U. A. E

ယူအေအီးနိုင်ငံ၏ငွေကြေးစနစ်ဖြစ်သည့် Dirham အတွက်သင်္ကေတအသစ်ကို မိတ်ဆက်ပြီး ဒစ်ဂျစ်တယ်ငွေကြေးစနစ်ကို တိုးတက်စေရန်ဆောင်ရွက်ပေးခဲ့

Last Updated:

ယူအေအီးနိုင်ငံဗဟိုဘဏ်(CBUAE)သည် ယူအေအီးနိုင်ငံ၏ငွေကြေးစနစ်ဖြစ်သည့် Dirham(AED)အတွက် ကမ္ဘာလုံးဆိုင်ရာဘဏ္ဍာ ရေးအချက်အချာဖြစ်လာမည့် နိုင်ငံ၏ရည်မှန်းချက်ကို အားဖြည့်ပေးသည့် ငွေကြေးသင်္ကေတအသစ်ကို ထုတ်ဖော်ကြေညာခဲ့ပါသည်။

အဆိုပါပဏာမခြေလှမ်းသည် ယူအေအီးနိုင်ငံ၏ဒုတိယသမ္မတနှင့် ဒုတိယဝန်ကြီးချုပ်ဖြစ်သူ H.H Sheikh Mansour bin Zayed Al Nahyan ၏လမ်းညွှန်ချက်များနှင့်ကိုက်ညီပြီး Dirham ငွေကြေးစနစ်အား နိုင်ငံတကာအသိအမှတ်ပြုမှုကိုမြှင့်တင်ရန် ရည်ရွယ်ထားပါသည်။

ယူအေအီးနိုင်ငံ၏အလံအရောင်များအား ထည့်သွင်းထားသော အဆိုပါငွေကြေးသင်္ကေတအသစ်တွင် ငွေကြေးတည်ငြိမ်မှုကိုကိုယ်စားပြုသည့် အလျားလိုက်မျဉ်းနှစ်ကြောင်းပါရှိပါသည်။ ဒစ်ဂျစ်တယ် Dirham အတွက် ထူးခြားသောအဆိုပါမူကွဲတွင် ငွေကြေးစနစ်၏ခေတ်မီဆင့်ကဲပြောင်းလဲမှုကို ထင်ဟပ်ပေါ်လွင်စေသည့် ယူအေအီးနိုင်ငံလုံးဆိုင်ရာအရောင်များနှင့် စက်ဝိုင်းပုံစံဒီဇိုင်းပါရှိပါသည်။

၎င်းအပြင် CBUAE က ၂၀၂၃ ခုနှစ်တွင်စတင်ခဲ့သော ငွေကြေးဆိုင်ရာအခြေခံအဆောက်အအုံ အသွင်ကူးပြောင်းရေး(FIT) အစီအစဉ်၏ အဓိကအစိတ်အပိုင်းဖြစ်သော ဒစ်ဂျစ်တယ် Dirham ၏တိုးတက်မှုကိ ကြေညာခဲ့ပါသည်။ ၂၀၂၅ ခုနှစ်နှောင်းပိုင်းတွင် လက်လီရောင်းချမှုကိုပြုလုပ်နိုင်ရန်အတွက် သတ်မှတ်ထားသော ဒစ်ဂျစ်တယ် Dirham ကိုငွေပေးချေမှုလမ်းကြောင်းများအားလုံးတွင် တရားဝင်လက်ခံဆောင်ရွက်သွားမည်ဖြစ်ပါသည်။ ၂၀၂၃ ခုနှစ် ပြည်ထောင်စုအမိန့်-ဥပဒေအမှတ်(၅၄)အား ကျောထောက် နောက်ခံပြုထားသည့် ၎င်းသည် လုံခြုံပြီးထိရောက်သော blockchain-based ဒစ်ဂျစ်တယ် ငွေပေးချေမှုကိရိယာတစ်ခုအဖြစ် လုပ်ဆောင်သွားမည်ဖြစ်ပါသည်။

ဒစ်ဂျစ်တယ် Dirham သည် ပိုမိုကောင်းမွန်သော ငွေပြန်လည်ဖြစ်လွယ်နိုင်မှုအတွက် တိုကင်ပြုလုပ်ခြင်း၊ အလိုအလျောက်ငွေပေးငွေယူများအတွက် စမတ်ကျသောသဘောတူညီချက်များနှင့် သုံးစွဲသူများ၏ အချက်အလက်များ စသည်တို့ကိုကာကွယ်ရန်အတွက် ခိုင်မာသောလုံခြုံရေးအစီအမံများကဲ့သို့သော အကျိုးကျေးဇူးများကို ပေးဆောင်သွားမည်ဖြစ်ပါသည်။ ၎င်းအားလိုင်စင်ရဘဏ္ဍာရေး အဖွဲ့အစည်းများမှတဆင့် ဝင်ရောက်ကြည့်ရှုနိုင်မည်ဖြစ်ပြီး၊တစ်ဦးချင်းနှင့်စီးပွားရေးလုပ်ငန်းများအတွက် လွယ်ကူချောမွေ့စေသော အရောင်းအဝယ်များကို ဆောင်ရွက်နိုင်မည်ဖြစ်ပါသည်။

ထို့အပြင် CBUAE သည် ငွေပေးချေမှု၊ ငွေလွှဲပြောင်းမှုများနှင့် Redemptions ရွေးနုတ်ခြင်းများအပါအဝင် အမျိုးမျိုးသောဘဏ္ဍာရေးဆိုင်ရာလုပ်ဆောင်မှုများကို လွယ်ကူချောမွေ့စေရန်အတွက် ပေါင်းစပ်ဒစ်ဂျစ်တယ်ပိုက်ဆံအိတ်ကိုတီထွင်ခဲ့ပြီး ယူအေအီးနိုင်ငံ၏ ကြီးထွားလာနေသောဒစ်ဂျစ်တယ်စီးပွားရေးတွင် ပြောင်းလွယ်ပြင်လွယ်နှင့် ဆန်းသစ်တီထွင်မှုများကိုသေချာစေမည့် ထွန်းသစ်စဒစ် ဂျစ်တယ်ငွေကြေးဆိုင်ရာဖြေရှင်းချက်များကို ပံ့ပိုးပေးနိုင်မည့်လမ်းကြောင်းကိုလည်း ပုံစံဖော်ထုတ်ထားပါသည်။

CBUAE ၏မင်းကြီးဖြစ်သူ Khaled Mohamed Balama ကဒစ်ဂျစ်တယ် Dirham သည် ငွေပေး၊ ငွေယူကုန်ကျစရိတ်များကိုလျှော့ချရန်နှင့်ငွေကြေးဆိုင်ရာရာဇ၀တ်မှုများကို တိုက်ဖျက်ရာတွင် ဘဏ္ဍာရေးတည်ငြိမ်မှု၊ ပါဝင်နိုင်မှုနှင့် နိုင်ငံတကာဈေးကွက်ဝင်ရောက်မှုတို့ကိုမြှင့်တင်ပေးသွားမည်ဖြစ်ကြောင်း အလေးပေးပြောကြားခဲ့ပါသည်။

ဤတိုးတက်မှုများနှင့်အတူ ယူအေအီးနိုင်ငံသည် ဘဏ္ဍာရေးဆန်းသစ်တီထွင်မှု၏ရှေ့တန်းတွင် ဆက်လက်ရပ်တည်လျက်ရှိပြီး ကမ္ဘာလုံးဆိုင်ရာဒစ်ဂျစ်တယ်ငွေပေးချေမှုတွင် ဦးဆောင်သူတစ်ဦးအဖြစ် ၎င်း၏အဆင့်အတန်းကို ပိုမိုခိုင်မာစေခဲ့ပါကြောင်း သတင်းဌာနမှ ဖော်ပြထားပါသည်။

Source: Emirates News Agency

(နန္ဒာစိုးမြင့်၊ စီးပွားရေးသံမှူး၊ ဒူဘိုင်းမြို့)

Category: U. A. E