တရုတ်နိုင်ငံသည် ၁၉၇၈ ခုနှစ်မှစ၍ “ပြုပြင်ပြောင်းလဲရေးနှင့် တံခါးဖွင့်” မူဝါဒကို ကျင့်သုံးလာခဲ့သောကြောင့် နိုင်ငံတကာမှ စီးပွားရေးလုပ်ငန်းများကို လာရောက်ထူထောင်လာကြသဖြင့် ၎င်း၏ စီးပွားရေးဖွံ့ဖြိုးလာလျက် ယနေ့မျက်မှောက်တိုးတက် သောနိုင်ငံ ဖြစ်လာခဲ့ခြင်းဖြစ်ပါသည်။ ၂၀၀၀ ပြည့်နှစ်ဝန်းကျင်မှစ၍ ကမ္ဘာ့ကုန်စည်ထုတ်လုပ်မှု ကွင်းဆက်တွင် အရေးပါသောထုတ်လုပ်သူဖြစ်လာပါသည်။
တရုတ်နိုင်ငံတွင် ဒေသအလိုက် ဝင်ငွေရရှိမှု မညီမျှခဲ့သော်လည်း တရုတ်အစိုးရက ဝင်ငွေတန်းတူညီမျှ ရရှိစေရန် တစိုက်မတ်မတ်ကြိုးပမ်းလာခဲ့သဖြင့် အဆင့် (၁)၊ (၂) နှင့် (၃) မြို့များတွင် ဝင်ငွေမညီမျှမှု နည်းပါးလာလျက်ရှိပါသည်။ (၂၀၁၇) ခုနှစ် ပထမ လေးလပတ်နှင့် (၂၀၁၈) ခုနှစ် ဒုတိယလေးလပတ်အကြား ပျမ်းမျှဝင်ငွေ တိုးတက်မှုနှုန်းမှာ (၇) ရာခိုင်နှုန်းရှိခဲ့ပြီး၊ အလားတူကာလတွင် စားသုံးသူများ၏ ဝယ်လိုအားမှာ (၆.၈) ရာခိုင်နှုန်းမှ (၁၀.၁) ရာခိုင်နှုန်းသို့ တိုးတက်လာခဲ့သည်ကို စာရင်းများအရ တွေ့ရပါသည်။ ၂၀၁၀ ခုနှစ်မှ ၂၀၁၇ ခုနှစ်အတွင်း တရုတ်အိမ်ထောင်စုများ၏ ငွေသုံးစွဲမှုမှာ (၃၁) ရာခိုင်နှုန်းတိုးတက်လာခဲ့ပါသည်။ အထူးသဖြင့် တရုတ်နိုင်ငံတွင် အလယ်အလတ် ဝင်ငွေရှိသော အိမ်ထောင်စုများ များပြားလာသဖြင့် နိုင်ငံ၏ စီးပွားရေးကို ကြီးမားစွာ အထောက်အကူပြုလာလျက်ရှိပါသည်။
ဖြတ်သန်းလာရသည့် တရုတ်နိုင်ငံ၏ စီးပွားရေးနှင့် လူမှုရေးမူဝါဒများအပေါ် အခြေခံလျက် တရုတ်စားသုံးသူများ၏ ပြုမူပုံနှင့် အရင်းခံအကြောင်းများကို လေ့လာကြည့်ခဲ့ရာ အဓိကအားဖြင့် အောက်ဖော်ပြပါ စားသုံးသူအုပ်စုများပါဝင်ကြကြောင်း တွေ့ရ ပါသည် -
(၁) (၁၉၆၀) ခုနှစ် မတိုင်မီ မွေးဖွားကြသူများ - ၎င်းတို့မှာ များသောအားဖြင့် ပင်စင်စားပုဂ္ဂိုလ်များဖြစ်ကြပြီး ခြိုးခြံစိစစ်သောပင်စင်စားများနှင့် ကြွယ်ဝသောပင်စင်စားများဟူ၍ (၂) ပိုင်းခွဲခြားနိုင်ပါသည်။ ၎င်းအမျိုးအစားတွင် ပါဝင်သူများမှာ ခက်ခဲကြမ်းတမ်းသော အချိန်ကာလကို ဖြတ်သန်းလာရသူများဖြစ်ကြပါသည်။ သို့ရာတွင် ခြိုးခြံစိစစ်သောပင်စင်စားများသည် ပညာရေးကို စနစ်တကျသင်ယူနိုင်ခဲ့ခြင်းမရှိဘဲ နိုင်ငံပိုင်လုပ်ငန်းများတွင် အလုပ်လုပ်ကိုင်ခဲ့ရသူများဖြစ်ကြ ပါသည်။ ထို့ကြောင့် ၎င်းပုဂ္ဂိုလ်များအနေဖြင့် ဈေးနှုန်းဆတ်ဆတ်ထိမခံသောအုပ်စုဖြစ်ကြပါသည်။ ကြွယ်ဝသောပင်စင်စားများမှာ အစိုးရဌာနများတွင် အလုပ်လုပ်ခဲ့သော၊ အစိုးရမှ ထောက်ပံ့ပေးသောလုပ်ငန်းများတွင် အလုပ်လုပ်ခဲ့သူများဖြစ်ကြပြီး ယေဘုယျအားဖြင့် လစာနှင့်ပင်စင်ခံစားခွင့် ပိုမိုမြင့်မားကြပါသည်။ ထို့ကြောင့် ၎င်းအုပ်စုတွင် ပါဝင်သူများမှာ ဈေးနှုန်းထက် အရည်အသွေးကို ပိုမိုဂရုစိုက်တတ်ကြပါသည်။
(၂) (၁၉၆၆) ခုနှစ်နှင့် (၁၉၇၆) ခုနှစ်ကြား ကာလများတွင် ကြီးပြင်းလာခဲ့သော စားသုံးသူများမှာ ယဉ်ကျေးမှုဆိုင်ရာတော်လှန်ရေးကာလအတွင်း အရွယ်ရောက်လာကြခြင်းဖြစ်ပြီး ခြိုးခြံစိစစ်သူများနှင့် ကြွယ်ဝသူများဟု နှစ်ပိုင်းခွဲခြားနိုင်ပါသည်။ ၎င်းတို့သည် ပြုပြင်ပြောင်းလဲရေးခေတ်ဉီးပိုင်းတွင် ကြီးပြင်းလာကြခြင်းဖြစ်သဖြင့် ရိုးရာရေစီးကြောင်းနှင့် ရေစီးကြောင်းအသစ်နှစ်ရပ်တို့အကြား ယိမ်းလေ့ရှိပါသည်။ ခြိုးခြံချွေတာသူများတွင် ဝင်ငွေအသင့်အတင့်သာရရှိပြီး၊ ကြွယ်ဝသူများတွင် များသော အားဖြင့် လစာပိုမိုမြင့်မားတတ်ပါသည်။ ထို့ကြောင့် ကြွယ်ဝသူများသည် အရည်အသွေးမြင့် ကုန်ပစ္စည်းများအပေါ် ငွေကြေးသုံးစွဲရန် ဆန္ဒရှိကြပြီး၊ ကလေးသူငယ် စောင့်ရှောက်မှုတာဝန် ပိုမိုနည်းပါးကြသောကြောင့် ဖျော်ဖြေရေး၊ ခရီးသွားခြင်း၊ အရည် အသွေးမြင့်ကျန်းမာရေးစောင့်ရှောက်မှုဆိုင်ရာ ပစ္စည်းများအပေါ် ငွေကြေးပိုမိုသုံးစွဲနိုင်ကြပါသည်။
(၃) တတိယအုပ်စုတွင်ပါဝင်သူများမှာ အသက် (၃၀) ဝန်းကျင်ရှိသော စားသုံးသူများဖြစ်ကြပါသည်။ ၎င်းအုပ်စုမှာ ပိုမိုပွင့်လင်းသော ပတ်ဝန်းကျင်တွင် ကြီးပြင်းလာခဲ့ကြကာ ပို၍ပညာတတ်ကြပါသည်။ ၎င်းအုပ်စုတွင် ပါဝင်ကြသူများမှာ ငွေနည်း နည်းစု၍ ဖျော်ဖြေရေးအပေါ် ငွေကြေးပိုမိုသုံးစွဲလိုကြ ပါသည်။ ၎င်း အုပ်စုတွင် ပါဝင်သူများမှာ ၎င်းတို့၏ မိဘများ၊ ကလေးများအတွက် ထောက်ပံ့ပေးကြပြီး၊ ၎င်းတို့ကိုယ်တိုင်အတွက်လည်း ငွေပမာဏ များများသုံးစွဲတတ်ကြပါသည်။
(၄) စတုတ္ထအုပ်စုတွင် ပါဝင်ကြသူများမှာ အိမ်ထောင်တစ်ခု၊ ကလေး တစ်ယောက် မူဝါဒအောက်တွင် မွေးဖွားကြီးပြင်းလာခဲ့ကြသော အသက် (၂၀) နှစ်ဝန်း ကျင်လူငယ်များဖြစ်ကြပါသည်။ ၎င်းလူငယ်များသည် ဈေးဝယ်ရာတွင် ၎င်းတို့၏ မိဘများနှင့် ဆန့်ကျင်ဘက်ဖြစ်ကြပြီး၊ ၎င်းတို့ ဝင်ငွေ၏ ကြီးမားသော အချိုးအစားကို ကုန်စည်နှင့် ဝန်ဆောင်မှု အမျိုးမျိုးတို့အပေါ် သုံးစွဲလေ့ရှိကြပါသည်။ အထူးသဖြင့် ၎င်းတို့သည် ခေတ်မီကုန်စည်များကို နှစ်သက်တတ်ကြပြီး၊ အွန်လိုင်းပေါ်မှ ဈေးဝယ် တတ်ကြပါသည်။ ၎င်းတို့အိမ်ထောင်ကျသွားသည့်အခါ ငွေကြေးစိစစ်သုံးစွဲတတ်ကြသော်လည်း ၎င်းတို့၏ မိဘမျိုးဆက်ထက် ငွေကြေးပိုမို သုံးစွဲကြသောအုပ်စုဖြစ်ပါသည်။
(၅) ပဉ္စမမြောက်အုပ်စုမှာ ကျေးလက်ရှိ မိသားစုများကို ထောက်ပံ့ရန် ကျေးလက်မှ မြို့ပြသို့ ပြောင်းရွှေ့အလုပ်လုပ်ကိုင်ကြသော အသက် (၂၅) နှစ်မှ (၄၅) နှစ်ကြား လုပ်သားများအုပ်စုဖြစ်ပါသည်။ ၎င်းအုပ်စုသည် ဈေးနှုန်းအနည်းအများကို အလွန်အာရုံထားတတ်ကြပြီး၊ ငွေကြေးသုံးစွဲမှု ထက်စုဆောင်းမှုကို ပိုမို စိတ်ဝင် စားကြပါသည်။ သို့ရာတွင် ၎င်းအုပ်စုမှာ ကြွယ်ဝလာရန် အလားအလာရှိပြီး၊ ထိုအခါ မြို့ပြတွင် နေထိုင်သူများကဲ့သို့ ငွေကြေးသုံးစွဲလာနိုင်ခြေရှိပါသည်။
(၆) တရုတ်စားသုံးသူများ၏ နောက်ဆုံးအုပ်စုမှာ ပိုင်ဆိုင်မှု ယွမ် (၁၅) သန်းအထက် ရှိသော “သူကြွယ်”များဖြစ်ကြပြီး၊ ၎င်းလူဉီးရေ၏ ထက်ဝက် ကျော်မှာ ဘေကျင်း၊ ကွမ်တုန်းနှင့် ရှန်ဟိုင်းမြို့များတွင် အများဆုံး နေထိုင်ကြသည်။ ၎င်းအုပ်စု သည် ဈေးနှုန်းကြီးမြင့်သည်ကို ဂရုမစိုက်သောအုပ်စုဖြစ်ပြီး အကောင်းဆုံး အရည်အသွေးရှိ ပစ္စည်းများကိုဝယ်ယူရန် စိတ်အားအထက်သန်ဆုံးဖြစ်ကြသည်။ ၎င်းအုပ်စုတွင် ပါဝင်သူများမှာ သွင်းကုန်ပစ္စည်းများကို အထူးစိတ်ဝင်စားတတ်ကြ ပါသည်။
လွန်ခဲ့သည့် (၁၀) နှစ်ခန့်က မြို့ပြတွင်နေထိုင်သော တရုတ်လူမျိုးအများစုတို့မှာ နှစ်စဉ်အိမ်ထောင်စုဝင်ငွေ (၁၄၀၀၀၀) ယွမ်ဝန်းကျင်ရှိသဖြင့် အစားအသောက်၊ အဝတ်အထည်နှင့် အိမ်ယာကဲ့သို့ အခြေခံလိုအပ်ချက်များကို ဖြည့်ဆည်းရန် လုံလောက်သော ငွေကြေးရှိခဲ့ပါသည်။ ယခုနှစ်များအတွင်း ၎င်းတို့၏ ဝင်ငွေမှာ (၁၄၀၀၀၀) ယွမ်မှ (၃၀၀၀၀၀) ယွမ်ကြား ရှိလာသဖြင့် စားသောက်ဆိုင်များတွင် စားသောက်ရန်၊ အလှကုန်များ ဝယ်ယူရန်၊ ခေတ်မီအိမ်သုံးပစ္စည်းများ ဝယ်ယူရန် နှင့် အားလပ်ရက်များတွင် ခရီးထွက်ရန်တို့အတွက် ငွေကြေးပိုလျှံလာကြပါသည်။
၂၀၁၉ ခုနှစ်၊ ဒီဇင်ဘာကုန်ပိုင်း၌ ထုတ်ပြန်ခဲ့သည့် McKinsey & Company ၏ တရုတ်ဈေးကွက်အစီရင်ခံစာအရ တရုတ်နိုင်ငံ၏ စားသုံးသူများ၏ ပြောင်းလဲ ရွေ့လျားမှု ရေစီးကြောင်းကို အောက်ဖော်ပြပါလမ်းကြောင်း (၅) ရပ်ဖြင့်တွေ့ရပါသည် -
(၁) မြို့ငယ်များဆီမှ ငယ်ရွယ်ပြီး သုံးစွဲနိုင်သောလူဉီးရေမှာ ယနေ့တရုတ် စီးပွားရေး အတွက် တွန်းအားတစ်ရပ်ဖြစ်သည်။
တရုတ်တစ်နိုင်ငံလုံး အတိုင်းအတာဖြင့် အသက် (၁၈)နှစ်မှ (၃၅)နှစ်ကြား လူငယ် မျိုးဆက်မှာ တစ်နိုင်ငံလုံး စားသုံးမှုအချိုးအစားတွင် ကြီးမားစွာ ပါဝင်ဖြည့်ဆည်း လျက်ရှိပါသည်။ (၂၀၁၆) ခုနှစ်အတွင်း ၎င်းအုပ်စု၏ လူသုံးကုန်ပစ္စည်းဝယ်ယူမှုမှာ ယွမ်ငွေ (၁.၅) ထရီလီယံခန့်ရှိခဲ့သည်ကို တွေ့ရပါသည်။ ထို့ပြင် ၎င်းအုပ်စုမှာ အင်တာနက်ပေါ်ပေါက်လာသောကြောင့် e-commerce platform ပေါ်မှ ဈေးဝယ်တတ်ကြပါသည်။
အဆင့် (၂) ၊ (၃) နှင့် (၄) ရှိ မြို့ငယ်များမှ အဓိကကျသော ဒစ်ဂျစ်တယ်နည်းပညာကို အသုံးပြုကြသော လူငယ်ဒေသခံများမှာ ၎င်းတို့၏ အနာဂတ်အတွက် အကောင်းမြင်ကြပြီး ၊ ငွေသုံးစွဲရာတွင် နည်းပညာပစ္စည်းအသစ်ဝယ်ယူမည် သို့မဟုတ် ပြည်ပသို့ ခရီးသွားမည် သို့မဟုတ် ဈေးကြီးသည့် အလှကုန်ဝယ်ယူမည်ဟူ သည်တို့အပေါ် စဉ်းစားမှု အနည်းငယ်မျှသာပြုတတ်ပြီး ငွေများများသုံးစွဲတတ်ကြပါသည်။ ၎င်းတို့၏ အလုပ်ပြီးဆုံးချိန်မှာ ညနေ (၅) နာရီနှင့် (၆) နာရီကြားဖြစ်ကာ၊ ၎င်းနောက်ပိုင်း၌ ပြင်ပသို့ထွက်၍ ညစာစားခြင်း၊ ဈေးဝယ်ခြင်းနှင့် မိတ်ဆွေသူငယ်ချင်းများနှင့် တွေ့ဆုံခြင်းတို့ကို ပြုတတ်ကြပါသည်။ ၎င်းလူငယ်လူဉီးရေမှာ စုစုပေါင်း လူဉီးရေ၏ (၂၅) ရာခိုင်နှုန်းခန့်သာ ရှိသော်လည်း ၂၀၁၈ ခုနှစ်အတွင်း ၎င်းတို့၏ သုံးစွဲမှုမှာ စုစုပေါင်းသုံးစွဲမှု၏ (၆၀) ရာခိုင်နှုန်း ခန့်ရှိပါသည်။
၎င်းလူငယ်များ ဝယ်ယူတတ်သော ကုန်ပစ္စည်းများ၏ တိုးတက်မှုအရ ဝယ်ယူမှုအများဆုံးမှ အနည်းဆုံးသို့ အစဉ်လိုက်အားဖြင့် အရက်၊ ဘီယာ၊ ခေါက်ဆွဲခြောက် ထုပ်များ၊ အချိုရည်၊ ချောကလက်၊ အသင့်သောက်လက်ဖက်ရည်၊ နို့မှုန့်၊ ကော်ဖီ၊ ဝိုင်အနီ၊ UHT နည်းပညာဖြင့် ထုတ်လုပ်ထားသော နို့၊ အားဖြည့်အချိုရည်၊ အလှကုန်များ၊ သောက်ရေသန့်၊ အားကစားအင်္ကျီနှင့် ဖိနပ်များ၊ ဒိန်ချဉ်၊ ကလေးသုံး အရေပြားထိန်းသိမ်းသည့်ပစ္စည်းများ ဖြစ်ကြပါသည် ။
၂၀၁၀ ခုနှစ်မှ ၂၀၁၈ ခုနှစ်အတွင်း အဆင့် (၃) နှင့် အဆင့် (၄) မြို့များရှိ နှစ်စဉ်ဝင်ငွေမှာ (၁၄၀၀၀၀) ယွမ်မှ (၃၀၀၀၀၀) ယွမ်ကြားရှိသော အိမ်ထောင်စုများ၏ တိုးတက်မှုနှုန်းမှာ (၃၈) ရာခိုင်နှုန်းရှိခဲ့ပြီး၊ အဆင့် (၁) နှင့် အဆင့် (၂) မြို့များ၌ အလားတူ ဝင်ငွေနှုန်းရှိသော အိမ်ထောင်စုများ၏ တိုးတက်မှုနှုန်းမှာ (၂၃) ရာခိုင်နှုန်းသာရှိခဲ့သည်ကိုတွေ့ရပါသည်။ အဆင့် (၃) နှင့် အဆင့် (၄) မြို့များ၌ တိုးတက်ခဲ့မှုမှာ မြို့ကြီးများ၏ လွန်ခဲ့သော (၅) နှစ်က လူဉီးရေ အချိုးအစားနီးပါး ရှိခဲ့ပါသည်။
၎င်းမြို့များရှိ လူငယ်များမှာ Pinduoduo ကဲ့သို့သော e-Commerce Platform များအတွက် အမှတ်တံဆိပ်ရှိပြီးသားကုန်ပစ္စည်းများ၏ ဈေးကွက်တိုးချဲ့ရာတွင် များစွာ အထောက်အကူဖြစ်ခဲ့ပါသည်။ ၎င်း e-Commerce Platformများပေါ်မှ ကုန်ပစ္စည်း အမှတ်တံဆိပ်ပေါင်း ထောင်ကျော်ကို ဝယ်ယူနိုင်ကြပြီး၊ မြို့ငယ်များဆီမှ ဝယ်ယူအားမှာ စုစုပေါင်းရောင်းချရမှု၏ (၁၀) ရာခိုင်နှုန်းမှ (၃၀) ရာခိုင်နှုန်းကြားရှိသည်ကို တွေ့ရပါသည်။
(၂) တရုတ်စားသုံးသူအများစုမှာ သုံးစွဲမှုနှင့်စပ်လျဉ်းပြီး ချင့်ချိန်တွေးတောလာကာ အရည်အသွေးကောင်းမွန်မှုကို ကောင်းစွာသိမြင်လာကြသည်။
အမှတ်စဉ် (၁) တွင် ဖော်ပြထားသော လူငယ်အုပ်စုမှအပ သက်လတ်တမ်း အလုပ်များပြီး ငွေကြေးသုံးစွဲနိုင်သော၊ ကုန်စည်နှင့် ဝန်ဆောင်မှုများအကြောင်း ဗဟုသုတရှိသော စားသုံးသူ (Discerning Consumers) အုပ်စုတွင် ပါဝင်သူအများစုမှာ ၎င်းတို့ ကိုယ်တိုင်ချမ်းသာကြွယ်ဝသည်ဟု ခံစားရသည့်တိုင် ငွေကြေးသုံးစွဲမှုအပေါ် သတိကြီးစွာထားလာကြောင်း ဖြေကြားခဲ့ကြပါသည်။ ၎င်းအုပ်စုတွင် ပါဝင်သော စားသုံးသူများမှာ အလုပ်များကြသဖြင့် ဖျော်ဖြေရေးတွင် အချိန်များစွာမပေးနိုင် ကြဘဲ၊ အရည် အသွေးပိုမိုမြင့်သော ကုန်ပစ္စည်းများကို ဈေးကောင်းကောင်းပေး၍ ဝယ်ယူရန် စိတ်ဝင်စားကြပါသည်။ ၂၀၁၂ ခုနှစ်မှ ၂၀၁၈ ခုနှစ်ကြားတွင် တရုတ် နိုင်ငံ၏ မြို့ပြများဆီမှ စားသုံးမှုများမှာ (၆၅) ရာခိုင်နှုန်းတိုးတက်လာခဲ့ကာ၊ ၂၀၁၈ ခုနှစ်အတွင်း လူတစ်ဉီးချင်း၏ ဝင်ငွေ (၉) ရာခိုင်နှုန်း တိုးတက်လာခဲ့ပါသည်၊
၎င်းအုပ်စု၏နောက်တွင် လိုအပ်မှဝယ်ယူသော စားသုံးသူ (Savvy Consumers) အုပ်စုရှိပါသည်။ ၎င်းတို့၏ ဝင်ငွေမှာ ငွေကြေးသုံးစွဲနိုင်သော လူငယ်စားသုံးသူအုပ်စု နှင့် အလုပ်များသော ငွေကြေးသုံးနိုင်သော သက်လတ်တမ်းအုပ်စုတို့ထက် နည်းပါး သောကြောင့် ဈေးပိုမိုနည်းပါးပြီး တာရှည်အသုံးခံသောပစ္စည်းအမျိုးအစားများကို ပိုမိုဝယ်ယူလိုကြပါသည်။ ၎င်းစားသုံးသူအုပ်စုတွင် အိမ်ထောင်ရှင် သက်လတ်ပိုင်းအမျိုးသမီးများပါဝင်ကာ ၎င်းတို့မှာ စရိတ်စကကြီးမားသော အဆင့် (၁) မြို့များတွင် နေထိုင်ကြသူများဖြစ်ကြပါသည်။ ၂၀၁၈ ခုနှစ်အတွင်း ၎င်းစားသုံးသူများ၏ သုံးစွဲမှုမှာ (၆)ရာခိုင်နှုန်းရှိခဲ့ပြီး၊ ၂၀၁၇ နှင့် နှိုင်းယှဉ်ပါက အသင့်စားခေါက်ဆွဲခြောက်၊ ဘီယာ၊ အချိုရည်၊ အားဖြည့် အချိုရည်၊ ဝိုင်အနီ၊ နွားနို့ တို့အပေါ် ဝယ်လိုအားကျဆင်း ခဲ့သည်ကို တွေ့ရပါသည်။
၎င်းအမျိုးအစား၏နောက်တွင် ပမာဏနည်းနည်းဖြင့် ဈေးသက်သာသော ကုန်စည်နှင့် ဝန်ဆောင်မှုများကို ဝယ်ယူသည့်စားသုံးသူ (Frugal Consumers)အုပ်စု ရှိကြပါသည်။ ၎င်းအုပ်စုတွင် ပါဝင်ကြသူများမှာ အဆင့် (၁) နှင့် အဆင့် (၂) မြို့များတွင် နေထိုင်ကြသည့် လူငယ်အိမ်ထောင်မရှိသူများ ဖြစ်ကြပါသည်။ ၂၀၁၈ ခုနှစ် အတွင်း ၎င်းတို့၏ ဝယ်လိုအားမှာ ၂၀၁၇ နှင့် နှိုင်းယှဉ်ပါက အသင့်စားခေါက်ဆွဲခြောက်၊ ချောကလက်၊ ကော်ဖီ၊ အရက်၊ အားဖြည့်အချိုရည်၊ ဝိုင်အနီ၊ သောက်ရေသန့် တို့အပေါ် ဝယ်လိုအားကျဆင်းခဲ့ကာ၊ နွားနို့၊ အရေပြားပြုပြင်ထိန်းသိမ်းသည့်ကုန်ပစ္စည်းများ၊ ဈေးနှုန်းသက်သာသည့် တရုတ်စားသောက်ဆိုင်များ၊ အလှကုန်များ၊ ထသွားထလာ အဝတ်အထည်များအတွက် ဝယ်လိုအားများလာသည်ကို တွေ့ရပါသည်။
(၃) ပိုမိုကျန်းမာသောလူနေမှုဘဝပုံစံကို ရွေးချယ်လိုလာကြသည်။
မြို့ပြများရှိ ဖိအားများ၊ ယာဉ်ကြောပိတ်ဆို့မှုများ၊ လေထုညစ်ညမ်းမှုများကြောင့် စားသုံးသူများက မိမိတို့ကိုယ်ကို ဂရုစိုက်လာကြပြီး၊ စားသောက်ကုန် စိတ်ချလုံခြုံ စေရေးအပြင် ကျန်းမာရေးနှင့် လူနေမှုဘဝပုံစံများနှင့်ဆက်နွယ်၍ ပိုမိုသုံးစွဲလာကြပါသည်။ ၂၀၁၉ ခုနှစ်အတွင်း အဆင့် (၁) မြို့များ၌ ကျန်းမာရေးနှင့် ပိုမို သင့်လျော် သည့် လတ်ဆတ်နွားနို့၊ UHT နည်းပညာဖြင့် ထုတ်လုပ်ထားသော နွားနို့ ၊ အလှကုန်များ၊ အရေပြားပြုပြင်ထိန်းသိမ်းသည့်ပစ္စည်းများ၊ ဒိန်ချဉ်၊ သောက်ရေသန့်၊ အားကစား အဝတ်အထည်နှင့် ဖိနပ်များကို ပိုမိုရွေးချယ်ဝယ်ယူလာကြပါသည်။
မြို့ကြီးများမှ စားသုံးသူများ၏ (၆၀) ရာခိုင်နှုန်းသည် အစားအစာထုပ်ပိုးမှုပေါ်တွင် တပ်ဆင်ထားသော ပါဝင်ပစ္စည်းများနှင့် အညွှန်းများကို ဖတ်ရှုပြီးမှ ဝယ်ယူ လာကြပါသည်။ လတ်ဆတ်နွားနို့နှင့် ဒိန်ချဉ်ကို ဝယ်လိုအားအများဆုံးဖြစ်လာပြီး အထူးသဖြင့် သဘာဝပစ္စည်းများဖြင့် ထုတ်လုပ်ထားသော ဒိန်ချဉ်ကို ကျန်းမာရေး လိုက်စားသူများရော၊ ငွေကြေးသုံးစွဲနိုင်သူ လူငယ်အုပ်စုကပါ ပိုမိုဝယ်လိုအားမြင့်မားလာသည်ကို တွေ့ရပါသည်။
(၄) တရုတ်နိုင်ငံသားများသည် မိမိကိုယ်တိုင် စွန့်စားပြီး သွားရသော၊ လူစုနည်းနည်း ဖြင့်သွားရသော၊ ဈေးကြီးသည့်နေရာများကိုသွားရသော ခရီးများကို ပိုမို ရွေးချယ်လာကြသည်။
တနည်းအားဖြင့် ပိုမိုခေတ်မီသော ခရီးသွားများ ဖြစ်လာပါသည်။ ၂၀၁၄ ခုနှစ်မှ ၂၀၁၈ ခုနှစ်အတွင်း တရုတ်၏ မြို့ကြီးများမှ ခရီးသွားသူဉီးရေ တိုးတက်မှုနှုန်းမှာ (၁၄)ရာခိုင်နှုန်းဖြစ်ပါသည်။ တရုတ်မှ ခရီးသွားများသည် ၎င်းတို့၏ ခရီးစဉ်ကို ၎င်းတို့ ကိုယ်တိုင်စီစဉ်သွားလာလိုကြပါသည်။ အုပ်စုလိုက် ခရီးသွား ရန်စီစဉ်ကြသည့်အခါ တရုတ်ပြည်အတွင်း၌ ယူနန်နှင့် စီချွမ်းပြည်နယ်တို့ကို သွားလာရန် စီစဉ်လေ့ရှိကြပါသည်။ အဆင့် (၁) မြို့များမှ ခရီးသွားသူများသည် တရုတ် နိုင်ငံ၏ ပြင်ပသို့ သွားရောက် လိုကြပြီး ခရီးစဉ်တစ်ခုလျှင် (၈) ရက်နှင့်အထက် လည်ပတ်လိုကြသည်ကို တွေ့ရပါသည်။ တရုတ်မှ ဧည့်သည်များသည် ဟောင်ကောင်၊ ထိုင်ဝမ်၊ မကာအိုစသည့် ဒေသများ၊ ဂျပန်၊ ကိုရီးယားနှင့် အရှေ့တောင်အာရှနိုင်ငံများသို့သာမက ဉရောပနှင့် မြောက် အမေရိကရှိနိုင်ငံများ၊ အိုက်စ်လန်ကဲ့သို့ ရောက်ခဲလှသော နေရာများသို့ပါ သွားရောက်လာကြသည်ကို တွေ့ရပါသည်။
(၅) အရည်အသွေးမြင့် ဈေးကြီးသော တရုတ်ကုန်အမှတ်တံဆိပ်များကို ပိုမိုတောင်းဆို လာကြသည်။
Godiva ချောကလက်၊ Gillette မုတ်ဆိတ်ရိပ်ဓား၊ Gucci မျက်မှန်၊ Mercedes SUVs စသည့် အနောက်နိုင်ငံမှ တံဆိပ်များမှာ တရုတ်နိုင်ငံတွင် လူလတ်တန်းစားများ အသုံးပြုကြသည့် ခေတ်မီတံဆိပ်များဖြစ်ကြပါသည်။ ယခုနောက်ပိုင်းတွင် တရုတ်မှ ထုတ်လုပ်သူအများစုမှာ ၎င်းတို့ပစ္စည်းများအပေါ် ဈေးနှန်းသက်သာ စေရန် အာရုံစိုက်မှု အစားအရည်အသွေးအဆင့်မြှင့်တင်ရေး ပိုမိုအာရုံစိုက်လာကြပါသည်။
ယခုအခါ တရုတ်စားသုံးသူများက စစ်တမ်းမေးခွန်းတွင် မေးမြန်းထားသည့် ပစ္စည်းအမယ်(၁၉)မျိုးအနက် အမယ် (၁၃)မျိုးအား တရုတ်ပြည်တွင်းမှ ထုတ်လုပ်သည် ကို ဝယ်ယူလိုကြကြောင်း ဖြေကြားခဲ့ပါသည်။ ၎င်းပစ္စည်းများစာရင်း၌ အိမ်သာသုံးစက္ကူ များ၊ အိမ်သန့်ရှင်းရေးသုံးပစ္စည်းများ၊ နို့နှင့် လတ်ဆတ်သော စားသောက်ကုန်များစသည့် အခြေခံပစ္စည်းများအပြင် တယ်လီဖုန်း၊ ကွန်ပျူတာတက်ဘလက်များ၊ ဘီယာကဲ့သို့ နေ့စဉ်လူနေမှုဘဝသုံးပစ္စည်းများ၊ ရေခဲသေတ္တာကဲ့သို့သော အိမ်ထောင်သုံး ပစ္စည်းများပါဝင်ကြပါသည်။ ထိုကဲ့သို့ဖြေကြားသူဉီးရေမှာ စုစုပေါင်းဖြေကြားသူဉီးရေ၏ (၃၃) ရာခိုင် နှုန်းမှ (၅၇) ရာခိုင်နှုန်းကြား ရှိပါသည်။
ယခုနောက်ပိုင်း၌ တရုတ်နိုင်ငံသည် အရည်အသွေးမြင့် ဒစ်ဂျစ်တယ်ပစ္စည်းများ၊ အရေပြားပြုပြင်ထိန်းသိမ်းသည့်ပစ္စည်းများ၊ အလှကုန်များနှင့် ဝိုင်အနီတို့ကို ထုတ် လုပ်သော ထိပ်တန်းနိုင်ငံများအနက် တစ်နိုင်ငံဖြစ်လာပါသည်။ ထို့ပြင် အဝတ်အထည် နှင့်ပတ်သက်၍လည်း Ms. Min၊ Ming Ma နှင့်Angel Chenတို့ ကလည်း အနောက် နိုင်ငံများမှ အဝတ်အထည်တံဆိပ်များနှင့်တန်းတူ တရုတ်နိုင်ငံထုတ် အဝတ်အထည် များကို ဖွံ့ဖြိုးလာလျက်ရှိသည်။ တရုတ်နိုင်ငံမှ Icicleအမှတ်တံဆိပ် အဝတ်အထည် များကို တရုတ်သုံးစွဲသူအတော်များများက နှစ်သက်စွာဝယ်ယူလာကြပါသည်။
အကြံပြုချက်များ
အထက်တွင်ဖော်ပြခဲ့သည့် အချက်များအပေါ် အခြေခံလျက် တရုတ်ဈေးကွက် နှင့်စပ်လျဉ်းသည့်သုံးသပ်အကြံပြုချက်အချို့ထွက်ပေါ်လာပါသည်။ ပထမအချက် အနေဖြင့် ပြည်ပမှ လုပ်ငန်းများအနေဖြင့် အဆင့် (၃)နှင့် အဆင့်(၄)မြို့တော်များရှိ ငွေကြေး သုံးစွဲနိုင်သော လူငယ်များ၏ ဝယ်လိုအားကို သတိပြုမိကြပြီး၊ ၎င်းတို့ မည်သည့် ပစ္စည်းများ ကို ကြိုက်နှစ်သက်သည်ဟူသည်ကို သေချာစွာနားလည်စေရန် ဆောင်ရွက်သင့်ပါသည်။ ၎င်းလူငယ်အင်အားစုအား ဆွဲဆောင်နိုင်သည့်၊ ဝယ်ယူလာချင်အောင် လှုံ့ဆော်နိုင်သည့် ပစ္စည်းများကို ထုတ်လုပ်၍ ရည်မှန်းရာဈေးကွက်များဆီသို့ ရောက်ရှိစေရေး ဖြန့်ချိ ဆောင်ရွက်သင့်ပါသည်။ ၎င်းလူငယ်များအနေဖြင့် ခေတ်မီရှော့ပင်းမောလ်များနှင့် အွန်လိုင်း platformများတွင် အချိန်ဖြန်းနိုင်ကြသဖြင့်၊ ၎င်းတို့၏ မြို့များတွင် ကျင်းပသော ပျော်ပွဲ ရွှင်ပွဲများ၊ ကုန်စည်ပြပွဲများတွင် ပါဝင်ပြသခြင်းနှင့် Wechatနှင့် (Tik Tok နှင့် အလားတူ) Douyin လူမှုကွန်ယက်များမှ ကြော်ငြာခြင်း သို့မဟုတ် အွန်လိုင်း ပဟေဠိများနှင့် ဂိမ်းများ ဖန်တီးခြင်း သို့မဟုတ် mini-programများ ပြုလုပ်ခြင်းတို့မှာ ထိရောက်သည့် နည်းလမ်းများဖြစ်လာပါသည်။
ဒုတိယအချက်အနေဖြင့် တရုတ်နိုင်ငံရှိ မြို့ပြနေလူဉီးရေ၏ (၃၀) ရာခိုင်နှုန်းမှာ ဈေးဝယ်ရာတွင် စဉ်းစားတတ်ကြသူများနှင့် တန်ဖိုးနည်းသည်ကို ဝယ်ယူတတ်ကြသူ များဖြစ်ကြပါသည်။ ၎င်းတို့အား ဆက်လက်ထိန်းထားရန် Pinduoduo ကဲ့သို့သော e-Commerce ဆောင်ရွက်နေသူများနှင့် ပူးပေါင်းဆောင်ရွက်သင့်ပါသည်။
တတိယအချက်မှာ မြို့ပြနေလူဉီးရေ၏ (၇၂) ရာခိုင်နှုန်းမှာ ပိုမိုကျန်းမာသော လူနေမှုဘဝပုံစံကို တက်ကြွစွာရှာဖွေလျက်ရှိကြပါသည်။ ထို့ကြောင့် ကုန်ပစ္စည်းအမှတ် တံဆိပ်အမျိုးမျိုးတို့မှာ ကျန်းမာရေးဟူသော ရှုထောင့်မှ ပုံဖော်နိုင်သည့် အခွင့်အလမ်း များစွာရှိပါသည်။ ဉပမာ ဗီတာမင်နှင့် ဖြည့်စွက်စာများထုတ်လုပ်ကြသည့် ကုမ္ပဏီများအနေဖြင့် ဆေးဖက်ဝင်သော၊ သဘာဝအတိုင်း ထုတ်လုပ်ထားသော ပစ္စည်းများဖြစ်ကြောင်း အလေးထားဖော်ပြကြလျက် ကာကွယ်စောင့်ရှောက်မှုများ တွင် ၎င်းတို့၏ တန်ဖိုးကိုမြှင့်တင်နိုင်ကြပါသည်။ ကုန်ပစ္စည်းများရောင်းချခြင်းအပြင် အခြားကျန်းမာသော လူနေမှုဘဝပုံစံများကိုပါ ကုမ္ပဏီများက ပါဝင်ဖြည့်ဆည်း ပေးနိုင်ပါသည်။ ဥပမာ-အားကစားရုံနှင့် ကျန်းမာရေးစင်တာဖွင့်လှစ်ထားသူများက ဖျော်ရည်ဘား ကောင်တာများနှင့် အနားယူအပန်းဖြေရန်နေရာများကို ထည့်သွင်းနိုင်ပါသည်။
စတုတ္ထအချက်အနေဖြင့် ယနေ့ခေတ်တွင် တရုတ်ခရီးသွားများက ပုံသေသတ်မှတ် ထားသောခရီးစဉ်များကို လူအများဖြင့် သွားရောက်လည်ပတ်ခြင်းအား ငြီးငွေ့ လာကြပါသည်။ ထို့ပြင် တရုတ်စားသုံးသူများသည် တန်ဖိုးမြင့်ကုန်စည်နှင့် ဝန်ဆောင်မှုများ ကို သာမက အမှတ်တရဖြစ်မည့် အတွေ့အကြုံများကိုပါ ရှာဖွေလာကြ ပါသည်။ အချို့ လက်လီတံဆိပ်များမှာ ၎င်းတို့၏ဖောက်သည်များအတွက် အမှတ်တရအတွေ့အကြုံများ ရရှိစေရန် ဖန်တီးပေးလာကြသည်ကို တွေ့ရပါသည်။ ဥပမာ Lululemon က ပုံမှန်အတန်းများနှင့် ကြီးမားသော ယောကပွဲများအပေါ် ဗဟိုပြုလျက် ၎င်း၏ဖောက်သည်များအတွက် ကျန်းမာရေးနှင့် ယောဂအသိုက်အဝန်းကို တည်ဆောက်ပေးထားပါသည်။ Nikeကလည်း Nike by Youအစီအစဉ်မှနေ၍ ဖောက်သည် စိတ်ကြိုက်ဖိနပ် များပြုလုပ်ပေးခြင်းဖြင့် ၎င်းတို့၏ ဖောက်သည်များနှင့် အပြန်အလှန်ဆက်သွယ်မှုကို တည်ဆောက်ပေးထားပါသည်။
ယခုနောက်ပိုင်းတွင် နာမည်ကျော် နိုင်ငံစုံကုမ္ပဏီကြီးများကလည်း တရုတ်နိုင်ငံ နှင့် ပူးပေါင်းလျက် ၎င်းတို့၏ ပစ္စည်းများတွင် တရုတ်နိုင်ငံ၏ အထိမ်းအမှတ်များကို ထည့်သွင်းကြလျက် ခေတ်မီဆန်းပြားခြင်းနှင့် အစစ်အမှန်ဖြစ်ခြင်း ရသများကို ဖန်တီး ဆန်းသစ်လျက်ရှိပါသည်။ မကြာသေးမီက L’Orealသည် တရုတ်နိုင်ငံ၏ အမျိုးသား ပြတိုက်နှင့် ပူးပေါင်းလျက် တရုတ်၏ အနုပညာမြောက်အမွေအနှစ်ကို ထင်ဟပ်စေသည့် နှုတ်ခမ်းနီ(၅)မျိုးကို အကန့်အသတ်ဖြင့် ထုတ်လုပ်ထားပါသည်။ တနည်းအားဖြင့် တရုတ်မှ စားသုံးသူများသည် ၎င်းတို့၏ ယဉ်ကျေးမှုနှင့် မူလဖြစ်မှုကို ဖော်ညွှန်းသည့် ပစ္စည်းများကို ပိုမိုခုံမင်တောင့်တလာကြသည်ကို တွေ့ရပါသည်။
(မြန်မာစီးပွားရေးသံမှူး၊ နန်နင်း)
