ဂျပန်နိုင်ငံအနေဖြင့် အသုံးပြုပြီးပလပ်စတစ်စုစုပေါင်း၏ အနည်းဆုံး ၁၅ ရာခိုင်နှုန်းကို မော်တော်ယာဉ်ထုတ်လုပ်ရာတွင်သုံးစွဲသွားမည်ဖြစ်ကြောင်း ဂျပန်နိုင်ငံပတ်ဝန်း ကျင်ထိန်းသိမ်းရေးဝန်ကြီးဌာနက ၁၇-၃-၂၀၂၅ ရက်နေ့တွင်ထုတ်ပြန်ခဲ့ကြောင်း ၁၈-၃-၂၀၂၅ ရက်နေ့ထုတ် The Japan Times သတင်းစာတွင် “Japan aims to use 15% recycled plastics in auto production” ခေါင်းစဉ်ဖြင့် ဖော်ပြခဲ့ပါသည်။
အီးယူအနေဖြင့် ပြန်လည်အသုံးပြုနိုင်သည့် ပလပ်စတစ်များကို အသုံးပြု၍ ထုတ်လုပ်ထားသည့် မော်တော်ယာဉ်များကိုသာ နိုင်ငံအတွင်း တင်သွင်းခွင့်ပြုမည်ဖြစ်ကြောင်း ကြေညာခဲ့ပြီးနောက် ဂျပန်နိုင်ငံ၊ ပတ်ဝန်းကျင်ထိန်းသိမ်းရေးဝန်ကြီး ဌာနအနေဖြင့် အဆိုပါမူဝါဒကိုထုတ်ပြန်ခဲ့ခြင်းဖြစ်ကြောင်း၊ အသုံးပြုပြီးပလပ်စတစ်များမှာ အရည်အသွေးမကောင်းခြင်းနှင့် အလုံအလောက်ရရှိနိုင်မှုမရှိခြင်းတို့ကြောင့် ဂျပန်နိုင်ငံ၌ မော်တော်ယာဉ်ထုတ်လုပ်ရာတွင် သုံးစွဲလေ့မရှိကြောင်း ဖော်ပြထားပါသည်။
ဂျပန်အစိုးရ၏သတ်မှတ်ချက်နှင့်အညီ အသုံးပြုပြီးပလပ်စတစ်များ၏ အနည်းဆုံး ၁၅ ရာခိုင်နှုန်းကို မော်တော်ယာဉ်ထုတ်လုပ်ရာတွင် သုံးစွဲရမည်ဆိုပါက တစ်နှစ်လျှင် အသုံးပြုပြီးပလပ်စတစ်တန်ချိန် ၂၅,၀၀၀ မှ ၁၂၄,၀၀၀ အထိလိုအပ်မည်ဖြစ်ကြောင်း ဂျပန်နိုင်ငံပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ထားကြောင်း၊ ဂျပန်အစိုးရအနေဖြင့် ၂၀၃၆ ခုနှစ်မှ ၂၀၄၀ ပြည့်နှစ်အတွင်း အသုံးပြုပြီး ပလပ်စတစ်များ၏ အနည်းဆုံး ၂၀ ရာခိုင်နှုန်းကို မော်တော်ယာဉ်ထုတ်လုပ်ရာတွင် သုံးစွဲရန် တိုးမြှင့်သတ်မှတ်သွားမည်ဖြစ်ကြောင်းနှင့် ထိုသို့သုံးစွဲနိုင်ရေးအတွက် တစ်နှစ်လျှင် အသုံးပြုပြီး ပလပ်စတစ်တန်ချိန် ၁၅၇,၀၀၀ တန်မှ ၁၉၀,၀၀၀ တန်အထိ လိုအပ်မည်ဖြစ်ကြောင်း၊၂၀၄၁ ခုနှစ်မှစတင်၍ မော်တော်ယာဉ်အားလုံးကို အသုံးပြု ပြီးပလပ်စတစ်များအသုံးပြု၍ မဖြစ်မနေထုတ်လုပ်ရန် သတ်မှတ်သွားမည်ဖြစ် ကြောင်းနှင့် တစ်နှစ်လျှင် အသုံးပြုပြီးပလပ်စတစ်တန်ချိန် ၂၀၀,၀၀၀ လိုအပ်လာမည်ဖြစ်ကြောင်း ဖော်ပြထားပါသည်။
အီးယူကော်မရှင်အနေဖြင့် ၂၀၃၁ ခုနှစ်မှစတင်၍ ဒေသတွင်းသို့ တင်သွင်းလာမည့် မော်တော်ယာဉ်များတွင် အသုံးပြုပြီးပလပ်စတစ်များ၏ ၂၀ ရာခိုင်နှုန်းကို မော်တော်ယာဉ်ထုတ်လုပ်ရာတွင် မဖြစ်မနေသုံးစွဲသွားနိုင်ရေး ဆောင်ရွက်လျက်ရှိကြောင်း၊ ပြန်လည်အသုံးပြုနိုင်သည့် ပလပ်စတစ်များမှ ထွက်ရှိလာမည့် ပိုလျှံကုန်ကြမ်းများကိုပါ ထည့်သွင်းတွက်ချက်မည်ဆိုပါက ဂျပန်နိုင်ငံ၌ မော်တော်ယာဉ် ထုတ်လုပ်ရာတွင် အသုံးပြုပြီးပလပ်စတစ်များ၏ အနည်းဆုံး ၁၅ ရာခိုင်နှုန်းသုံးစွဲရန် သတ်မှတ်ချက်သည် အီးယူ၏အဆိုပြုစည်းမျဉ်းများနှင့် ကိုက်ညီနိုင်မည်ဖြစ် ကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
