၂၀၂၅ ခုနှစ် ဖေဖော်ဝါရီလအတွင်း ထိုင်းနိုင်ငံ၏ ပို့ကုန်တန်ဖိုးသည် အမေရိကန်ဒေါ်လာ ၂၆.၇ ဘီလီယံရှိခဲ့သဖြင့် ၁၄ ရာခိုင်နှုန်းတိုးတက်မှုရှိခဲ့ပြီး ၈ လဆက်တိုက်တိုးတက်မှုဖြစ်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားချက်အရ သိရှိရပါသည်။
ဖေဖော်ဝါရီလအတွင်း သွင်းကုန်တန်ဖိုးသည် အမေရိကန်ဒေါ်လာ ၂၄.၇ ဘီလီယံရှိခဲ့သဖြင့် ၄ ရာခိုင်နှုန်းတိုးတက်မှုရှိခဲ့ပြီး ကုန်သွယ်မှုပိုငွေ အမေရိကန်ဒေါ်လာ ၁.၉၉ ဘီလီယံဖြစ်ပေါ်ခဲ့ကြောင်း၊ ယခုနှစ် ပထမ ၂ လအတွင်း ပို့ကုန်သည် ၁၃.၈ ရာခိုင်နှုန်းတိုးတက်မှုရှိခဲ့ကြောင်း၊ ရင်းနှီးမြှုပ်နှံမှုများနှင့် ပို့ကုန်ထုတ်လုပ်မှုအတွက် ကုန်ကြမ်းများတင်သွင်းမှုတိုးတက်မှုရှိခဲ့သဖြင့် မတ်လအတွက် ပို့ကုန်အလားအလာသည် အတက်ဖက်တွင်ရှိနိုင်ကြောင်း ဝန်ကြီး H.E Mr. Pichai Naripthaphan က ပြောကြားခဲ့ပါသည်။
စိုက်ပျိုးရေးနှင့်စက်မှုစိုက်ပျိုးရေးကဏ္ဍများ၌ ၃.၉ ရာခိုင်နှုန်းတိုးတက်ခဲ့မှုကြောင့် ပို့ကုန်တိုးတက်ခဲ့ခြင်းဖြစ်ကြောင်း၊ ရာဘာပို့ကုန် သည် ၃၅.၇ ရာခိုင်နှုန်း၊ ဂျုံထုတ်ကုန်များသည် ၂၇.၇ ရာခိုင်နှုန်း၊ သကြား ၂၅.၈ ရာခိုင်နှုန်း၊ စည်သွပ်ဗူးနှင့် ပြုပြင်ပြီးပင်လယ်စာ ၂၂.၅ ရာခိုင်နှုန်း၊ တိရစ္ဆာန်အစာ ၁၄.၄ ရာခိုင်နှုန်း၊ လတ်ဆတ်၊ အေးခဲနှင့် ပြုပြင်ပြီးကြက်သား ၉.၃ ရာခိုင်နှုန်းအပါအဝင် ထုတ်ကုန်များစွာတွင် တိုးတက်မှုရှိခဲ့ကြောင်း၊ ဆန်၊ ပီလောပီနံထုတ်ကုန်၊ လတ်ဆတ်၊ အေးခဲနှင့် သစ်သီးခြောက်များ၊ အသားနှင့် ပြုပြင်ပြီးအသားတင်ပို့မှုတွင် ကျဆင်းခဲ့ကြောင်း၊ စက်မှုထုတ်ကုန်များဖြစ်သော မော်တော်ယာဉ်များနှင့် ဆက်စပ်ပစ္စည်းများ၊ ကွန်ပျူတာနှင့်ဆက်စပ်ပစ္စည်းများ၊ ကျောက်မျက်နှင့် လက်ဝတ်ရတနာ(ရွှေမပါ)၊ ရာဘာထုတ်ကုန်များ၊ လေအေးပေးစက်နှင့် ဆက်စပ်ပစ္စည်းများ၊ စက်ယန္တရားများနှင့် အီလက်ထရောနစ်ဆားကစ်စ်ပြားများ၏ ပို့ကုန်တွင် ၁၇.၂ ရာခိုင်နှုန်းတိုးတက်မှုရှိခဲ့ကြောင်း ကုန်သွယ်ရေးမူဝါဒနှင့် မဟာဗျူဟာရုံး ညွှန်ကြားရေးမှူးချုပ် Mr. Poonpong Naiyanapakorn က ပြောကြားခဲ့သည်။
အဓိကဈေးကွက်များဖြစ်သော တရုတ်နိုင်ငံတွင် ဝယ်လိုအားမြင့်တက်လာသဖြင့် ထုတ်လုပ်မှုပြန်လည်ကောင်းမွန်လာသောကြောင့် ပို့ကုန်တိုးတက်မှုရှိခဲ့ကြောင်း၊ အခွန်ပြောင်းလဲနိုင်သည့် အလားအလာကြောင့် အမေရိကန်သွင်းကုန်များမြင့်တက်နေစဉ်တွင် တောင်အာရှသည် ထိုင်းကျောက်မျက်နှင့် လက်ဝတ်ရတနာအတွက် ဝယ်လိုအားခိုင်မာခဲ့ကြောင်း၊ ပထမ ၃ လပတ်အတွင်း ပို့ကုန်တိုးတက်မှုသည် အနည်းဆုံး ၁၀ ရာခိုင်နှုန်းရှိမည်ဟု ခန့်မှန်းထားကြောင်း၊ ဒုတိယ ၃ လပတ်တွင် သစ်သီးပို့ကုန်သည် တိုးတက်မှုရှိလာမည်ဟု ခန့်မှန်းထားကြောင်း၊ အမေရိကန်ကုန်သွယ်ရေးမူဝါဒအပြောင်းအလဲများကို ဧပြီလ ၂ ရက်နေ့မှစ၍ စောင့်ကြည့်ရန်ဖြစ်ကြောင်း Mr. Poonpong က ဖြည့်စွက်ပြောကြားခဲ့သည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
