ထိုင်းနိုင်ငံ၌ ယခုနှစ်အတွင်း ဒူးရင်းသီးထွက်ရှိမှုမြင့်တက်လာနိုင်ပြီး ဈေးနှုန်းကျဆင်းနိုင်သည်ဟု ဒူးရင်းသီးကုန်သည်များနှင့် ပို့ကုန်လုပ်ငန်းရှင်များက ခန့်မှန်းထားကြောင်း သိရှိရပါသည်။
ယခုနှစ်အတွင်း ဧပြီလတွင် စတင်ခူးဆွတ်မည့် ထိုင်းနိုင်ငံအရှေ့ပိုင်းမှ ဒူးရင်းသီးထွက်ရှိမှုသည် ၂၀ ရာခိုင်နှုန်းမြင့်တက်နိုင်ပြီး တန်ချိန် ၈၀၀,၀၀၀ ထိရောက်ရှိနိုင်သဖြင့် ဈေးနှုန်းသည် ယခင်နှစ်နှင့်နှိုင်းယှဉ်ပါက ကျဆင်းနိုင်ကြောင်း၊ ဒူးရင်းသီးဈေးနှုန်းသည် သက်သာနိုင်သဖြင့် စားသုံးသူများအတွက် အကျိုးရှိနိုင်ကြောင်း၊ ဈေးနှုန်းသည် ကာလတစ်ခုအထိကျဆင်းနေပါက တောင်သူများသည် သေချာစွာရွေးချယ်ဆွတ်ခူးပြီး ဈေးနှုန်းပြန်လည်မြင့်တက်လာချိန်၌ ၎င်းတို့၏ဒူးရင်းသီးများကို ရောင်းချနိုင်ကြောင်း၊ ယင်းဗျူဟာသည် စားသုံးသူများတွင် မမှည့်သေးသည့်အသီးများကို ရရှိခဲ့သော ယခင်နှစ်က ကြုံတွေ့ခဲ့ရသည့် အကြပ်အတည်းပုံစံဖြင့် ကတိုက်ကရိုက်ရောင်းချသည့်ပုံစံကိုရှောင်ရှားနိုင်သဖြင့် စားသုံးသူများသည် ပြည့်ပြည့်ဝဝရင့်မှည့်သည့်သစ်သီးများကို စားသုံးနိုင်မည်ဖြစ်ကြောင်း ထိုင်းလတ်ဆတ်သစ်သီးကုန်သည်များနှင့် ပို့ကုန်လုပ်ငန်းရှင်များအသင်း ဥက္ကဋ္ဌဟောင်း Mr. Paiboon Wongcho-tesathit က ပြောကြားခဲ့သည်။
ထို့ပြင် ကုန်သည်များနှင့် ပို့ကုန်လုပ်ငန်းရှင်များက Basic Yellow(BY2) ဆိုးဆေး၏ လက်ရှိပြဿနာရပ်အပေါ် ဖြေရှင်းပေးရန်နှင့် ပို့ကုန်ဈေးကွက်သစ်များရှာဖွေပေးရန် အစိုးရကို တောင်းဆိုထားပါကြောင်း၊ ဒူးရင်းသီးများ၏ အရောင်အဆင်းကို မြှင့်တင်ရန် BY2 ဆိုးဆေးအသုံးပြုခြင်းသည် လက်ရှိတွင် အဓိကစိုးရိမ်စရာဖြစ်နေပါကြောင်း၊ တရုတ်အစိုးရ၏ အစားအစာနှင့်အသီးများတွင် အန္တရာယ်ရှိသော ဓာတ်ကြွင်းများကို တားမြစ်ထားခြင်းနှင့် အစားအစာလုံခြုံစိတ်ချရမှုဆိုင်ရာ လုပ်ထုံးလုပ်နည်းတင်းကြပ်လာမှုတို့ကြောင့် အဆိုပါပြဿနာသည် အရေးကြီးပါကြောင်း၊ ပြဿနာကို မဖြေရှင်းနိုင်ပါက ထိုင်းနိုင်ငံအနေဖြင့် ဒူးရင်းသီးများတင်ပို့နိုင်မည်မဟုတ်ကြောင်း၊ ထိုင်းနိုင်ငံအနေဖြင့် လူဦးရေများပြားပြီး ဒူးရင်းသီးဝယ်လိုအား မြင့်တက်လာလျက်ရှိသည့် အရှေ့အလယ်ပိုင်းနှင့် အိန္ဒိယကဲ့သို့သော ဈေးကွက်သစ်များကို ရှာဖွေသင့်ကြောင်း အသင်းဥက္ကဋ္ဌ Mr. Sanchai Puranachaikiri က ဖြည့်စွက်ပြောကြားခဲ့သည်။
အရည်အသွေးမြင့် ဒူးရင်းသီးများသည် အဝါရောင်ဖြစ်ရမည်ဟု တရုတ်စားသုံးသူများအကြား မှားယွင်းသတ်မှတ်ချက်သည် အဝါရောင်ဆိုးဆေးအသုံးပြုမှုကို ဖြစ်စေပါကြောင်း၊ အမြင့်စားဒူးရင်းသီးများသည် သဘာဝအစိမ်းရောင်ရှိသင့်သည်ဟူသောအချက်ကို Influencers များမှတစ်ဆင့် ရှင်းလင်းရန် အစိုးရအနေဖြင့် ဆောင်ရွက်နိုင်ကြောင်း၊ တရုတ်နိုင်ငံ၌ အွန်လိုင်းဖြင့် ရောင်းချသည့်ဗျူဟာ ကျရှုံးရခြင်းမှာ ဒူးရင်းသီးဝယ်ယူသူများသည် မျှော်မှန်းထားသည်နှင့်လွဲချော်မှုအပေါ် မကျေနပ်မှုကြောင့် ဖြစ်ကြောင်း Mr. Paiboon က အကြံပြုပြောကြားခဲ့သည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
