ထိုင်းနိုင်ငံ အစိုးရအနေဖြင့် အမေရိကန်သမ္မတ ဒေါ်နယ်ထရမ့်နှင့်တွေ့ဆုံ၍ ကုန်သွယ်ရေး မူဝါဒများအပေါ် ဆွေးနွေးညှိနှိုင်းမှုများကို အရှိန်မြှင့်တင်ဆောင်ရွက်ရန်နှင့် ဆွေးနွေးမှုတွင် ပုဂ္ဂလိ က ကဏ္ဍ ကိုလည်း ပါဝင်စေရေး ပုဂ္ဂလိက ကဏ္ဍက တိုက်တွန်းထားကြောင်း သိရှိရပါသည်။

နှောင့်နှေးမှုများသည် ပို့ကုန်အပေါ် ထိခိုက်မှုဖြစ်လာမည်ကို ကုမ္ပဏီများအနေဖြင့် စိုးရိမ် လျက်ရှိကြောင်း၊ ထိုင်းနိုင်ငံနှင့် ကုန်သွယ်မှုလိုငွေကို လျှော့ချလိုသည့် အမေရိကန်၏ ဆောင်ရွက်မှု များအပေါ် ဖြေရှင်းမည့်အလားအလာရှိသော အစီအမံများကို ကြိုတင်ဆောင်ရွက်မှုတွင် သိသိ သာသာ တိုးတက်မှုကို မတွေ့ရှိရပါကြောင်း၊ ရှင်းလင်းပြတ်သားသော ညှိနှိုင်းမှု မဟာဗျူဟာ သို့မဟုတ် သတ်မှတ်ထားသော ကုန်သွယ်မှုမူဝါဒ မရှိပါက အစိုးရအနေဖြင့် အချိန်မီ ပြဿနာများကို မဖြေရှင်းနိုင်ဘဲ အမေရိကန်သို့ ပို့ကုန်အပေါ် ထိခိုက်လာနိုင်ကြောင်း၊ ယင်းစိန်ခေါ်မှုများကို ဖြေရှင်း ရန် အစိုးရနှင့် ပုဂ္ဂလိကတို့မှ ပါဝင်၍ ပူးတွဲကော်မတီဖွဲ့စည်းရန် ပုဂ္ဂလိကအဖွဲ့အစည်းများက ဆော်ဩလျက်ရှိပါကြောင်း Thai National Shippers’ Council (TNSC) က ဥက္ကဋ္ဌ Mr. Chaichan Charoensuk က ပြောကြားခဲ့သည်။

အမေရိကန်နှင့် ကုန်သွယ်မှုတွင် တိုက်ရိုက်ပါဝင်ပတ်သတ်နေသော ကုမ္ပဏီများ၌ အချက် အလက်များအသေးစိတ်ရှိသောကြောင့် ထိရောက်သော ညှိနှိုင်းမှုအတွက် အစီအစဉ်တွင် အသုံး ပြုနိုင်ပါကြောင်း၊ လက်ရှိတောင်းဆိုထားသော်လည်း ဆွေးနွေးမှုတွင် ပုဂ္ဂလိကကဏ္ဍကို ဖိတ်ကြား ခြင်းမရှိသေးပါကြောင်း၊ အစိုးရ၏ လက်ရှိဆောင်ရွက်မှုများသည် နှေးကွေးလျက်ရှိပြီး အမေရိကန် သို့ ပို့ကုန်များအပေါ် သက်ရောက်နိုင်သည့်အလားအလာများနှင့်စပ်လျဉ်း၍ သတိပေးချက်များရှိ နေသော်လည်း ရှင်းလင်းသော ညှိနှိုင်းမှုမဟာဗျူဟာများ မရှိသေးပါကြောင်း၊ ၂၀၂၄ ခုနှစ်တွင် အမေရိကန်သို့ ပို့ကုန်တန်ဖိုးသည် အမေရိကန်ဒေါ်လာ ၅၅ ဘီလီယံရှိခဲ့သော်လည်း မဟာဗျူဟာ မရှိပါက ယခုနှစ်တွင် ကျဆင်းနိုင်ကြောင်း Mr. Chaichan က ဆက်လက်ပြောကြားခဲ့သည်။

ညှိနှိုင်းမှုများအရ ထိုင်းနိုင်ငံအနေဖြင့် အမေရိကန်မှ တိရစ္ဆာန်အစာပြောင်း၊ ပဲပုတ်နှင့် ရေနံ စိမ်း အပါအဝင် စိုက်ပျိုးရေးသွင်းကုန်များကို တိုးမြှင့်ရနိုင်သည်ဟု သတင်းများတွင် ဖော်ပြထားပါ ကြောင်း၊  အစိုးရအနေဖြင့် စိုက်ပျိုးရေးသွင်းကုန်များကို တိုးမြှင့်တင်သွင်းခြင်းကို ရေရှည်အတွက် စဉ်းစားသင့်ပါကြောင်း၊ အဘယ့်ကြောင့်ဆိုသော် နိုင်ငံတွင်း စိုက်ပျိုးရေး ကဏ္ဍကို ထိခိုက်လာနိုင် ကြောင်း၊ ၂၀၂၄ ခုနှစ်တွင် ထိုင်းနိုင်ငံသည် အမေရိကန်နှင့် အမေရိကန်ဒေါ်လာ ၃၅ ဘီလီယံ ကုန်သွယ်မှုပိုငွေ ဖြစ်ပေါ်ခဲ့ပြီး ကမ္ဘာ့အဆင့် ၁၁ ဖြစ်ပါကြောင်း၊ အမေရိကန်၏ ကုန်သွယ်မှုလိုငွေကို လျော့ပါးရန် ထိုင်းနိုင်ငံအနေဖြင့် မည်မျှတင်သွင်းရန် လိုအပ်သည်ကို မေးခွန်းထုတ်လိုကြောင်း၊ ထိုင်းနိုင်ငံသည် အမေရိကန်နှင့် ကုန်သွယ်မှုပိုငွေကို အသာထား၍ ၂၀၂၄ ခုနှစ်တွင် ကုန်သွယ်မှု လိုငွေ ဘတ် ၁.၆ ထရီလီယံသို့ ရောက်ရှိခဲ့သည့် တရုတ်နှင့် ကုန်သွယ်မှုလိုငွေကိုလည်း စီမံသင့် ကြောင်း၊ အမေရိကန်မှ တရုတ်ကုန် စည်များအပေါ် အခွန်ကောက်ခံသည့်နောက်ပိုင်း တရုတ်မှ သွင်းကုန်များ မြင့်တက်လာနိုင်သောကြောင့် အစိုးရအနေဖြင့် မြန်နိုင်သမျှမြန်ဆန်စွာ စီမံ ဆောင်ရွက်သင့်ကြောင်း Mr. Chaichan က သုံးသပ်အကြံပြုထားပါသည်။

Source: www.bangkokpost.com စီးပွားရေးသံမှူး၊ ဗန်ကောက်မြို့။