စင်ကာပူနိုင်ငံသည် ပင်လယ်ရေကြောင်းဆိုင်ရာလုပ်ငန်းများကို တိုးတက်စေခြင်း၊ ဒေသတွင်းနှင့် ကမ္ဘာ့စီးပွားရေးလုပ်ငန်းများ၏ အဓိကအချက်အချာနေရာဖြစ်စေရေး ကြိုးစားဆောင်ရွက်ခြင်း၊ နိုင်ငံတကာနှင့် ပူးပေါင်းဆောင်ရွက်မှုကို ထောက်ခံအားပေးခြင်းတို့ကို ယခင်ကထက်ပို၍ ဆောင်ရွက်သွားမည်ဖြစ်ကြောင်း ၂၀၂၅ ခုနှစ်၊ မတ်လ ၂၄ ရက်တွင် ပြုလုပ်ခဲ့သည့် Singapore Maritime Week 2025 ဖွင့်ပွဲတွင် ဝါရင့်ဝန်ကြီး Lee Hsien Loong က ပြောကြားခဲ့ပါသည်။

Mr. Lee Hsien Loong က “ပထဝီနိုင်ငံရေးတင်းမာမှုများနှင့် ရာသီဥတုပြောင်းလဲမှုများသည် ကမ္ဘာ့ကုန်သွယ်ရေးစနစ်အပေါ်ဖိအားကြောင့် ကမ္ဘာ့ပင်လယ်ရေကြောင်းကဏ္ဍအတွက် အကြပ်အတည်းများဖြစ်စေကြောင်း” သတိပေးပြောကြားခဲ့ပါသည်။ “ကမ္ဘာ့စီးပွားရေးအင်အားကြီးနိုင်ငံများအကြား ဆက်ဆံရေးတင်းမာမှုများ၊ ကိုယ်ကျိုးစီးပွားကာကွယ်မှုများသည် ကမ္ဘာ့စီးပွား‌ရေးအတွက် အပြုသဘောမဆောင်သည့်အချက်များဖြစ်ကြောင်း၊ ရာသီဥတုပြောင်းလဲမှုသည် ကမ္ဘာ့ကုန်သွယ်ရေးအပေါ် သက်ရောက်မှုရှိကြောင်း၊ ပြင်းထန်သည့်ရာသီဥတုကြောင့် ကုန်သွယ်ရေးလမ်းကြောင်းများအပေါ် သက်ရောက်စေကြောင်း၊ ပင်လယ်ရေကြောင်းကဏ္ဍတွင် ကာဗွန်ထုတ်လွှတ်မှုမရှိစေရေးသတ်မှတ်ချက်သည် ကုန်သွယ်ရေးလမ်းကြောင်းများနှင့် ကုန်စည်ထောက်ပံ့ရေးကွင်းဆက်များကို ပြန်လည်ချိန်ညှိမှုများဖြစ်ပေါ်စေကြောင်း၊ ထိုသို့သော ကုန်သွယ်ရေးအကြပ်အတည်းများရှိသော်လည်း ကမ္ဘာ့နိုင်ငံများသည် ကုန်သွယ်ရေးကိုလိုအပ်လျက်ရှိပြီး တစ်နိုင်ငံနှင့်တစ်နိုင်ငံ စီးပွားရေးပူးပေါင်းဆောင်ရွက်မှုများ ဆောင်ရွက်ရန် လိုအပ်လျက်ရှိကြောင်း” ပြောကြားခဲ့ပါသည်။

အာဆီယံနှင့်စပ်လျဉ်း၍ အာဆီယံနိုင်ငံများအချင်းချင်း ကုန်သွယ်မှုတိုးတက်ရေးအတွက် အခွင့်အလမ်းများရှိနေကြောင်း၊ အမေရိကန်နိုင်ငံနှင့် တရုတ်နိုင်ငံအကြား ကုန်သွယ်ရေးတင်းမာမှု၏ သက်ရောက်မှုများမှ ကာကွယ်ရန် အာဆီယံနိုင်ငံများအနေဖြင့် အာဆီယံအဖွဲ့ဝင်နိုင်ငံမဟုတ်သည့် နိုင်ငံများနှင့် လွတ်လပ်သောကုန်သွယ်မှုသဘောတူစာချုပ်များချုပ်ဆို၍ စာချုပ်အသက်ဝင်ရေးကို ဆောင်ရွက်ရန် Mr. Lee Hsien Loong က အကြံပြုခဲ့ပါသည်။

စင်ကာပူနိုင်ငံနှင့်စပ်လျဉ်း၍ “စင်ကာပူနိုင်ငံအတွက် ကုန်သွယ်ရေးမှာ မရှိမဖြစ်အရေးပါကြောင်း၊ ပင်လယ်ရေကြောင်းကဏ္ဍသည် စင်ကာပူနိုင်ငံ၏ စီးပွားရေးတွင် အဓိကကျသည့်ကဏ္ဍဖြစ်ကြောင်း၊ ပင်လယ်ရေကြောင်းကဏ္ဍမှ စုစုပေါင်းပြည်တွင်းအသားတင်ထုတ်လုပ်မှု၏ ၆ ရာခိုင်နှုန်းကျော်ရှိပြီး အလုပ်အကိုင်ပေါင်း ၁၄၀,၀၀၀ ဖန်တီးပေးနိုင်ကြောင်း၊ ကုန်သွယ်ရေးကို ထောက်ပံ့ကူညီရန်အတွက် စင်ကာပူနိုင်ငံအနေဖြင့် နိုင်ငံတကာနှင့်ပူးပေါင်းဆောင်ရွက်မှု၊ သဘောတူစာချုပ်များမှတစ်ဆင့် နိုင်ငံများအချင်းချင်း အပြန်အလှန်မှီခိုမှုတို့ကို တိုးမြှင့်ဆောင်ရွက်မည်ဖြစ်ကြောင်း၊ ဆိပ်ကမ်းတွင် ကုန်စည်ရှင်းလင်းရေးကိစ္စရပ်များ လျင်မြန်ချောမွေ့စေရန်နှင့် စက်သုံးဆီအသစ်များရရှိမှုနှင့် အသုံးချနိုင်မှုတိုးမြှင့်ရန်၊ ဘုံစံနှုန်းများသတ်မှတ်နိုင်ရန် နိုင်ငံများ၊ ဆိပ်ကမ်းများနှင့်ပူးပေါင်း၍ အစိမ်းရောင်နှင့် ဒီဂျစ်တယ်ပင်လယ်ရေကြောင်းသယ်ယူပို့ဆောင်ရေးစင်္ကြံကို ဆောင်ရွက်လျက်ရှိကြောင်း၊ အခြေခံအဆောက် အအုံ၊ နည်းပညာနှင့် တီထွင်ဆန်းသစ်မှုတို့တွင် ရင်းနှီးမြှုပ်နှံမှုများပြုလုပ်၍ ပင်လယ်ရေကြောင်းကဏ္ဍ ပိုမိုအားကောင်းစေရေး ဆောင်ရွက်သွားမည်ဖြစ်ကြောင်း” ပြောကြားခဲ့ပါသည်။

စင်ကာပူနိုင်ငံသည် ကုန်သွယ်ရေး၏ ၉၀ ရာခိုင်နှုန်းကို လွှမ်းခြုံမှုရှိသည့် လွတ်လပ်သော ကုန်သွယ်ရေးသဘောတူစာချုပ် ၂၇ ခုကို ချုပ်ဆိုပါသည်။ အဆိုပါစာချုပ်များသည် စင်ကာပူနိုင်ငံ၏ကုန်သွယ်ရေးအချက်အချာနေရာဖြစ်မှုကို ပိုမိုအားကောင်းစေပြီး စီးပွား ရေးတိုးတက်မှုကို အထောက်အကူဖြစ်စေပါသည်။ မကြာသေးမီက စင်ကာပူနိုင်ငံသည် ချီလီနိုင်ငံ၊ ကိုလံဘီယာနိုင်ငံ၊ မက်ဆီကိုနိုင်ငံနှင့် ပီရူးနိုင်ငံတို့ပါဝင်သည့် Pacific Alliance-Singapore FTA နှင့် အာဂျင်တီးနားနိုင်ငံ၊ ဘရာဇီးနိုင်ငံ၊ ပါရာကွေးနိုင်ငံ၊ ဥရုကွေးနိုင်ငံတို့ပါဝင်သည့် Mercosur-Singapore FTA တို့ကို လက်မှတ်ရေးထိုးခဲ့ပါသည်။

စင်ကာပူနိုင်ငံသည် လွတ်လပ်သောကုန်သွယ်ရေးသဘောတူစာချုပ်များကို ဆက်လက်ချုပ်ဆို၍ ၎င်း၏ကုန်သွယ်ရေးကွန်ရက်ကို ချဲ့ထွင်သွားရန် အစီအစဉ်ရှိကြောင်းနှင့် စီးပွားရေးဖွံ့ဖြိုးတိုးတက်ရေးအတွက် ပင်လယ်ရေကြောင်းကဏ္ဍကိုအသုံးချ၍ ၎င်းကဏ္ဍဖွံ့ဖြိုးတိုးတက်ရေးကို အလေးပေးဆောင်ရွက် သွားမည်ဖြစ်ပါသည်။

ရင်းမြစ်။        The Business Times

(သွယ်သွယ်ဆုတင်၊ စီးပွားရေးသံမှူး၊ စင်ကာပူမြို့)