ဗီယက်နမ်နိုင်ငံအစိုးရ၏ ဆုံးဖြတ်ချက်အမှတ် 44/NQ-CP အရ ဂျာမနီ၊ ပြင်သစ်၊ အီတလီ၊ စပိန်၊ ဗြိတိန်၊ ရုရှား၊ ဂျပန်၊ တောင်ကိုရီးယား၊ ဒိန်းမတ်၊ ဆွီဒင်၊ နော်ဝေနှင့် ဖင်လန်နိုင်ငံ နိုင်ငံသားများအား ၂၀၂၅ ခုနှစ် မတ်လ ၁၅ ရက်မှ ၂၀၂၈ ခုနှစ် မတ်လ ၁၄ ရက်နေ့အထိ ဗီဇာကင်းလွတ်ခွင့်ပေးသွားမည်ဖြစ်ကြောင်း VN Economy အွန်လိုင်းသတင်းဖော်ပြချက်အရ သိရှိရပါသည်။
အဆိုပါဆုံးဖြတ်ချက်အရ ဗီယက်နမ်နိုင်ငံ၏ ဥပဒေသတ်မှတ်ချက်နှင့် ဝင်ခွင့်လိုအပ်ချက်ကိုက်ညီမှုအပေါ်အခြေခံ၍ နိုင်ငံကူးလက်မှတ်အမျိုးအစားနှင့် ရည်ရွယ်ချက်မခွဲခြားဘဲ ဝင်ရောက်သည့်နေ့ရက်မှ ၄၅ ရက်အထိ ယာယီနေထိုင်ခွင့်ဗီဇာကင်းလွတ်ခွင့်ပေးသွားမည်ဖြစ်ပါသည်။
ဆုံးဖြတ်ချက်အသစ်တွင် ဗီဇာကင်းလွတ်ခွင့်မူဝါဒကို ဗီယက်နမ်နိုင်ငံ၏ဥပဒေများနှင့်အညီ သက်တမ်းတိုးနိုင်သည်ဟု ဖော်ပြထားကာ အဆိုပါဆုံးဖြတ်ချက်ကို တစ်ဖက်သတ်ချမှတ်ခဲ့ခြင်းဖြစ်ပါသည်။
အစောပိုင်းတွင် ၂၀၂၂ ခုနှစ် မတ်လ ၁၅ ရက်နေ့က ထုတ်ပြန်သည့် ဆုံးဖြတ်ချက်အမှတ် 32/NQ-CP နှင့် ၂၀၂၃ ခုနှစ် ဩဂုတ်လ ၁၄ ရက်နေ့က ထုတ်ပြန်ခဲ့သည့် ဆုံးဖြတ်ချက်အမှတ် 128/NQ-CP တို့အရ အထက်ဖော်ပြပါနိုင်ငံ ၁၂ နိုင်ငံအပါအဝင် နိုင်ငံပေါင်း ၁၃ နိုင်ငံမှ နိုင်ငံသားများသည် ဗီဇာမလိုဘဲ ဗီယက်နမ်နိုင်ငံသို့ သွားရောက်နိုင်ကြောင်း သိရှိရပါသည်။
၂၀၂၅ ခုနှစ် ဇန်နဝါရီလ ၁၅ ရက်နေ့ ရက်စွဲပါဆုံးဖြတ်ချက်အမှတ် 11/NQ-CP အရ ဗီယက်နမ်အစိုးရသည် ပိုလန်၊ ချက်သမ္မတနိုင်ငံနှင့် ဆွစ်ဇာလန်နိုင်ငံတို့မှ ခရီးသွားများကို မတ်လ ၁ ရက်မှ ဒီဇင်ဘာ ၃၀ အထိ ဗီဇာကင်းလွတ်ခွင့်မူဝါဒကို ကျင့်သုံးရန် ဆုံးဖြတ်ခဲ့ပါသည်။
ဗီယက်နမ်နိုင်ငံ၏ တိုးတက်လာသောဗီဇာမူဝါဒများနှင့် ခရီးသွားလုပ်ငန်းမြှင့်တင်ရေးအစီအစဉ်များသည် နိုင်ငံအတွင်း ခရီးသွားဧည့်သည်များပိုမိုဝင်ရောက်လာစေရန် အထောက်အကူဖြစ်စေပါသည်။ ၂၀၂၄ ခုနှစ်တွင် ဗီယက်နမ်နိုင်ငံသို့ နိုင်ငံခြားခရီးသွားဧည့်သည် ၁၇.၅ သန်း လာရောက်လည်ပတ်ခဲ့ကြောင်း ဖော်ပြထားပါသည်။
၂၀၂၅ ခုနှစ် ပထမ ၂ လတွင် ဗီယက်နမ်နိုင်ငံသို့ နိုင်ငံတကာခရီးသွားဧည့်သည် ၄ သန်းနီးပါးလာရောက်ခဲ့ပြီး တစ်နှစ်ထက်တစ်နှစ် ၃၀.၂ ရာခိုင်နှုန်းတိုးမြင့်လာကြောင်း၊ တရုတ်နိုင်ငံသည် ဗီယက်နမ်နိုင်ငံ၏ အကြီးဆုံးခရီးသွားရင်းမြစ်ဖြစ်ပြီး ခရီးသွားဧည့်သည် ၉၅၆,၀၀၀ ရှိကြောင်း၊ တောင်ကိုရီးယားနိုင်ငံမှ ဒုတိယနေရာတွင်ရှိပြီး စုစုပေါင်းခရီးသွားဧည့်သည် ၈၈၅,၀၀၀ ရှိကြောင်း၊ ၎င်းတို့နောက်တွင် ထိုင်ဝမ်၊ အမေရိကန်၊ ဂျပန်၊ ကမ္ဘောဒီးယား၊ မလေးရှား၊ အိန္ဒိယနှင့် ရုရှားတို့လိုက်ပါလျက်ရှိကြောင်း ဖော်ပြထားပါသည်။
ဗီယက်နမ်နိုင်ငံသည် ယခုနှစ်အတွင်း နိုင်ငံတကာခရီးသွားဧည့်သည် ၂၂ သန်းမှ ၂၃ သန်းအထိ ဆွဲဆောင်နိုင်ရန် ရည်မှန်းထားပြီး ကိုဗစ် ၁၉ ကူးစက်ရောဂါမတိုင်မီအဆင့်များထက် ကျော်လွန်နေကြောင်း သိရှိရပါသည်။
Source: VN Economy
(ဝင့်နန္ဒာကျော်ကျော်၊ စီးပွားရေးသံမှူး၊ ဟနွိုင်းမြို့)
