အင်ဒိုနီးရှား Oleochemical ထုတ်လုပ်သူများအသင်း(Association of Indonesian Oleochemical Producers)က အင်ဒိုနီးရှားနိုင်ငံ၏ Oleochemical ထုတ်ကုန်များတင်ပို့မှုသည် လွန်ခဲ့သည့်နှစ်များအတွင်း ဆက်တိုက်တိုးတက်ခဲ့ကြောင်း၊ သို့သော် အိန္ဒိယနိုင်ငံက fatty-alcohol အပေါ် အစိုးရ၏ထောက်ပံ့မှုတားဆီးရေးမူဝါဒကို ချမှတ်လိုက်ပြီး အီးယူကလည်း fatty acid နှင့်စပ်လျဉ်း၍ စုပုံတင်သွင်းမှုတားဆီးရေးမူဝါဒ(anti-dumping policy)ချမှတ်သောကြောင့် ကမ္ဘာ့ဈေးကွက်တွင် စိန်ခေါ်မှုများနှင့် ကြုံတွေ့နေရကြောင်း တင်ပြထားမှုကို အင်ဒိုနီးရှားစားအုန်းဆီများအသင်းက သတင်းထုတ်ပြန်ခဲ့ပါသည်။
အင်ဒိုနီးရှား Oleochemical ထုတ်လုပ်သူများအသင်း၏အထွေထွေအတွင်းရေးမှူး Rapolo Hutabarat က “စုပုံတင်သွင်းမှုတားဆီးရေးမူဝါဒ(anti-dumping policy)ကြောင့် အင်ဒိုနီးရှားဆီအုန်းလုပ်ငန်းများကို သိသိသာသာသက်ရောက်မှုရှိကြောင်း၊ အင်ဒိုနီးရှား Oleochemical ထုတ်လုပ်သူများအသင်းဝင်များအားလုံးသည် fatty acid တင်ပို့မှုကို ရပ်ဆိုင်းရန်ဆုံးဖြတ်ခဲ့ကြောင်း၊ အီးယူသို့ တင်ပို့မှုစာရင်းကို အင်ဒိုနီးရှားစာရင်းအင်းဌာနမှ ထုတ်ပြန်ပါက ၎င်းစာရင်းမှာ အခြားအစီအစဉ်မှရရှိသည့်စာရင်းဖြစ်ပြီး တိုက်ရိုက်တင်ပို့မှုစာရင်းမဟုတ်ကြောင်း၊ အင်ဒိုနီးရှား Oleochemical ထုတ်လုပ်သူများအသင်းအနေဖြင့် အီးယူ၏မူဝါဒကြောင့် ကုန်သွယ်ရေးထိခိုက်မှုရှိကြောင်း ကမ္ဘာ့ကုန်သွယ်ရေးအဖွဲ့သို့ စွဲချက်တင်ပြထားကြောင်း၊ ကုန်သွယ်ရေးဝန်ကြီးဌာန၊ စက်မှုဝန်ကြီးဌာန၊ နိုင်ငံခြား ရေးဝန်ကြီးဌာနတို့နှင့် ညှိနှိုင်းဆောင်ရွက်ခဲ့ကြောင်း၊ လက်ရှိအခြေအနေမှာ ခုံရုံးဖွဲ့သည့်အဆင့်ဖြစ်ကြောင်း၊ အငြင်းပွားသည့်နိုင်ငံများက ခုံရုံးအဖွဲ့ဝင်အနည်းဆုံး ၆ ဦးတင်ပြရမည်ဖြစ်ပြီး ယင်းအနက် ၃ ဦးကို ရွေးချယ်မည်ဖြစ်ကြောင်း၊ ၎င်း ၃ ဦးမှာ ၁ ဦးသည် ဥက္ကဋ္ဌဖြစ်ပြီး ကျန် ၁ ဦးစီမှာ အဖွဲ့ဝင်ဖြစ်ကြောင်း၊ အိန္ဒိယနိုင်ငံ၏ fatty alcohol နှင့်စပ်လျဉ်းသည့်မူဝါဒကြောင့် အင်ဒိုနီးရှားထုတ်လုပ်သူများအခက်အခဲတွေ့ကြောင်း၊ အင်ဒိုနီးရှား Oleochemical ထုတ်လုပ်သူများအသင်းဝင်ကုမ္ပဏီ ၄ ခုမှာ အိန္ဒိယနိုင်ငံသို့ fatty alcohol တင်ပို့နေကြောင်း၊ ကုန်သွယ်ရေးဝန်ကြီးဌာနနှင့်ပူးပေါင်း၍ အဆိုပါကုန်သွယ်ရေးအတားအဆီးကို ဖြေရှင်းရန်နည်းလမ်းရှာဖွေသွားမည်ဖြစ်ကြောင်း” ပြောကြားခဲ့ပါသည်။
ပို့ကုန်ပမာဏအရ အလှအပနှင့်ဆေးဝါးထုတ်လုပ်မှုအတွက် အသုံးပြုသည့် Oleochemical ၏တင်ပို့မှုအခြေအနေမှာ ကောင်းမွန်ကြောင်း Rapolo ပြောကြားခဲ့ပါသည်။ ၂၀၂၂ ခုနှစ်တွင် Oleochemical တင်ပို့မှုမှာ တန်ချိန် ၄.၂ သန်းနှင့် တန်ဖိုးအမေရိကန်ဒေါ်လာ ၅.၄ ဘီလီယံ၊၂၀၂၃ ခုနှစ်တွင် တင်ပို့မှုမှာ တန်ချိန် ၄.၆ သန်းနှင့်တန်ဖိုး အမေရိကန်ဒေါ်လာ ၃.၇ ဘီလီယံ၊ ၂၀၂၄ ခုနှစ်တွင် တင်ပို့မှုမှာ တန်ချိန် ၄.၈ သန်းနှင့် တန်ဖိုးအမေရိကန်ဒေါ်လာ ၄.၃ ဘီလီယံဖြစ်ပါသည်။
အင်ဒိုနီးရှားနိုင်ငံ၏ fatty acid တင်ပို့မှုကို ရပ်ဆိုင်းရန်ဆုံးဖြတ်ချက်ကြောင့် ကမ္ဘာ့ဈေးကွက်တွင် ကုန်စည်ရရှိနိုင်မှုအပေါ် သက်ရောက်မှုရှိလာနိုင်ပါသည်။
ရင်းမြစ်။ Indonesian Palm Oil Association
(သွယ်သွယ်ဆုတင်၊ စီးပွားရေးသံမှူး၊ စင်ကာပူမြို့)
