ပြည့်ဖြိုးမြဲစွမ်းအင်အသုံးပြုသည့်နိုင်ငံအဖြစ်သို့ ကူးပြောင်းနေသည့် တောင်ကိုရီးယားနိုင်ငံသည် တစ်ချိန်က ဇီဝလောင်စာများနှင့် ကုန်ကြမ်းပစ္စည်းများကို ပြည်ပမှ အဓိကထားတင်သွင်းခဲ့ရသည့် နိုင်ငံတစ်နိုင်ငံအဖြစ် ရပ်တည်ခဲ့ရပါသည်။ သို့သော် ယခုအခါ ဇီဝလောင်စာများတင်ပို့သည့်နိုင်ငံဖြစ်လာသည့်အပြင် ကမ္ဘာဈေးကွက်တွင် ဦးဆောင်တင်ပို့ရောင်းချသည့်နိုင်ငံဖြစ်လာမည့် အလားအလာများကြောင့် ကနေဒါနိုင်ငံ၊အော်စလိုမြို့အခြေစိုက် Rystad Energy's၏ကမ္ဘာ့ဇီဝစွမ်းအင်စျေးကွက် သုတေသနဌာန(Global Bioenergy Market Research Division) မှ သုတေသီ  Mr. Lars Klesse က ပြောကြားခဲ့ ပါသည်။

ယခင်က တောင်ကိုရီးယားနိုင်ငံသည် တရုတ်နိုင်ငံနှင့် မလေးရှားနိုင်ငံအပါအဝင် အခြားသောနိုင်ငံများမှ စားအုံးဆီနှင့် အသုံးပြုပြီးဟင်းချက်ဆီ(used cooking oil-UCO)များကဲ့သို့သော ဇီဝလောင်စာကုန်ကြမ်းများတင်သွင်းမှုအပေါ် အားကိုးနေရသည့်နိုင်ငံဖြစ်ပါကြောင်း၊ သို့သော် လက်ရှိတွင် တောင်ကိုရီးယားနိုင်ငံ၏ ဇီဝလောင်စာကဏ္ဍသည် ခရီးတစ်ခုရောက်နေပြီဖြစ်ပါကြောင်း၊  ရေရှည်တည်တံ့ခိုင်မြဲမည့်လေယာဉ်လောင်စာဆီ(Sustainable Aviation Fuel- SAF) နှင့် Hydro treated Vegetable Oil-HVO(စွန့်ပစ်ဟင်းချက်ဆီများ၊ တိရစ္ဆာန်အဆီများနှင့် ဟင်းသီးဟင်းရွက်ဆီများကဲ့သို့သော ပြန်လည်သုံးစွဲနိုင်သည့်အရင်းအမြစ်များကို ဟိုက်ဒရိုဂျင်ထည့်သွင်းခြင်းဖြစ်စဉ်(High-Pressure Hydrotreatment Process) ဖြင့်ထုတ်လုပ်သောဒီဇယ်ဆီ)ကို ရည်ရွယ်ထုတ်လုပ်ခဲ့မှုအောင်မြင်နေပြီဖြစ်သည့် အတွက် အနာဂတ်တွင် HVO နှင့် SAF တို့အပြင် ‌လောင်စာဆီကုန်ကြမ်းများကိုပါ တင်ပို့သည့်နိုင်ငံဖြစ်လာနိုင်ကြောင်း သုတေသီ  Mr. Lars Klesse က ပြောကြားခဲ့ပါသည်။

လက်ရှိတွင် တောင်ကိုရီးယားနိုင်ငံသည် HVO နှင့် SAF တို့ကို ဥရောပသမဂ္ဂနိုင်ငံများ၊ မြောက်အမေရိကနှင့် ဂျပန်နိုင်ငံတို့အပါအဝင် ပြည်ပနိုင်ငံများသို့တင်ပို့လျက်ရှိပြီး တင်ပို့မှုပမာဏသည်လည်း မှတ်သားဖွယ်ရာအခြေအနေရောက်ရှိနေပါကြောင်း၊  HVO နှင့် SAF ထုတ်လုပ်ရာတွင် အထူးသဖြင့် အသုံးပြုပြီးဟင်းချက်ဆီ (Used Cooking Oil-UCO)ကို ကုန်ကြမ်းအဖြစ် အသုံးချပါကြောင်း၊ ယခင်က တရုတ်နိုင်ငံသည် ကမ္ဘာ့ဈေးကွက်သို့ ဇီဝလောင်စာဆီကုန်ကြမ်းများကို တင်ပို့နေသော်လည်း ယခုအခါ ၎င်းကုန်ကြမ်းများကို တရုတ်ပြည်တွင်း၌ HVO နှင့် SAF ထုတ်လုပ်ရန် ပြည်ပသို့တင်ပို့မှု မရှိတော့ပါကြောင်း၊ သို့ဖြစ်၍ တောင်ကိုရီးယားနိုင်ငံသည် အဆိုပါအခွင့်အလမ်းကိုအရယူ၍ ကမ္ဘာ့ဈေးကွက်သို့ ဇီဝလောင်စာဆီ ကုန်ကြမ်းများနှင့် လေယာဉ်လောင်စာဆီ(SAF)ကို တင်ပို့ရောင်းချနိုင်ပြီဖြစ်ပါကြောင်း Mr. Lars Klesse က ပြောကြားခဲ့ပါသည်။

ဥရောပသမဂ္ဂနိုင်ငံများသည် ကာဗွန်လျှော့ချရေးရည်မှန်းချက်အရ သယ်ယူပို့ဆောင်ရေးကဏ္ဍတွင် ပြည့်ဖြိုးမြဲစွမ်းအင်များသုံးစွဲမှုအချိုးအစားကို မြှင့်တင်ရမည်ဖြစ်သည့်အတွက် အဆိုပါနိုင်ငံများသည် အကြီးဆုံးဈေးကွက်ကြီးအဖြစ် ရပ်တည်နေပါကြောင်း၊ ဥရောပသမဂ္ဂနိုင်ငံများမှ ပြဌာန်းထားသည့် ReFuelEU Aviation Regulation ၏သတ်မှတ်စည်းမျဉ်းနှင့်မညီပါက ပြစ်ဒဏ်ချမှတ်မည့်အစီအစဉ်များ အရ အရည်အသွေးမြင့်လေယာဉ်လောင်စာဆီများ ဝယ်ယူတင်သွင်းရမည်ဖြစ်သည့် အတွက် တောင်ကိုရီးယားနိုင်ငံမှ SAF တင်ပို့သူများအတွက် ရေရှည်ဖောက်သည်ဖြစ်နိုင်ပါကြောင်း၊ သို့ဖြစ်၍ ရေရှည်တည်တံ့သည့် လေကြောင်းသုံးလောင်စာဆီထုတ်လုပ်မှုတွင် ဦးဆောင်သည့်နိုင်ငံဖြစ်လာစေရေး ရည်ရွယ်ဆောင်ရွက်သင့်ကြောင်းနှင့် SAF တင်ပို့သူများသည် ကမ္ဘာ့လေကြောင်းလိုင်းများနှင့်ချိတ်ဆက်၍ လာမည့် ၇ နှစ်၊ ၁၀ နှစ် (သို့မဟုတ်) ၁၀ နှစ်ထက်ပို သောနှစ်များတွင် ပုံမှန်ရောင်းလိုအားဖြင့် တင်ပို့ရောင်းချပေးနိုင်ရေး ညှိနှိုင်းကြိုးပမ်းဆောင်ရွက်သင့်ကြောင်း၊ တောင်ကိုရီးယားနိုင်ငံသည် ဈေးကွက်ယှဉ်ပြိုင်နိုင်ရန် စက်မှု အခြေခံရှိသောနိုင်ငံဖြစ်သည့်အပြင် နိုင်ငံတကာစျေးကွက်ဝင်ရောက်နိုင်သည့်စွမ်းရည်ရှိပြီးနိုင်ငံဖြစ်သည့်အတွက် အစိုးရအနေဖြင့် ခိုင်မာသည့်မူဝါဒရည်မှန်းချက်များရှိရန်နှင့် ရင်းနှီး မြှုပ်နှံမှုများ ပိုမိုအားကောင်းလာစေရေးဆောင်ရွက်ရန်လိုအပ်ပါကြောင်း Mr. Lars Klesse က အကြံပြုခဲ့ပါသည်။

Source: Korea Herald

(ပပ၊ စီးပွားရေးသံမှူး၊ ဆိုးလ်မြို့)