ထိုင်းဒူးရင်းသီးများတွင် Basic Yellow 2(BY2) ဆိုးဆေးကဲ့သို့သောဓာတုဓာတ်ကြွင်းများ ၁၀၀ ရာခိုင်နှုန်းကင်းစင်သဖြင့် ယခုနှစ်အတွင်း ကမ္ဘာ့ဈေးကွက်များဖြစ်သည့် တရုတ်၊ အမေရိကန်၊ ဥရောပသမဂ္ဂနှင့် အိန္ဒိယနိုင်ငံများသို့ ဒူးရင်းသီးတန်ချိန် ၉၅၀,၀၀၀ တင်ပို့သွားရန် မျှော်မှန်းထားကြောင်း သိရှိရပါသည်။
ထိုင်းဒူးရင်းသီးပို့ကုန်များတွင် ဓာတုဓာတ်ကြွင်းများကင်းစင်သွားပြီဖြစ်ကြောင်း၊ ဓာတုပစ္စည်းအသုံးပြုမှုပြဿနာကြောင့် ထိုင်းဒူးရင်းသီးအပေါ် တရုတ်စားသုံးသူများ၏ ယုံကြည်မှုပျောက်ဆုံးခဲ့ပါကြောင်း၊ ယခင်နှစ်က Cadmium နှင့်စပ်လျဉ်းသည့် စိုးရိမ်မှုပေါ်ပေါက်ခဲ့သောကြောင့် ၂၀၂၅ ခုနှစ် သစ်သီးစီမံခန့်ခွဲမှုမဟာဗျူဟာတွင် အရည်အသွေးထိန်းချုပ်မှုနှင့် ဓာတုဓာတ်ကြွင်းကာကွယ်မှုကို ဦးစားပေးသည့်အစီအမံ ၇ ခု ပါဝင်ပါကြောင်း၊ ချန်းသာပုရိပြည်နယ်အာဏာပိုင်များက ခိုင်မာသောသန့်ရှင်းရေးနှင့် ဓာတ်ကြွင်းကင်းစင်သော ဒူးရင်းသီးဖြစ်စေရေးစစ်ဆေးမှုများကို ဆောင်ရွက်လျက်ရှိကြောင်း၊ ကမ္ဘာ့ဈေးကွက်ယုံကြည်မှုကိုမြှင့်တင်ရန်အတွက် ဝန်ကြီးဌာနနှင့်တရုတ်သံရုံးတို့ပူးပေါင်း၍ မြေပြင်စစ်ဆေးမှုများဆောင်ရွက်နိုင်ရေးအတွက် စီးပွားရေးနှင့် ကူးသန်းရောင်းဝယ်ရေးဝန်ကြီးသည် ပြည်နယ်အုပ်ချုပ်ရေးမှူးနှင့် သက်ဆိုင်ရာအဖွဲ့အစည်းများနှင့် တွေ့ဆုံခဲ့ကြောင်း သိရှိရပါသည်။
ဝန်ကြီးသည် တရုတ်သံရုံး သံမှူးကြီးနှင့်တွေ့ဆုံစဉ်၌ ထိုင်းနိုင်ငံ၏ တင်းကျပ်သော စစ်ဆေးရေးလုပ်ငန်းစဉ်များကို အလေးထားပြောကြားခဲ့ပြီး တရုတ်၏ သွင်းကုန်စစ်ဆေးမှုများတွင် အလုံးစုံစစ်ဆေးမှုများထက် ကျပန်းစစ်ဆေးမှုကို ဆောင်ရွက်ပေးရန် မေတ္တာရပ်ခံခဲ့ကြောင်း၊ ယင်းသို့တောင်းဆိုခဲ့ခြင်းမှာ နှောင့်နှေးမှုနှင့် ဒူးရင်းသီးပို့ကုန်များပုပ်သိုးမှုကို ကာကွယ်ရန်ဖြစ်ကြောင်း၊ လွန်ခဲ့သောလက ဓာတ်ကြွင်းပြဿနာအတွက် ပြဿနာများမရှိခဲ့သဖြင့် တရုတ်ကလည်း ထိုင်းဒူးရင်းသီးများအပေါ် စစ်ဆေးမှုများကို စတင်ဖြေလျှော့ပေးသွားမည်ဖြစ်ကြောင်း၊ ပိုမိုသေချာသည့် သက်သေပြချက်အဖြစ် တရုတ်အရာရှိများကို ချန်းသာပုရိသို့ လာရောက်ရန် ဖိတ်ကြားခဲ့ကြောင်း သိရှိရပါသည်။
မေလတွင် ဒူးရင်းသီးထွက်ရှိမှုသည် တန်ချိန် ၁.၇၆ သန်းဖြင့် ၃၇ ရာခိုင်နှုန်းမြင့်တက်လာနိုင်သည်ဟု ခန့်မှန်းထားလျက်ရှိရာ ပို့ကုန်လမ်းကြောင်းကို ဝန်ကြီးဌာနက စောင့်ကြည့်လျက်ရှိကြောင်း၊ မဟာဗျူဟာတွင် ပြည်တွင်း၊ ပြည်ပဈေးကွက်တိုးချဲ့ခြင်း၊ ထောက်ပံ့မှုကွင်းဆက်တိုးတက်ခြင်းနှင့် စည်းကမ်းထိန်းချုပ်ခြင်းတို့ပါဝင်ပါကြောင်း၊ ထိုင်းသစ်သီးပို့ကုန်များကို အမေရိကန်၊ ဥရောပသမဂ္ဂနှင့် အိန္ဒိယသို့ တိုးချဲ့တင်ပို့နိုင်ရေး ဆောင်ရွက်လျက်ရှိပါကြောင်း၊ ထိုင်းဒူးရင်းသီးများအတွက် Geographical Indication(GI)အသိအမှတ်ပြုနိုင်ရေး တွန်းအားပေးဆောင်ရွက်လျက်ရှိကြောင်း သိရှိရပါသည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
