ယူကေနိုင်ငံသည် ထိုင်းနိုင်ငံနှင့်အကြား ဒစ်ဂျစ်တယ်နည်းပညာ၊ ကုန်သွယ်မှုနှင့် ဆန်းသစ်တီထွင်မှုကဏ္ဍများတွင် ပူးပေါင်းဆောင်ရွက်မှုများတိုးချဲ့လုပ်ဆောင်ရန်ကြိုးပမ်းလျက်ရှိကြောင်း အာရှ ပစိဖိတ်ဒေသဆိုင်ရာ ဗြိတိန်ကုန်သွယ်ရေးသံအမတ်(His Majesty’s Trade Commissioner)ဖြစ်သူ Martin Kent က မကြာသေးမီက ထိုင်းနိုင်ငံသို့ လာရောက်ခဲ့သည့် ခရီးစဉ်အတွင်း ပြောကြားခဲ့သည်။

ကုန်သွယ်မှုဒစ်ဂျစ်တယ်စနစ်(Digital Trade)၏အကျိုးကျေးဇူးများ။ Martin Kent ၏ပြောကြားချက်အရ ကုန်သွယ်မှုလုပ်ငန်းစဉ်များကို ဒစ်ဂျစ်တယ်စနစ်သို့ပြောင်းလဲခြင်း(Paperless Trade)သည် ကုန်ကျစရိတ်များကို လျှော့ချပေးနိုင်သည့်အပြင်၊ လုပ်ငန်းကြန့်ကြာမှုများကို ပယ်ဖျက်ပေးနိုင်ပြီး ထောက်ပံ့ပို့ဆောင်ရေးကွင်းဆက်(Supply Chain)ကို ပိုမိုခိုင်မာစေကြောင်း သိရသည်။ ၎င်းက ဥပမာတစ်ခုအနေဖြင့် ဗြိတိန်နိုင်ငံမှ ထိုင်းနိုင်ငံရှိ ကုန်တိုက်ကြီးများသို့ ကုန်ပစ္စည်းတင်ပို့သည့် ရှေ့ပြေးစီမံကိန်းတစ်ခုတွင် စာရွက်စာတမ်းလုပ်ငန်းစဉ်များ ဒစ်ဂျစ်တယ်စနစ်သို့ ပြောင်းလဲလိုက်ခြင်းကြောင့် ယခင်က (၅)ရက်ခန့်ကြာမြင့်သည့်အချိန်ကို (၃)ရက်အောက်အထိ လျှော့ချနိုင်ခဲ့ကြောင်း ထောက်ပြခဲ့သည်။ ထို့အပြင် ဝန်ထမ်းများ၏ လုပ်ငန်းစွမ်းဆောင်ရည်မှာလည်း ၆၇ ရာခိုင်နှုန်းအထိ တိုးတက်လာခဲ့သည်။

မဟာဗျူဟာမြောက်ပူးပေါင်းဆောင်ရွက်မှု။ ယူကေနှင့် ထိုင်းနိုင်ငံတို့သည် ၂၀၂၄ ခုနှစ်၊ မတ်လတွင် "မဟာဗျူဟာမြောက်မိတ်ဖက်ဆက်ဆံရေးလမ်းပြမြေပုံ"(Strategic Partnership Roadmap)ကို လက်မှတ်ရေးထိုးခဲ့ကြသည်။ အဆိုပါပူးပေါင်းဆောင်ရွက်မှုအောက်တွင် -

• စွမ်းအင်သန့်စင်မှု(Clean Energy)
• အဆင့်မြင့်ကုန်ထုတ်လုပ်မှု(Advanced Manufacturing)
• ကာကွယ်ရေးနှင့် လုံခြုံရေးကဏ္ဍ
• ဒစ်ဂျစ်တယ်နည်းပညာများ ပါဝင်သည်။

အနာဂတ်အစီအစဉ်များနှင့် အခွင့်အလမ်းများ။ ထိုင်းနိုင်ငံသည် အာဆီယံဒေသတွင်းတွင် လျင်မြန်စွာတိုးတက်နေသည့် ဒစ်ဂျစ်တယ်အချက်အချာ (Digital Hub)တစ်ခုဖြစ်ပြီး၊ ၂၀၃၀ ပြည့်နှစ်တွင် ထိုင်းနိုင်ငံ၏ ဒစ်ဂျစ်တယ်စီးပွားရေးသည် အမေရိကန်ဒေါ်လာ ၂ ဘီလီယံကျော်အထိရှိလာနိုင်မည်ဟု ခန့်မှန်းထားသည်။

ရှေ့ဆက်လုပ်ဆောင်မည့်အစီအစဉ်များအနေဖြင့် ၂၀၂၆ ခုနှစ်၊ ဇွန်လ ၈ ရက်မှ ၁၂ ရက်အတွင်းကျင်းပမည့် "London Tech Week" တွင် ထိုင်းနိုင်ငံမှ နည်းပညာလုပ်ငန်းရှင်များနှင့် ရင်းနှီးမြှုပ်နှံသူများကို ဖိတ်ခေါ်၍ ယူကေနိုင်ငံ၏ နည်းပညာဂေဟစနစ်နှင့် ချိတ်ဆက်ပေးရန် စီစဉ်ထားသည်။ ၎င်းအပြင် ကျန်းမာရေးနည်းပညာ(Health-tech)ကဏ္ဍတွင်လည်း ယူကေကုမ္ပဏီများနှင့် ထိုင်းနိုင်ငံမှ "Disrupt Health Impact Fund" တို့အကြား ပူးပေါင်းလုပ်ဆောင်မှုများရှိနေကြောင်း သိရသည်။

နိဂုံး။ ကမ္ဘာလုံးဆိုင်ရာ စီးပွားရေးမရေရာမှုများ၊ ပထဝီနိုင်ငံရေးတင်းမာမှုများနှင့် ရာသီဥတုပြောင်းလဲမှုဆိုင်ရာစိန်ခေါ်မှုများရှိနေသော်လည်း၊ ဒစ်ဂျစ်တယ်စနစ်သို့ကူးပြောင်းခြင်းဖြင့် နိုင်ငံအချင်းချင်းကုန်သွယ်မှုတွင် ပိုမိုမြန်ဆန်၊ ပွင့်လင်းပြီး ခံနိုင်ရည်ရှိသော စီးပွားရေးပတ်ဝန်းကျင်တစ်ခုကို ဖန်တီးနိုင်မည်ဖြစ်ကြောင်း Martin Kent က သုံးသပ်ပြောကြားခဲ့သည်။

ကိုးကား - Bangkok Post

(ရည်မွန်လှိုင်၊ စီးပွားရေးသံမှူး၊ ဗန်ကောက်မြို့)