အမေရိကန် သမ္မတ ဒေါ်နယ်ထရမ့်၏ ကုန်သွယ်ရေးမူဝါဒများ၏ သက်ရောက်မှုများကို ဖြေရှင်း ရန် ကြိုတင်ပြင်ဆင်မှုများ ဆောင်ရွက်ရန် ထိုင်းနိုင်ငံ ဝန်ကြီးချုပ် H.E Ms. Paetongtarn Shinawatra က ညွှန်ကြားခဲ့ကြောင်း သိရှိရပါသည်။
ထိုင်းနိုင်ငံ၏ စိုက်ပျိုးရေးဆိုင်ရာ နှင့် အီလက်ထရောနစ် ပို့ကုန်များအပေါ် အနုတ် လက္ခဏာ သက်ရောက်နိုင်သော ကုန်သွယ်ရေးအတားအဆီးများကို အမေရိကန် သမ္မတ အနေဖြင့် ထုတ်ပြန်လာနိုင်ဖွယ်ရှိရာ ကုန်သွယ်ရေးအစီအမံများကို လေ့လာထားရန် ဝန်ကြီး ချုပ်က ညွှန်ကြားခဲ့ကြောင်း၊ အစိုးရအနေဖြင့် နိုင်ငံအတွက် ကုန်သွယ်ရေးနှင့် ရင်းနှီးမြှုပ်နှံမှု အကျိုးကျေးဇူးများကို မြှင့်တင်နိုင်သော ရှင်းလင်းသည့် လမ်းညွှန်ချက်များအတွက် အမေရိကန်နှင့်စပ်လျဉ်း၍ ထိုင်းကုန်သွယ်ရေး မူဝါဒများကို လေ့လာရန်နှင့် ကြိုတင် ပြင်ဆင်ရန် အမေရိကန်ကုန်သွယ်ရေး မူဝါဒလုပ်ငန်းအဖွဲ့ကို ဇန်နဝါရီလ ၆ ရက်နေ့တွင် ဖွဲ့စည်းခဲ့ပါကြောင်း၊ လုပ်ငန်းအဖွဲ့ကို စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန အမြဲတမ်းအတွင်းဝန်က ဥက္ကဋ္ဌအဖြစ် ဆောင်ရွက်သွားမည်ဖြစ်ပြီး ရင်းနှီးမြှုပ်နှံမှုဘုတ်အဖွဲ့၊ စိုက်ပျိုး ရေးနှင့် သမဝါယမ ဝန်ကြီးဌာန၊ နိုင်ငံခြားရေးဝန်ကြီးဌာနနှင့် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနတို့ ပါဝင်မည်ဖြစ်ကြောင်း အစိုးရ၏ ပြောရေးဆိုခွင့်ရှိသူ Mr. Jirayu Huangsub က ပြော ကြားခဲ့သည်။
ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ ညှိနှိုင်းမှုများအတွက် ကောင်းကျိုးများနှင့် ဆိုးကျိုးများ ဆိုင်ရာ အကဲဖြတ်ချက်နှင့် တန်ပြန်ဆောင်ရွက်မှုများကို အရှိန်မြှင့်တင်ရန် လုပ်ငန်းအဖွဲ့ကို ဝန်ကြီးချုပ်က ညွှန်ကြားခဲ့ပါကြောင်း၊ ဝန်ကြီးချုပ်၏ တရုတ်ခရီးစဉ်ပြီး နောက် တရုတ်နှင့်ဆိုင်သည့် စီမံကိန်းများကို အရှိန်မြှင့်တင်ရန် လမ်းညွှန်ခဲ့ပါကြောင်း၊ နောင်ခိုင်နှင့် ရတ်ချစီမာတို့ကို ချိတ်ဆက်ထားသည့် အမြန် ရထားလမ်း စီမံကိန်းပထမအဆင့် တည်ဆောက်နေမှုကို အရှိန်မြှင့်တင်ပြီး ဒုတိယအဆင့်ကို ဆက်လက်ဆောင်ရွက်သွား ရန်ဖြစ်ကြောင်း၊ ရထားလမ်းစီမံကိန်းသည် ခရီးသွားများနှင့် ကုန်စည်များအတွက် လွယ်ကူ ချောမွေ့လုံခြုံသက်သာစေရန်ဖြစ်ကြောင်း၊ ကုန်းမြေချိတ်ဆက် စီမံကိန်းအတွက်လည်း သက်ဆိုင်ရာ အဖွဲ့အစည်းများ ပိုမိုပူးပေါင်းဆောင်ရွက်ရန် ဖြစ်ကြောင်း ဆက်လက်ပြောကြား ခဲ့သည်။
နိုင်ငံခြားရေးဝန်ကြီးဌာန၊ ပြည်ထဲရေးဝန်ကြီးဌာနနှင့် ဒီဂျစ်တယ် စီးပွားရေးနှင့် လူမှုရေးဝန်ကြီးဌာနတို့အနေဖြင့် နိုင်ငံဖြတ်ကျော် အွန်လိုင်းမှုခင်းများကို နှိမ်နင်းရန် တရုတ် အာဏာပိုင်များနှင့် အရေးတကြီးပူးပေါင်းဆောင်ရွက်ရန် ဖြည့်စွက်လမ်းညွှန်ခဲ့ကြောင်း၊ စိုက်ပျိုးရေး ထွက်ကုန်များနှင့် စပ်လျဉ်း၍ စံနှုန်းများ ထုတ်ပြန်နိုင်ရေးနှင့် အပင်ထုတ်ကုန် များ၊ မွေးမြူရေး(အမဲသား)နှင့် ငါးစသည်တို့ အပါအဝင် စိုက်ပျိုးရေးထုတ်ကုန်များ စစ်ဆေးရာ တွင် နှစ်ဖက်လက်ခံနိုင်သော သဘောတူစာချုပ်များ အတွက် ထိုင်း-တရုတ် ပူးတွဲလုပ်ငန်းအဖွဲ့ ဖွဲ့စည်းရေးကို အလျင်အမြန်ဆောင်ရွက်ရန် ဝန်ကြီးချုပ်က စိုက်ပျိုးရေးနှင့် သမဝါယမ ဝန်ကြီး ဌာနကို ညွှန်ကြားထားကြောင်း Mr. Jirayu က ဆက်လက်ပြော ကြားခဲ့သည်။
Source: www.bangkokpost.com စီးပွားရေးသံမှူး၊ ဗန်ကောက်မြို့။
