ဥရောပအာရှစီးပွားရေးသမဂ္ဂ(Eurasian Economic Union-EAEU)နှင့် အင်ဒိုနီးရှားနိုင်ငံတို့အကြား လွတ်လပ်သောကုန်သွယ်မှုဇုန်ထူထောင်ရေးသဘောတူညီချက်မူကြမ်းကို လာမည့်နွေရာသီအစတွင် အပြီးသတ်နိုင်မည်ဟု အင်ဒိုနီးရှားနိုင်ငံဆိုင်ရာရုရှားသံအမတ်ကြီး Mr. Sergey Tolchenov က ပြောကြား ခဲ့သည်။

EAEU နှင့် အင်ဒိုနီးရှားတို့အကြား လွတ်လပ်သောကုန်သွယ်ရေးသဘောတူညီချက်(Free Trade Agreements-FTA)ကို တတ်နိုင်သမျှအမြန်ဆုံးလက်မှတ်ရေးထိုးနိုင်မည်ဟု မော်စကိုက မျှော်လင့်ထားပြီး အခြား EAEU အဖွဲ့ဝင်များ(အာမေးနီးယား၊ ဘီလာရုစ်၊ ကာဇက်စတန်၊ ကာဂျစ္စတန်)သည် FTA စာရွက်စာတမ်းများ၏စာသားပေါ်တွင် လုပ်ငန်းများဆောင်ရွက်နေဆဲဖြစ်ကြောင်း ရုရှားသံအမတ်ကြီးက မှတ်ချက်ပြုသည်။

FTA သည် ရုရှားနှင့် အင်ဒိုနီးရှားတို့အကြား သဘောတူညီချက်မဟုတ်ဘဲ EAEU အဖွဲ့ဝင်အားလုံးပါဝင်ကြောင်း၊ ယင်းကြောင့် နိုင်ငံများ၏အကြီးအကဲ(EAEU နှင့် အင်ဒိုနီးရှား) (၆)နိုင်ငံစလုံးက လက်မှတ်ရေးထိုးရမည်ဖြစ်ကြောင်း၊ EAEU အဖွဲ့ဝင်နိုင်ငံများနှင့် အင်ဒိုနီးရှားတို့သည် ဇွန်လမတိုင်ခင်တွင် အပြီးသတ်ညှိနှိုင်းဆွေးနွေးနိုင်ပါက ခေါင်းဆောင်(၆)ဦးသည် မော်စကိုတွင် အတူတကွလက်မှတ်ရေးထိုးနိုင်မည်ဖြစ်ကြောင်း ရုရှားသံအမတ်ကြီးက ပြောကြားခဲ့သည်။

အင်ဒိုနီးရှားနိုင်ငံသမ္မတသည် ဇွန်လတွင် ရုရှားနိုင်ငံသို့ နိုင်ငံတော်ခရီးစဉ်သွားရောက်ရန်ရှိပြီး EAEU နှင့် FTA သဘောတူညီချက်ကို လက်မှတ်ရေးထိုးရန်ရည်ရွယ်ထားကြောင်း အင်ဒိုနီးရှားနိုင်ငံ၏ စီးပွားရေးရာ ညှိနှိုင်းရေးဝန်ကြီး Mr. Airlangga Hartarto က ပြောကြားခဲ့သည်။

EAEU နှင့် အီရန်နိုင်ငံတို့အကြား FTA သဘောတူညီချက်သည် မေလ ၁၅ ရက်နေ့တွင် စတင်အသက်ဝင်မည်ဖြစ်ကြောင်း Eurasian Economic Commission က ကြေညာထားသည်။

ယင်းအပြင် EAEU နှင့် UAE နိုင်ငံတို့အကြား FTA သဘောတူညီချက်ကို ယခုနှစ်တွင် လက်မှတ်ရေးထိုးနိုင်မည်ဟု ရုရှားပထမဒုတိယဝန်ကြီးချုပ် Mr. Denis Manturov က အစောပိုင်းတွင် ပြောကြားခဲ့သည်။

Source :       https://tass.com/economy/1931343

(ခွန်မျိုးသူ၊ စီးပွားရေးသံမှူး၊ မော်စကိုမြို့)