ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် စာဖြူကျေးရွာအုပ်စု၊ ထိုပုံးကျေးရွာတွင် ကွမ်းကို နှစ်စဉ် စီးပွားဖြစ်စိုက်ပျိုးလျက်ရှိပြီး မိသားစုဝင်ငွေရှိနေကြောင်း သိရှိရသည်။ ကွမ်းအပြင်၊ အခြားသီးနှံများဖြစ်သော ခရမ်းကျွတ်သီး၊ ငရုတ်သီးစိမ်း၊ မုန့်လာဥ၊ ကြက်ဟင်းခါးသီး၊ ပဲတောင့်ရှည်များကိုလဲ စိုက်ပျိုးကြောင်း သိရသည်။
ကွမ်းကို စိုက်ပျိုးမှုအနေဖြင့် အပင် ၆၀၀၀ ခန့် စိုက်ပျိုးထားပြီး မျိုး ၁ ညွှန့်လျှင် ၂၀၀ကျပ်ဖြင့် ဝယ်ယူစိုက်ပျိုးကြောင်း၊ ကွမ်းတိုင်ပေါင်း ၂၀၀ ခန့် စိုက်ထူ စိုက်ပျိုးကြောင်း သိရသည်။ ကွမ်းစိုက်ပျိုးချိန်မှာ ၂၀၂၅ ခုနှစ် ဒီဇင်ဘာလက စတင်စိုက်ပျိုးပြီး စိုက်ပျိုးပြီး ၃လ အကြာ ၂၀၂၆ ခုနှစ်၊ ဖေဖော်ဝါရီလတွင် ရောင်းတန်းဝင် ကွမ်းရွက်များထွက်ရှိကြောင်း သိရှိရသည်။ ကွမ်းရွက်များကို တစ်ပတ်လျှင် တစ်ကြိမ် ခူးဆွတ်ကြောင်း၊ တစ်ကြိမ်ခူးပါက ပိဿာ ၁၀၀ ခန့် ထွက်ရှိကြောင်း သိရသည်။ ကွမ်းခြံအပြီး ကွမ်းထွက်ရှိမှု ပိဿာ ၉၀၀၀ နီးပါးခန့်ရရှိကြောင်း သိရှိရသည်။ စိုက်ပျိုးမှု ကုန်ကျစရိတ်အနေဖြင့် ကျပ်သိန်း ၅၀ ခန့် ကုန်ကျကြောင်း၊ ကွမ်းကုန်သည်များထံ ရောင်းချမှု ဈေးအနေဖြင့် တစ်ပိဿာလျှင် ၂၀၀၀၀/- ကျပ်၊ ၂၅၀၀၀/- ကျပ်ဖြင့် လက်ကားရောင်းချရကြောင်း၊ ယခင်နှစ် ကွမ်း လက်ကားဈေးအနေဖြင့်လည်း တစ်ပိဿာ ၁၅၀၀၀/- ၂၀၀၀၀/-ကျပ်ဖြင့် ရောင်းချခဲ့ရကြောင်း၊ ယခုနှစ် အကျိုးအမြတ်အနေဖြင့် ဈေးနှုန်းအတက်အကျပေါ် မူတည်၍ ငွေကျပ် ၂၀ သိန်းမှ ၃၀ သိန်းကြား ကျန်ရှိကြောင်း ကွမ်းရွက်၊ အကြီး၊ အသေးပေါ် မူတည်၍ ဈေးပြောင်းလဲမှုရှိကြောင်း ကွမ်းကို မိသားစု စီးပွားဖြစ် နှစ်စဉ် စိုက်ပျိုးလျက်ရှိပြီး မိသားစုဝင်ငွေ အဆင်ပြေလျက်ရှိကြောင်း သိရှိရပါသည်။
Source: https://www.doca.gov.mm
