပါ ရင်းနှီး မြှုပ်နှံမှုသည် စီးပွားရေးသက်ရောက်မှုအနေဖြင့် နိုင်ငံ၏ စီးပွားရေးတိုးတက်မှုအတွက် အထောက် အကူဖြစ်စေသကဲ့သို့ နိုင်ငံ၏တန်ဖိုးများကို မြှင့်တင်ရာတွင် အထောက်အကူဖြစ်စေပြီး ဗီယက်နမ်နိုင်ငံနှင့် အခြားနိုင်ငံများအကြား ချစ်ကြည်ရင်းနှီးသော ဆက်ဆံရေးကို ခိုင်မြဲစေသည်ဟု သူမက ထပ်လောင်း ပြောကြားခဲ့ကြောင်း ဖော်ပြထားပါသည်။
Source: Vietnam Economic Times
(စီးပွားရေးသံမှူး၊ မြန်မာသံရုံး၊ ဟနွိုင်းမြို့)
