ထိုင်းဒူးရင်းသီးများတွင် Basic Yellow 2(BY2)ဆိုးဆေးအတွက် စိုးရိမ်မှုများမရှိတော့သဖြင့် ယခုနှစ်အတွင်း ဒူးရင်းသီးတင်ပို့မှု၌ အဆင်ပြေပြေဆောင်ရွက်နိုင်ရန် မျှော်မှန်ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီး H.E Mr. Pichai Naripthaphan က ပြောကြားခဲ့ကြောင်း သိရှိရပါသည်။
ဝန်ကြီးသည် မေလဒူးရင်းသီးခူးဆွတ်ရာသီအတွက် ပြင်ဆင်သွားရန် ချန်းသာပုရိပြည်နယ်ရှိ အုပ်ချုပ်ရေးမှူး Mr. Monsit Paisarntanawat အပါ အဝင် ဆက်စပ်အဖွဲ့အစည်းများနှင့် ပုဂ္ဂလိကကဏ္ဍကိုယ်စားလှယ်များနှင့် တွေ့ဆုံခဲ့ပါကြောင်း၊ ယခုနှစ် ဒူးရင်းသီးထွက်ရှိမှုသည် တန်ချိန် ၁.၇၆ သန်းဖြင့် ၃၇ ရာခိုင်နှုန်းတိုးတက်ရန် ခန့်မှန်းထားကြောင်း၊ ဝန်ကြီးသည် တရုတ်သံရုံး၏သံမှူးကြီး Mr. Wu Zhiwu နှင့်အကြိမ်ကြိမ်တွေ့ဆုံဆွေးနွေးမှုများ၌ ထိုင်းနိုင်ငံ၏ စစ်ဆေးမှုလုပ်ငန်းစဉ်များကို ဦးစားပေးဆွေးနွေးခဲ့ပြီး သင်္ဘောအားလုံးကို စစ်ဆေးခြင်းထက် ကျပန်းစစ်ဆေးမှုဆောင်ရွက်ရန် တောင်းဆိုခဲ့ကြောင်း၊ မတင်ပို့မီ ပြည့်ပြည့်စုံစုံကြိုတင်စစ်ဆေးထားပြီးဖြစ်ရာ တရုတ်သည် ကုန်သေတ္တာအားလုံးကို စစ်ဆေးနေပါက နှောင့်နှေးမှုများဖြစ်ပေါ်စေပြီး တရုတ်သို့ ဒူးရင်းသီးများဝင်ရောက်ရန် စောင့်ဆိုင်းနေစဉ်တွင် ပုပ်သိုးမှုများဖြစ်လာစေမည်ဖြစ်ကြောင်း ဝန်ကြီးက ပြောကြားခဲ့သည်။
လာမည့်ဒူးရင်းသီးခူးဆွတ်ရာသီတွင် BY2 ဆိုးဆေးကင်းလွတ်ရန်အတွက် ချန်းသာပုရိနှင့် ဆက်စပ်ပြည်နယ်များတွင် BY2 ဆိုးဆေးနှင့်စပ်လျဉ်းသည့် ပြဿနာများကို ထိထိရောက်ရောက်ဖြေရှင်းလျက်ရှိပြီး ကြိုတင်ကာကွယ်လျက်ရှိသည်ကို အုပ်ချုပ်ရေးမှူး Mr. Monsit က အတည်ပြုခဲ့ပြီးဖြစ်ကြောင်း၊ တရုတ်အနေဖြင့်လည်း ထိုင်းဒူးရင်းသီးများအတွက် စစ်ဆေးမှုလုပ်ငန်းစဉ်များကို ဖြေလျှော့ပေးရန် ဆန္ဒရှိပါကြောင်း၊ ပြီးခဲ့သည့်လက ဆိုးဆေးပြဿနာရပ်နှင့်စပ်လျဉ်းသည့် ပြဿနာမရှိခဲ့ပါကြောင်း၊ ယင်းအတိုင်းဆက်သွားပါက ထိုင်းဒူးရင်းသီးပို့ကုန်အပေါ် ယုံကြည်မှုပိုမိုခိုင်မာနိုင်ကြောင်း၊ ထိုင်းဒူးရင်းသီးအရည်အသွေးကိုစစ်ဆေးရန် ချန်းသာပုရိသို့ လာရောက်လည်ပတ်ရန် Mr. Zhiwu ကို ဖိတ်ခေါ်လိုကြောင်း ဝန်ကြီးက ဖြည့်စွက်ပြောကြားခဲ့သည်။
ဝန်ကြီးဌာနအနေဖြင့် တရုတ်သို့ ပို့ကုန်များကို ထိန်းထားရန် ကြိုးစားနေသောကြောင့် ထိုင်းဒူးရင်းသီးများအတွက် အမေရိကန်၊ ဥရောပသမဂ္ဂနှင့် အိန္ဒိယတို့ရှိ အလားအလာရှိသော ဈေးကွက်များကိုလည်း ရှာဖွေနေပါကြောင်း၊ ယခုနှစ်တွင် ဒူးရင်းသီးတန်ချိန် ၉၅၀,၀၀၀ တင်ပို့ရန် မှန်းထားပါကြောင်း၊ ဧပြီလအတွင်း အိန္ဒိယဝန်ကြီးချုပ် ထိုင်းနိုင်ငံသို့ လာရောက်မည့်ခရီးစဉ်တွင် ထိုင်းသစ်သီးများ အိန္ဒိယသို့ တင်ပို့နိုင်ရေးအတွက် ဆွေးနွေးသွားမည်ဖြစ်ကြောင်း ဝန်ကြီးက ပြောကြားခဲ့သည်။
စီးပွားရေးလုပ်ငန်းဖွံ့ဖြိုးတိုးတက်မှုဦးစီးဌာနက ချန်းသာပုရိနှင့်ရယောင်းရှိ မြေယာဆက်စပ်စိုက်ပျိုးရေးလုပ်ငန်းများတွင် နိုင်ငံခြားသားများအတွက် ရှယ်ယာကိုင်ဆောင်ထားသော ထိုင်းနိုင်ငံသားအမည်များရှိနိုင်သော ဥပဒေအဖွဲ့အစည်းများကို စုံစမ်းစစ်ဆေးလျက်ရှိရာ ချန်းသာပုရိတွင် လုပ်ငန်း ၄၆၂ ခုရှိပြီး မြေယာဦးစီးဌာနသို့ လွှဲပြောင်းပေးထားပါကြောင်း၊Mueang ခရိုင်တွင် စိုက်ပျိုးမြေယာကိုင်ဆောင်ထားသောလုပ်ငန်း ၁၁ ခုရှိပြီး ၃ ခုမှာ သစ်သီးနှင့် ဟင်းသီးဟင်းရွက်များကုန်သွယ်လျက်ရှိပြီး အခြားမှာ ကျောက်မျက်လုပ်ငန်းဆောင်ရွက်လျက်ရှိကြောင်း၊ ထိုင်း-နိုင်ငံခြားသား ရှယ်ယာခွဲဝေမှုသည် ၅၁ အချိုး ၄၉ နှင့်ကိုက်ညီရန် အရေးကြီးပါကြောင်း၊ ယင်းထက်ပိုမိုပါက နိုင်ငံခြားသားပိုင်ဆိုင်မှုဖြစ်နိုင်ပြီး စိုက်ပျိုးရေး၊ အပင်စိုက်ပျိုးခြင်းနှင့် စိုက်ပျိုးရေး၊ ကုန်သွယ်မှုအပါအဝင် ကန့်သတ်လုပ်ငန်းများလုပ်ကိုင်ရန် ကန့်သတ်ထားရာ ဥပဒေကို ဆန့်ကျင်သဖြင့်အရေးယူမှုခံရနိုင်ကြောင်း ဦးစီးဌာန ညွှန်ကြားရေးမှူးချုပ် Ms. Auramon Supthaweethum က ပြောကြားခဲ့သည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
