ထိုင်းနိုင်ငံ၌ PM 2.5 ဖုန်မှုန့်ပြဿနာများနှင့်စပ်လျဉ်း၍ ဖြေရှင်းရန်အတွက် ပြောင်းတင်သွင်းမှုကို တင်းတင်းကျပ်ကျပ်ထိန်းချုပ်ရန်၊ မှတ်ပုံတင်ရန်နှင့် မီးရှို့မှုကင်းစင်သက်သေခံလက်မှတ်(Burn-ing-free certificate)များထုတ်ပေးနိုင်ရေးအတွက် အစီအမံ(၄)ခုဆောင်ရွက်နိုင်ရေး စီစဉ်လျက်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီး H.E Mr. Pichai Naripthaphan က ပြောကြားခဲ့ပါသည်။
ဝန်ကြီးသည် လွှတ်တော်ကိုယ်စားလှယ်များနှင့်တွေ့ဆုံစဉ်၌ Prachachon ပါတီခေါင်းဆောင် Mr. Phattapong Leelaphat က စီးပွားရေးနှင့် ကူးသန်းရောင်းဝယ်ရေးဝန်ကြီးဌာနတွင် မီးရှို့မှုနှင့်ဆက်စပ်နေသော တိရစ္ဆာန်အစာပြောင်းထုတ်လုပ်မှုလုပ်ငန်းစဉ်ကို စစ်ဆေးမည့်အစီအမံများမရှိခြင်းနှင့် PM 2.5 ဖုန်မှုန့်ပြဿနာကိုဖြစ်စေသည့် စိုက်ပျိုးရေးထုတ်ကုန်များတင်သွင်းမှုကို တားမြစ်သောသတ်မှတ်ချက်များ မရှိကြောင်းတွေ့ရှိချက်ကို ထောက်ပြပြောဆိုခဲ့ကြောင်း၊ ဝန်ကြီးက အစိုးရသည် PM 2.5 ဖုန်မှုန့်ပြဿနာ ၏သက်ရောက်မှုကို သတိပြုမိလျက်ရှိပြီး စိုးရိမ်လျက်ရှိသည်ကို ပြန်လည်ပြောကြားခဲ့ပါကြောင်း၊ ဝန်ကြီးချုပ်ကလည်း PM 2.5 ဖုန်မှုန့်ပြဿနာကို အရေးတကြီးဖြေရှင်းရန် ကဏ္ဍအားလုံးကို ညွှန်ကြားထားပြီးဖြစ်ကြောင်း၊ လက်ရှိတွင် သဘာဝရင်းမြစ်နှင့် ပတ်ဝန်းကျင်ဝန်ကြီးဌာန၊ လေထုညစ်ညမ်းမှုထိန်းချုပ်ရေးဦးစီးဌာနက သန့်စင်သောလေဥပဒေ(Clean Air Act)ကို တွန်းတွန်းတိုက်တိုက်ဆောင်ရွက်လျက်ရှိသကဲ့သို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနသည်လည်း နယ်စပ်ဒေသများတွင် ဖုန်မှုန့်များပျံ့နှံ့မှုကိုကာကွယ်ရန် အစီအမံများဆောင်ရွက်နေကြောင်း ဝန်ကြီးက ဖြည့်စွက်ပြောကြားခဲ့သည်။
တိရစ္ဆာန်အစာပြောင်းတင်သွင်းမှုကို တားမြစ်သည့်အစီအမံများကိုဆုံးဖြတ်ရာတွင် အချက်များစွာကို ထည့်သွင်းစဉ်းစားရပါကြောင်း၊ ပြောင်းသည် တိရစ္ဆာန်အစာကဏ္ဍအတွက် အရေးကြီးသော ကုန်ကြမ်းဖြစ်သောကြောင့် အထောက်အကူပြုမည့်အစီအမံများမရှိဘဲ တင်သွင်းမှုကို ပိတ်ပင်လိုက်ပါက ထောက်ပံ့မှုကွင်းဆက်၊ ပြည်သူတို့၏နေထိုင်မှုကုန်ကျစရိတ်နှင့် တင်ပို့ကုန်စည်များ၏ ကုန်ကျစရိတ်များတွင် သက်ရောက်လာနိုင်ပါကြောင်း၊ နိုင်ငံခြားကုန်သွယ်မှုဦးစီးဌာနသည် အစိုးရ၊ တောင်သူ၊ ပုဂ္ဂလိကကဏ္ဍအပါ အဝင် သက်ဆိုင်ရာအဖွဲ့အစည်းများနှင့်ဆွေးနွေးခဲ့ပြီး တိရစ္ဆာန်အစာပြောင်းတင်သွင်းမှုအပေါ် ဆောင်ရွက်မည့်အစီအမံ(၄)ခုကို အပြီးသတ်ချမှတ်ခဲ့ကြောင်း၊ ယင်းတို့မှာ သွင်းကုန်လုပ်ငန်းရှင်များသည် အတည်ပြုချက်အတွက် မှတ်ပုံတင်ရမည်၊ ပြောင်းသည် မီးရှို့ထားခြင်းမရှိကြောင်း အတည်ပြုချက်အနေဖြင့် စိုက်ပျိုးမှုရင်းမြစ်၊ စိုက်ခင်းတည်နေရာ၊ တင်သွင်းပမာဏ၊ နောက်ကြောင်းလိုက်နိုင်မှုကဲ့သို့သော အရေးကြီးသည့်သတင်းအချက်အလက်၊ စာရွက်စာတမ်းများတင်ပြရမည်၊ မှတ်ပုံတင်မှုတွင် သံသယဖြစ်ဖွယ်တွေ့ရှိပါက တင်သွင်းမှုမဖြစ်နိုင်ပါနှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနလမ်းညွှန်ချက်ကို တိရစ္ဆာန်အစာပြောင်းမူဝါဒနှင့် စီမံခန့်ခွဲမှုကော်မတီ(Animal Feed Corn Policy and Management Committee-NFMC)သို့တင်ပြသွားမည်ဖြစ်ပြီး အတတ်နိုင်ဆုံးမြန်မြန်အကောင်အထည်ဖော်သွားမည်ဖြစ်ကြောင်း စသည်တို့ဖြစ်ကြောင်း ဝန်ကြီးက ဆက်လက်ပြောကြားခဲ့သည်။
အစိုးရအနေဖြင့် PM 2.5 ဖုန်မှုန့်ပြဿနာကို အလွန်စိုးရိမ်ပူပန်လျက်ရှိပြီး ဝန်ကြီးဌာနအနေဖြင့်လည်း ပတ်ဝန်းကျင်နှင့်နိုင်ငံ၏ စီးပွားရေးအကြား မျှတမှုကိုထိန်းထားရန်နှင့် PM 2.5 ဖုန်မှုန့်ပြဿနာလျှော့ချနိုင်ရန် ဆက်စပ်အစီအမံများကို လျင်လျင်မြန်မြန်အကောင်အထည်ဖော်ဆောင်ရွက်သွားမည်ဖြစ်ကြောင်း၊ အစိုးရသည် PM 2.5 ဖုန်မှုန့်ပြဿနာကို တတ်နိုင်သမျှလျင်လျင်မြန်မြန်နှင့် ထိထိရောက်ရောက်ဖြေရှင်းသွားမည်ဖြစ်ပြီး တောင်သူများမှသည် ပြည်သူများအထိ ကဏ္ဍများစွာကို စနစ်ကျစွာနှင့် ဂရုတစိုက် ထည့်သွင်းစဉ်းစားသွားမည်ဖြစ်ကြောင်း၊ အစီအမံများကို ဆောင်ရွက်ခြင်းဖြင့် လေထုညစ်ညမ်းမှုလျှော့ချမှုစွမ်းရည်ကိုမြှင့်တင်ပြီး နိုင်ငံ၏ကုန်သွယ်မှုနှင့်စီးပွားရေးတည်ငြိမ်မှုကိုလည်း ထိန်းသွားမည်ဖြစ်ကြောင်း ဝန်ကြီး Mr. Pichai က ကတိပြုပြောကြားခဲ့သည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
