တောင်ကိုရီးယားနိုင်ငံနှင့် ဂျပန်နိုင်ငံအကြား ၈ နှစ်တာကာလအတွင်း ပထမဆုံးအကြိမ်အဖြစ် နှစ်နိုင်ငံတိုက်ရိုက်ငွေကြေးလဲလှယ်အသုံးပြုနိုင်ရေးအတွက် ၂၉-၆-၂၀၂၃ ရက်နေ့က သဘောတူညီမှုရရှိခဲ့ကြောင်း ဖော်ပြထားပါသည်။
အဆိုပါသတင်းတွင် ဂျပန်နိုင်ငံ၊ ဘဏ္ဍာရေးဝန်ကြီး Shunichi Suzuki နှင့် တောင်ကိုရီးယားနိုင်ငံ စီးပွားရေးနှင့်ဘဏ္ဍာရေးဝန်ကြီး Choo Kyung-ho တို့အနေဖြင့် ၂၀၁၆ ခုနှစ်မှစ၍ ပထမဆုံးအကြိမ်အဖြစ် တိုကျိုတွင်ကျင်းပသည့် ဂျပန်-တောင်ကိုရီးယားဘဏ္ဍာရေးဆိုင်ရာဆွေးနွေးပွဲတွင် နှစ်နိုင်ငံတိုက်ရိုက်ငွေကြေးလဲလှယ်အသုံးပြုနိုင်ရေးအတွက် သဘောတူညီမှုရရှိခဲ့ကြောင်း၊ တောင်ကိုရီးယားနိုင်ငံ စီးပွားရေးနှင့်ဘဏ္ဍာရေးဝန်ကြီး Choo Kyung-ho က တောင်ကိုရီးယားနှင့် ဂျပန်နိုင်ငံတို့အနေဖြင့် ဈေးကွက်စီးပွားရေးစနစ်ကိုကျင့်သုံးပြီး လွတ်လပ်သည့် ဒီမိုကရေစီစံနှုန်းများကို တန်ဖိုးထားသည့် မိတ်ဖက်နိုင်ငံများဖြစ်သော်လည်း အကြောင်းအမျိုးမျိုးကြောင့် နှစ်နိုင်ငံဘဏ္ဍာရေးဝန်ကြီးများအကြား ဆက်ဆံရေးအရ အဆင်မပြေမှုများဖြစ်ပေါ်ခဲ့ကြောင်း၊ ယနေ့အစည်းအဝေးမှစ၍ နှစ်နိုင်ငံစီးပွားရေးပူးပေါင်းဆောင်ရွက်မှု ပိုမိုခိုင်မာအားကောင်းစေရေးနှင့် ချဲ့ထွင်နိုင်ရေးအတွက် ဘဏ္ဍာရေးဆိုင်ရာဆွေးနွေးမှုများ တိုးမြှင့်ဆောင်ရွက်သွားမည်ဖြစ်ကြောင်း အစည်းအဝေးတွင် ထည့်သွင်းပြောကြားခဲ့ကြောင်း ဖော်ပြထားပါသည်။
အဆိုပါအစည်းအဝေးအပြီးတွင်ကျင်းပခဲ့သည့် သတင်းစာရှင်းလင်းပွဲတွင် ဂျပန်နိုင်ငံ၊ ဘဏ္ဍာရေးဝန်ကြီး Shunichi Suzuki က တည်ငြိမ်သောဘဏ္ဍာရေးစနစ်ထိန်းသိမ်းနိုင်ရန်နှင့် အာရှဒေသအတွင်း စီးပွားရေးတည်ငြိမ်မှုရရှိစေရေးအတွက် ဂျပန်-တောင်ကိုရီးယားနှစ်နိုင်ငံအကြား တိုက်ရိုက်ငွေကြေးလဲလှယ်အသုံးပြုနိုင်ရေး လိုအပ်လျက်ရှိကြောင်းကို နှစ်နိုင်ငံဘဏ္ဍာရေးဝန်ကြီးများက အသိအမှတ်ပြုသဘောတူညီခဲ့ကြောင်း ဖော်ပြထားပါသည်။
နှစ်နိုင်ငံပူးတွဲထုတ်ပြန်ချက်အရ အမေရိကန်ဒေါ်လာ ၁၀ ဘီလီယံအတွက် ဂျပန်-တောင်ကိုရီးယား တိုက်ရိုက်ငွေကြေးလဲလှယ်အသုံးပြုနိုင်ရေး သဘောတူညီခဲ့ကြောင်း ဖော်ပြထားပါသည်။ ၁၉၉၀ နှောင်းပိုင်းကာလများတွင် အာရှဘဏ္ဍာရေးအကြပ်အတည်းဖြစ်ပွားပြီးနောက် အရေးပေါ်အခြေအနေတွင် နှစ်နိုင်ငံအကြား နိုင်ငံခြားငွေကြေးအပြန်အလှန်ပံ့ပိုးပေးနိုင်ရေးအတွက် ၂၀၀၁ ခုနှစ်မှစတင်၍ ဂျပန်-တောင်ကိုရီးယားနှစ်နိုင်ငံအကြား တိုက်ရိုက်ငွေကြေးလဲလှယ်အသုံးပြုမှုကို စတင်ခဲ့ကြောင်း၊ ၂၀၁၁ ခုနှစ်တွင် နှစ်နိုင်ငံအကြား တိုက်ရိုက်ငွေကြေးလဲလှယ်သုံးစွဲမှုပမာဏကို အမေရိကန်ဒေါ်လာ ၁၃ ဘီလီယံမှ အမေရိကန်ဒေါ်လာ ၇၀ ဘီလီယံအထိ တိုးမြှင့်ဆောင်ရွက်ခဲ့ပြီးနောက် နှစ်နိုင်ငံအကြား ဆက်ဆံရေးတင်းမာခဲ့ပြီး ၂၀၁၅ ခုနှစ်တွင် အဆိုပါစနစ်ကို ရပ်ဆိုင်းခဲ့ကြောင်း ဖော်ပြထားပါသည်။
နှစ်နိုင်ငံတိုက်ရိုက်ငွေကြေးလဲလှယ်အသုံးပြုနိုင်ရေး သဘောတူညီမှုရရှိခဲ့ခြင်းသည် ဒုတိယကမ္ဘာစစ်အတွင်း အဓမ္မလုပ်သားခိုင်းစေမှုဆိုင်ရာပြဿနာများကြောင့် နှစ်နိုင်ငံအကြားဆက်ဆံရေးတင်းမာခဲ့မှုမှ ပြန်လည်ကောင်းမွန်လာသည့် လက္ခဏာများဖြစ်ကြောင်း၊ ထို့အတူ တောင်ကိုရီးယားသမ္မတအနေဖြင့် ဂျပန်နိုင်ငံနှင့်ဆက်ဆံရေးပြန်လည်တည်ဆောက်လိုကြောင်း အတိအလင်းထုတ်ဖော်ပြောကြားခဲ့ကြောင်း၊ တောင်ကိုရီးယားသမ္မတအနေဖြင့် ၁၂ နှစ်တာကာလအတွင်း ပထမဆုံးအကြိမ်အဖြစ် တိုကျိုသို့ ရောက်ရှိခဲ့ပြီး နှစ်နိုင်ငံအကြား ပူးပေါင်းဆောင်ရွက်မှုစာမျက်နှာသစ်ကို ဖွင့်လှစ်ရန်နှင့် နှစ်နိုင်ငံခေါင်းဆောင်များအကြား အပြန်အလှန်ကူးလူးဆက်ဆံရေးကို ပိုမိုတိုးမြှင့်သွားရန် သဘောတူညီခဲ့ကြောင်း ဖော်ပြထားပါသည်။
ထိုသို့သဘောတူညီမှုရရှိပြီးနောက်တွင် နှစ်နိုင်ငံအကြားကုန်သွယ်ရေးအပါအဝင် ကဏ္ဍစုံတွင် ပူးပေါင်းဆောင်ရွက်မှုမြှင့်တင်နိုင်ရေး ဆောင်ရွက်ခဲ့ကြောင်း၊ ဂျပန်နိုင်ငံအနေဖြင့် တောင်ကိုရီးယားနိုင်ငံသို့ Chips ထုတ်လုပ်ရာတွင်အသုံးပြုသည့် အဓိကကုန်စည်များတင်ပို့မှုအတွက် ပို့ကုန်ထိန်းချုပ်ရေးဆိုင်ရာမူဝါဒများကို ဖြေလျှော့ပေးခဲ့ကြောင်း၊ ၂၇-၆-၂၀၂၃ ရက်နေ့၌ ဂျပန်နိုင်ငံအနေဖြင့် တောင်ကိုရီးယားနိုင်ငံအား ယုံကြည်စိတ်ချရသည့် မိတ်ဖက်ကုန်သွယ်ဖက်နိုင်ငံစာရင်းတွင် ၂၁-၇-၂၀၂၃ ရက်နေ့မှစ၍ ပြန်လည်ထည့်သွင်းရန် ဆုံးဖြတ်ခဲ့ကြောင်း ဖော်ပြထားပါသည်။
ဂျပန်နှင့်တောင်ကိုရီးယားနိုင်ငံအကြား ပူးပေါင်းဆောင်ရွက်မှုအရှိန်အဟုန်တိုးတက်လျက်ရှိပြီး Chips ထုတ်လုပ်မှုတိုးမြှင့်ရေးအပါအဝင် အခြားသောကဏ္ဍများတွင် ပူးပေါင်းဆောင်ရွက်မှုမြှင့်တင်နိုင်ရေး နှစ်နိုင်ငံအကြား ဆက်လက်ဆောင်ရွက်သွားမည်ဖြစ်ကြောင်း ဖော်ပြထားပါသည်။
Source: The Japan Times (30-6-2023)
(သူဇာဖြိုး၊ စီးပွားရေးသံမှူး၊ တိုကျိုမြို့)
