ထိုင်းနိုင်ငံ၏ အကြီးဆုံးစိုက်ပျိုးရေးလုပ်ငန်းစုတစ်ခုဖြစ်သည့် Charoen Pokphand (CP) က နယ်စပ်ဖြတ်ကျော် မီးခိုးပြဿနာကို ဖြေရှင်းရာတွင် အကူအညီပေးသည့်အနေဖြင့် သီးနှံများရိတ်သိမ်း ပြီးနောက် မီးရှို့သည့် စိုက်ပျိုးနေရာများမှ ပြောင်းဝယ်ယူခြင်းကို ဆန့်ကျင်သည့် ၎င်း၏ ရပ်တည်ချက် ကို ပြသခဲ့ကြောင်း သိရှိရပါသည်။

CP က မီးရှို့မြေယာ မည်သည့်နေရာတွင်စိုက်ပျိုးသည့် သီးနှံများကို ထောက်ပံ့ခြင်း သို့မဟုတ် ဝယ်ယူခြင်း ပြုမည်မဟုတ်ကြောင်း ရှင်းရှင်းလင်းလင်းကြေညာခဲ့ကြောင်း၊ နယ်စပ်ဖြတ်ကျော် မီးခိုးမြူ ၏ တစ်စိတ်တစ်ပိုင်းဖြစ်သော PM2.5 လေထုညစ်ညမ်းမှုနှင့်စပ်လျဉ်း၍ စိုက်ပျိုးရေးနှင့် သမဝါယမ ဝန်ကြီးဌာန ဝန်ကြီးနှင့် ဆွေးနွေးခဲ့ကြပါကြောင်း၊  CP အနေဖြင့် ဂြိုဟ်တုနည်းပညာကို အသုံးပြုနေပြီ ဖြစ်ရာ မီးလောင်ကွက်များကို သိရှိနိုင်ပြီး အဆိုပါ နေရာမှ စိုက်ပျိုးရေးထုတ်ကုန်များကို မိမိတို့ကုမ္ပဏီ သို့ ရောင်းချခြင်းမှ ချက်ချင်းပိတ်ပင်သွားနိုင်မည်ဖြစ်ကြောင်း၊ ကုမ္ပဏီသည် ပုံမှန်အားဖြင့် တိရစ္ဆာန် အစာအတွက် ပြောင်းကို ဝယ်ယူလေ့ရှိကြောင်း၊ CP သည် အိမ်နီးချင်းမြန်မာနိုင်ငံ၏ ရှမ်းတောင်ပိုင်းရှိ ပြောင်းစိုက်ပျိုးသည့် ဧရိယာ ၂၃၀,၆၇၀ ဟက်တာထိ လွှမ်းခြုံနိုင်သော ထိုင်းတိရစ္ဆာန်အစာ ထုတ်လုပ် သည့် စက်ရုံတွင် နောက်ကြောင်းလိုက်နိုင်သော စနစ်ကို ၂၀၁၆ ခုနှစ်တွင် စတင်မိတ်ဆက်ခဲ့ပါကြောင်း CP ဒုတိယဥက္ကဋ္ဌ Mr. Jomkitti Sirikul က ပြောကြားခဲ့ပါသည်။

ယင်းကဲ့သို့ စောင့်ကြည့်ခဲ့ခြင်းသည် မြန်မာနိုင်ငံမှ မီးခိုးများဝင်ရောက်မှုကို သိသိသာသာ လျှော့ ချပေးခဲ့ပြီး မြန်မာနိုင်ငံမှ တင်သွင်းသည့် ကုန်ကြမ်းဖြင့် ထုတ်လုပ်ရာတွင် ယုံကြည်မှုကို မြင့်တက်စေရုံ သာမက ထိုင်းနိုင်ငံမှ တင်ပို့သော ထုတ်ကုန်များ ထုတ်လုပ်ရာတွင်လည်း မြန်မာနိုင်ငံမှ ပါဝင်ပစ္စည်း များဖြင့် ဖြစ်ကြောင်း၊ CP သည် ဇီဝလောင်စာများကို မီးရှို့ခြင်းမှသည် အစိမ်းရောင်စိုက်ပျိုးရေးပုံစံသို့ ပြောင်းလဲရန် ထိုင်းနိုင်ငံ နန်ပြည်နယ်၏ မြောက်ပိုင်းမှ တောင်သူများကို မက်လုံးပေးသည့် အစီအစဉ် တစ်ခု ဆောင်ရွက်ခဲ့ပါကြောင်း၊ အဆိုပါ အစီအစဉ်အရ သီးနှံတစ်မျိုးတည်းကို တစ်နှစ်ပြီးတစ်နှစ် စိုက် ပျိုးသည့် အလေ့အကျင့်ကို ဝင်ငွေ ဘတ် ၁.၆ ထက်ပိုရရှိနိုင်သော ကော်ဖီဖြင့် အစားထိုးစိုက်ပျိုးရန် ထောက်ပံ့ပေးခဲ့ကြောင်း၊ အဆိုပါ စီမံချက်သည် ၁၂,၀၇၉ ရိုင်ထိ လွှမ်းခြုံပါကြောင်း Mr. Jomkitti က ဖြည့်စွက်ပြောကြားခဲ့သည်။

Source: www.bangkokpost.com စီးပွားရေးသံမှူး၊ ဗန်ကောက်မြို့။