ထိုင်းနိုင်ငံ၏ ယှဉ်ပြိုင်မှုကို မြှင့်တင်ရန်နှင့် အမေရိကန်အခွန်၏ သက်ရောက်မှုများကိုခုနှိမ်ရန် လှုံ့ဆော်ပေးမည့်အစီအမံများအား ဘဏ္ဍာရေးဝန်ကြီးဌာနက စီစဉ်ဆောင်ရွက်လျက်ရှိကြောင်း သိရှိရပါသည်။

ပို့ကုန်နှေးကွေးလာခြင်းကြောင့် ဖြစ်လာနိုင်သော အပျက်သဘောသက်ရောက်မှုများကို ကုသသည့်အနေဖြင့် လှုံ့ဆော်သည့်အစီအမံများကို ဆောင်ရွက်လျက်ရှိကြောင်း၊ အသားတင်ပို့ကုန်ဝင်ငွေကျဆင်းခဲ့ပြီး စီးပွားရေးတိုးတက်မှုကို ထိခိုက်လာပါက အစိုးရအနေဖြင့် စီးပွားရေးကို အထောက်အကူပြုရန်  ပြည်တွင်းသုံးစွဲမှုနှင့် ရင်းနှီးမြှုပ်နှံမှုကို လှုံ့ဆော်သွားမည်ဖြစ်ကြောင်း၊ ယင်းအစီအမံများတွင် စီးပွား ရေးကိုလှုံ့ဆော်ရန်နှင့် အလုပ်အကိုင်ဖန်တီးပေးရန် အခြေခံအဆောက်အဦစီမံကိန်းများအတွက် အစိုးရရင်းနှီးမြှုပ်နှံမှုဘတ်ဂျက်သုံးစွဲမှုကို အရှိန်မြှင့်တင်ခြင်း၊ နိုင်ငံခြားဝယ်လိုအားကျဆင်းမှုကို ခုနှိမ်ရန် ပြည်တွင်းစားသုံးမှုကို တွန်းအားပေးသည့် အခွန်မူဝါဒများမိတ်ဆက်ခြင်း(ပြည်တွင်းခရီးသွားလာမှုနှင့် ဈေးဝယ်မှုတို့တွင်အခွန်လျှော့ချသည့်အစီအစဉ်)နှင့် ထိုင်းစီးပွားရေး၏ အဓိကမောင်းနှင်အားဖြစ်သည့် ခရီး သွားနှင့်ဝန်ဆောင်မှုကဏ္ဍကို ထောက်ပံ့ပေးခြင်းတို့ဖြစ်ကြောင်း ကုန်သွယ်ရေးမူဝါဒရုံး ညွှန်ကြားရေးမှူးချုပ် Mr. Pornchai Thiraveja က ပြောကြားခဲ့ပါသည်။

လုပ်ငန်းများ၏ ကုန်ကျစရိတ်လျှော့ချရန်နှင့် ငွေဖြစ်လွယ်မှုတိုးမြှင့်စေရန် အခွန်အစီအမံများ စီစဉ်လျက်ရှိကြောင်း၊ ဥပမာအားဖြင့် ပို့ကုန်လုပ်ငန်းရှင်များအတွက် တန်ဖိုးမြှင့်ခွန်ပြန်အမ်းငွေကို အရှိန်မြှင့်တင်ဆောင်ရွက်ခြင်း၊ အစပထမအဆင့်တွင် ထိခိုက်ခဲ့သော လုပ်ငန်းများအတွက် လူဖှုဖူလုံရေးပေးချေမှုများ သို့မဟုတ် အခွန်အတွက် နောက်ဆုံးကာလကို သက်တမ်းတိုးပေးခြင်းနှင့် ထုတ်လုပ်မှုစွမ်းဆောင်ရည်မြှင့်တင်ရန် စီမံကိန်းများတွင် ရင်းနှီးမြှုပ်နှံခဲ့သော လုပ်ငန်းများထိခိုက်ခဲ့ပါက အခွန်မက်လုံးများပေးခြင်းတို့ဖြစ်ကြောင်း၊အစိုးရ၏ ယှဉ်ပြိုင်မှုတိုးမြှင့်သည့်ရန်ပုံငွေ တွင် ဘတ် ၁၀ ဘီလီယံရှိပြီး ယင်းရန်ပုံငွေဖြင့် ကုန်သွယ်ရေးအခြေအနေပြောင်းလဲမှုကို လက်ခံရာ၌ ထိုင်းလုပ်ငန်းများကို ထောက်ပံ့ပေးသွားမည်ဖြစ်ကြောင်း ၎င်းက ဖြည့်စွက်ပြောကြားခဲ့သည်။

အဆိုပါရန်ပုံငွေဖြင့် ယန္တရားများအဆင့်မြှင့်တင်လိုပြီး ထုတ်လုပ်ရေးနည်းပညာသစ်များလက်ခံသော စက်ရုံများအတွက် ဘဏ္ဍာငွေအကူအညီ သို့မဟုတ် ပူးတွဲရင်းနှီး မြှုပ်နှံမှုအစီအစဉ်များ သို့မဟုတ် ထုတ်ကုန်စံနှုန်းများနှင့် ဈေးကွက်သစ်များရှာဖွေလိုသော အသေးစားနှင့် အလတ်စားစီးပွားရေးလုပ်ငန်းများအတွက် သင်တန်းနှင့် ထုတ်လုပ်မှုဆိုင်ရာ အကြံပေးအစီအစဉ်ဆောင်ရွက်ရာတွင် အသုံးပြုမည်ဖြစ် ကြောင်း၊ စိုက်ပျိုးရေးကဏ္ဍတွင် အခြားသောသီးနှံသို့ ပြောင်းလဲစိုက်ပျိုးလိုသော သို့မဟုတ် ထုတ်လုပ်မှု စွမ်းရည်တိုးမြှင့်လိုသော တောင်သူငယ်များကို အကူအညီပေးရန် ရန်ပုံငွေတစ်စိတ်တစ်ပိုင်းကို အသုံးပြုမည်ဖြစ်ကြောင်း၊ အဆိုပါအစီအစဉ်အရ ပြောင်းနှင့် ပဲပုတ်စိုက်ပျိုးသူများကဲ့သို့သော အမေရိကန်၏ သွင်းကုန်တိုးမြှင့်မှုကြောင့် ထိခိုက်နိုင်သော တောင်သူများကို အကျိုးရှိစေရန်ဖြစ်ကြောင်း၊ သဘောတူ စာချုပ်အောက်မှ အဆိုပါသွင်းကုန်များအတွက် ဈေးကွက်ကို ဖွင့်လှစ်ရမည်ဖြစ်ပြီး ပြည်တွင်းသီးနှံ ဈေးနှုန်းများကိုထိခိုက်ခဲ့ပါက အစိုးရအနေဖြင့် ကနဦးချိန်ညှိနေသည့်ကာလတွင် တောင်သူများ၌ ကုန်ကျစရိတ်လျော့နည်းစေရန် ထုတ်လုပ်မှုသွင်းအားစုများပံ့ပိုးပေးခြင်း သို့မဟုတ် ယာယီဝင်ငွေရရှိရေး စဉ်းစားပေးရန်လိုအပ် ကြောင်း Mr. Pornchai က ပြောကြားခဲ့သည်။

အမေရိကန်၏ ကုန်သွယ်ရေးသဘောတူစာချုပ်နှင့် လိုက်လျောညီထွေရှိသည့် လုပ်ထုံးလုပ်နည်းများနှင့် ဥပဒေများကို ပြန်လည်သုံးသပ်သင့်သည်နှင့်စပ်လျဉ်း၍ ထိုင်းနိုင်ငံအနေဖြင့် ဥပဒေအသေးစိတ်များကို လျင်လျင်မြန်မြန်ပြင်ဆင်ရန်လိုအပ်မည်ဖြစ်ကြောင်း၊ ပထမအဆင့်အနေဖြင့် ကြေညာချက်နှင့် သဘောတူညီချက်များကို အမေရိကန်နှင့် မူကြမ်းဆောင်ရွက်ရမည်ဖြစ်ပြီး လွှတ်တော်သို့ အတည်ပြုချက် အတွက်တင်ပြရမည်ဖြစ်ကြောင်း၊ ကာလတိုတွင် ပြင်ဆင်ရန်လိုအပ်သည့် ဥပဒေများမှာ သတ်မှတ်ကုန်စည်များကို ချက်ချင်းအခွန်လျှော့ချရန်နှင့် လာမည့် ၃ နှစ်မှ ၅ နှစ်အတွင်း တဖြည်းဖြည်းဖြတ်တောက်ပေးသွားရန် ထိုင်းနိုင်ငံက ကတိပြုထားချက်ကြောင့် အမေရိကန်ကုန်စည်များအပေါ် သွင်းကုန်အခွန်ပြန်လည်ပြင်ဆင်ရန် အကောက်အခွန်အက်ဥပဒေနှင့် အကောက်ခွန်အခွန်နှုန်းထားအက်ဥပဒေတို့ဖြစ် ကြောင်း ၎င်းက ဖြည့်စွက်ပြောကြားခဲ့သည်။

ဥပဒေများ သို့မဟုတ် လုပ်ထုံးလုပ်နည်းများပြုပြင်ပြောင်းလဲခြင်းသည် သွင်းကုန်ခွဲတမ်းများနှင့် ပိုးမွှားသန့်စင်ရေးစံနှုန်းများလည်း ပါဝင်မည်ဖြစ်ကြောင်း၊ ဥပမာအားဖြင့် ထိုင်းနိုင်ငံအစိုးရက နိုင်ငံတွင်း တောင်သူများကို အကာအကွယ်ပေးရန် တိရစ္ဆာန်အစာပြောင်းနှင့် ပဲပုတ်တို့တွင် သွင်းကုန်ခွဲတမ်းများနှင့် အခွန်နှုန်းထားများသတ်မှတ်ထားပါကြောင်း၊ သဘောတူညီချက်အသစ်တွင် သွင်းကုန်ခွဲတမ်းသတ် မှတ်ချက်ကို ပိုမိုလုပ်သာကိုင်သာရှိပြီး အရည်အသွေးလိုအပ်ချက်များ(မီးရှို့ထားသည့်ဓာတ်ကြွင်းမပါသည့်ပြောင်း)ကို ထိုင်းနိုင်ငံက ညှိနှိုင်းထားချက်အတိုင်းဖြစ် ကြောင်း၊ အခွန်မဟုတ်သော အတားအဆီးများဖြစ်သည့် ပိုးမွှားသန့်စင်မှုနှင့် အစား အစာလုံခြုံစိတ်ချရမှုလုပ်ထုံးလုပ်နည်းများကိုလည်း နိုင်ငံတကာစံနှုန်းများနှင့်ကိုက်ညီစေရန် ပြန်လည်သုံးသပ်ပြင်ဆင်သွားမည်ဖြစ်ကြောင်း သိရှိရပါသည်။

အမေရိကန်မှ ဝက်သွင်းကုန်နှင့်စပ်လျဉ်း၍ ထိုင်းနိုင်ငံသည် ပြည်တွင်းလိုလား ချက်၏ ၁ ရာခိုင်နှုန်းထက်မပိုသော ဈေးကွက်ကိုသာ ဖွင့်ထားပေးပြီး ဝက်တွင် Ractopamine ပါဝင်မှုကို ထိုင်းဥပဒေအရ ကန့်သတ်ထားဆဲဖြစ်ကြောင်း၊ သွင်း ကုန်များအတွက် စစ်ဆေးမှုကို ခိုင်မာပြီး ပွင့်လင်းမြင်သာမှုရှိစေရန် ဆောင်ရွက်သွားမည်ဖြစ်ကြောင်း၊ အမေရိကန်အခွန်အစီအမံ၏ အဓိကအကြောင်းပြချက်ဖြစ်သည့် ပင်ရင်းစည်းမျဉ်း သို့မဟုတ် Transshipment ကို သွေဖီမှုကိုကာကွယ်ရန် ဥပဒေနှင့် ပြင်းထန်စွာအရေးယူသွားမည်ဖြစ်ကြောင်း၊ ထိုင်းနိုင်ငံမှ တင်ပို့သော ကုန်စည်များနှင့်စပ်လျဉ်း၍ ထောက်ပံ့မှုကွင်းဆက်တစ်လျှောက် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ အကောက်ခွန်ဦးစီးဌာနနှင့် အမေရိကန်အစိုးရတို့က ‌ပူးပေါင်းစောင့်ကြည့်သွားမည်ဖြစ်ကြောင်း  Mr. Pornchai က ပြောကြားခဲ့ သည်။

ပင်ရင်းစည်မျဉ်းတိမ်းရှောင်မှုဖြစ်ပွားခဲ့ပါက အမေရိကန်က ဆုံးဖြတ်ထားပြီး ထိုင်းနိုင်ငံက မူအားဖြင့် သဘောတူညီထားသည့် နှုန်းထားအတိုင်း ၄၀ ရာခိုင်နှုန်းကောက်ခံရမည်ဖြစ်ကြောင်း၊ ကာလတိုတွင် ထိုင်းနိုင်ငံသည် သဘောတူညီချက်နှင့်ကိုက်ညီသည့်လုပ်ထုံးလုပ်နည်းများပြင်ဆင်ခြင်းကို အာရုံစိုက်မည်ဖြစ်ကြောင်း၊ ချက်ချင်းပြဿနာများကို ဖြေရှင်းပြီးပါက နိုင်ငံ၏ယှဉ်ပြိုင်မှုကို မြှင့်တင်ရန် ပြုပြင်ပြောင်းလဲရေးကို ဆက်လက်ဆောင်ရွက်သွားမည်ဖြစ်ကြောင်း၊ ကာလလတ်တွင် လုပ်ငန်းလည်ပတ်ရာ၌ အဟန့်အတားဖြစ်စေသော ခေတ်နောက်ကျကျန်ခဲ့ပြီဖြစ်သည့်ဥပဒေများကို ပြန်လည်သုံးသပ်ခြင်းနှင့် ဗျူရိုကရက်တစ်လုပ်ငန်းစဉ်များကို လျှော့ချသွားမည်ဖြစ်ကြောင်း၊ အစိုးရအနေဖြင့် ထိုင်းနိုင်ငံ၏ စီးပွားရေးအဝန်း အဝိုင်းကို ရင်းနှီးမြှုပ်နှံသူများအတွက် လုပ်သာကိုင်သာပိုမိုဖြစ်စေလိုပြီး မလိုအပ်သောလိုင်စင်များဖျက်သိမ်းခြင်း၊ အလုပ်သမားနှင့် ရင်းနှီးမြှုပ်နှံမှုဥပဒေများကို ပြင်ဆင်ခြင်းနှင့် ပြည်သူ့ဝန်ဆောင်မှုများတွင် ဒီဂျစ်တယ်စနစ်အသုံးပြုမှုကို တိုးချဲ့ခြင်းတို့ ဆောင်ရွက်သွားမည်ဖြစ်ကြောင်း ရှင်းလင်းခဲ့သည်။

ယင်းဆောင်ရွက်ချက်များသည် ရင်းနှီးမြှုပ်နှံမှုအသစ်များ ဖိတ်ခေါ်ခြင်းနှင့် နိုင်ငံတွင်းစီးပွားရေးတိုးတက်မှုကို ထောက်ပံ့ပေးမည့် အစိုးရ၏ ရည်မှန်းချက်နှင့်ကိုက်ညီပါကြောင်း၊ ရင်းနှီးမြှုပ်နှံမှု မြှင့်တင်ရေးအက်ဥပဒေပြင်ဆင်ခြင်းနှင့် ရင်းနှီးမြှုပ်နှံသူများကို မက်လုံးပေးပိုမိုဆွဲဆောင်နိုင်ပြီး စီမံကိန်းအတည်ပြုချက်များ တိုးတက်လာလျက်ရှိသည့် အရှေ့ဖက်စီးပွားရေးစင်္ကြံနှင့်သက်ဆိုင်သည့် ဥပဒေများ ပြင်ဆင်ခြင်းတို့နှင့် ပုံစံတူပါကြောင်း၊ အနာဂတ်တွင် ကုန်သွယ်ရေးယှဉ်ပြိုင်မှုဥပဒေနှင့် မိုနိုပိုလီဆန့်ကျင်သည့်ဥပဒေများကို ပြန်လည်ပြင်ဆင်ခြင်းဖြင့် အသေးစားနှင့် အလတ် စားစီးပွားရေးလုပ်ငန်းများနှင့် အစပျိုးလုပ်ငန်းများရှိပါဝင်သူအသစ်များကို အားပေး ခြင်းနှင့် မျှတသောဈေးကွက်တစ်ခုဖော်ဆောင်ပေးမည်ဖြစ်ကြောင်း၊ မူပိုင်ခွင့်ဥပဒေတိုးတက်လာမှုနှင့် ဒီဂျစ်တယ်စီးပွားရေးနှင့်သက်ဆိုင်သည့် လုပ်ထုံးလုပ်နည်းများ သည် တီထွင်ဆန်းသစ်မှုနှင့် အွန်လိုင်းကုန်သွယ်မှုကို မြှင့်တင်ရန်လိုအပ်ပါကြောင်း Mr. Pornchai က သုံးသပ်ပြောကြားခဲ့သည်။

Source: www.bangkokpost.com

(သီတာဝင်း၊ စီးပွားရေးသံမှူး၊ ဗန်ကောက်မြို့)