အိန္ဒိယနိုင်ငံ၌ မလိုလားအပ်သော စွက်ဖက်အရေးယူမှုများကို ဖယ်ရှားခြင်းဖြင့် စီးပွားရေးလုပ်ကိုင်ဆောင်ရွက်မှုများ လွယ်ကူမှုရှိစေရန်အတွက် ၂၀၀၉ ခုနှစ်တွင် ပြဌာန်းခဲ့သော တိကျစွာတိုင်းတာမှုအက်ဥပဒေပါ ရာဇဝတ်ကြောင်းအရ အရေးယူရန် ပြဌာန်းချက်များအား ဖြေလျော့နိုင်ရေး အမျိုးသားအဆင့် အလုပ်ရုံဆွေးနွေးပွဲတစ်ရပ်ကို အိန္ဒိယစားသုံးသူရေးရာဦးစီးဌာနက ၉-၅-၂၀၂၂ နေ့တွင် စီစဉ်ကျင်းပရာ တိကျစွာတိုင်းတာမှု လုပ် ငန်းနယ်ပယ်မှ တာဝန်ရှိသူများ၊ ပြည်နယ်အစိုးရအဖွဲ့များမှ ကိုယ်စားလှယ်များ ပါဝင်တက်ရောက် ဆွေးနွေးခဲ့ကြကြောင်း သိရှိရပါသည်။

အဆိုပါ ဆွေးနွေးပွဲ၌ ရာဇဝတ်ကြောင်းအရ အရေးယူရမည့် ဥပဒေပြဌာန်းချက်များအား ဖြေလျော့မှုပြုရာ၌ သဘောတရားထက် လက်တွေ့ကျစွာ ချဉ်းကပ်လုပ်ဆောင်ရန်လိုကြောင်း၊ စားသုံးသူများ၏ အကျိုးစီးပွားနှင့် စီးပွားရေးလုပ်ငန်းများအတွက် လွန်ကဲသည့်အခက်အခဲများ မဖြစ်ပေါ်စေ ရေး ဥပဒေပြဌာန်းချက်များအား ရှင်းလင်းလွယ်ကူအောင် ဆောင်ရွက်မှုတို့အကြား ညီညွှတ်မျှတမှုရှိမည့် အစပြုလုပ်ဆောင်မှုများကို ကူညီပံ့ပိုးပေး ရန် ပြည်နယ်များသို့ တိုက်တွန်းလိုကြောင်း၊ အထူးသဖြင့် စီးပွားရေးလုပ်ငန်းငယ်များအတွက် အလေးပေးဆောင်ရွက်ရန်ဖြစ်ကြောင်း၊ စားသုံးသူ များအနေဖြင့် မတရားမှုနှင့် တွေ့ကြုံရခြင်းမရှိစေရန်မှာ အစိုးရဌာနများ၏ တာဝန်ဖြစ်သကဲ့သို့ တစ်ချိန်တည်းမှာပင် လုပ်ငန်းရှင်များ၏ စီးပွားရေး လုပ်ငန်းများ အေးချမ်းစွာလုပ်ကိုင်နိုင်စေရန်အတွက် တာဝန်ရှိသည်ကိုလည်း နားလည်ထားရမည်ဖြစ်ကြောင်း၊ အဓိကအားဖြင့် မရိုးဖြောင့်သော သဘောဖြင့် လုပ်ကိုင်မှုနှင့် ရိုးသားဖြောင့်မတ်စွာ လုပ်ဆောင်မှုတို့ကို ခွဲခြားနိုင်ရေး ဦးတည်ချက်ထားရှိရန်ဖြစ်ကြောင်း၊ ဥပမာအားဖြင့် အလေးချိန် နှင့် အချင်အတွယ်တိုင်းတာသည့်ကိရိယာများ စံကိုက်ညှိခြင်း (calibration) ကို မမှန်မကန်ပြုလုပ်ထားပါက တင်းကြပ်စွာ အရေးယူဆောင်ရွက်ရ မည်ဖြစ်ကြောင်း စသည်ဖြင့် အိန္ဒိယ ကူးသန်းရောင်းဝယ်ရေးနှင့် စက်မှုဝန်ကြီးဌာနနှင့် စားသုံးသူရေးရာ၊ စားနပ်ရိက္ခာနှင့် ပြည်သူ့ဖြန့်ဖြူးမှုရေးရာ ဝန်ကြီးဌာနတို့၏ ပြည်ထောင်စုဝန်ကြီး Mr. Piyush Goyal က အမှာစကားပြောကြားခဲ့ပါသည်။

ဝန်ကြီး Mr. Piyush Goyal ၏ ပြောဆိုမှုအရ တိကျစွာတိုင်းတာမှု ဥပဒေပါပြဌာန်းချက်အချို့အပေါ် ပထမအကြိမ် ဖောက်ဖျက်ကျူးလွန်မှုများ၏ ၉၇% ခန့်ကို ပြည်နယ်အစိုးရများက စာရင်းရေးသွင်းဖော်ပြမှုရှိသော်လည်း တူညီသည့်ဥပဒေပုဒ်မအား ဒုတိယအကြိမ်ကျူးလွန်မှုကို ဖော်ပြအရေး ယူဆောင်ရွက်မှုမှာ နည်းပါးကြောင်း သိရှိရသည်။ သို့ဖြစ်ရာ ထိုကဲ့သို့ ဒုတိယအကြိမ် ပြစ်မှုကျူးလွန်ခြင်းများမရှိကြောင်း အစီရင်ခံတင်ပြမှုများနှင့် ပတ်သက်၍ ပြည်နယ်များ၌ မည်သို့ဆောင်ရွက်ထားသည်မှာ မေးခွန်းထုတ်စရာဖြစ်ကြောင်းနှင့် ပြည်နယ်အစိုးရများအနေဖြင့် ရာဇဝတ်ကြောင်း အရအရေးယူရန် ပြဌာန်းချက်များအား ဖြေလျော့ခြင်းအား ဆန့်ကျင်ကန့်ကွက်သည့်သဘောရှိသည်ကို ကိန်းဂဏန်းအချက်အလက်များက ဖော်ပြ လျက်ရှိကြောင်းဖြင့် ၎င်းက ပြောကြားပါသည်။

အိန္ဒိယ စားသုံးသူရေးရာဦးစီးဌာန၏ စာရင်းများအရ ၂၀၁၈-၁၉ ခုနှစ်အတွင်း ပြည်နယ်/ ပြည်ထောင်စုနယ်မြေများ၌ ပထမအကြိမ် ပြစ်မှုကျူးလွန် သည်ဟု စာရင်းရေးသွင်းထားသည့် အမှုပေါင်း ၁၁၃၇၄၅ ခုရှိပြီး ၎င်းအနက် အမှုပေါင်း ၉၇၆၉၀ မှာ ညှိနှိုင်းကျေအေးခဲ့ကြောင်း၊ အဆိုပါနှစ်အတွင်း တူညီသည့် ဥပဒေပုဒ်မအား ဒုတိယအကြိမ် ဖောက်ဖျက်ကျူးလွန်သည့် အမှုပေါင်း ၁၂ ကိုသာ မှတ်တမ်းတင်ခဲ့ပြီး ၎င်းတို့အနက် အမှု ၄ ခုကိုသာ တရားရုံး၌ အမှုဖွင့်လှစ်ဆောင်ရွက်ခဲ့ကြောင်း သိရှိရသည်။ ၂၀၂၁-၂၂ ခုနှစ်တွင် ပထမအကြိမ် ပြစ်မှုကျူးလွန်မှု ၇၄၇၂၁ ခုကို မှတ်တမ်းတင်ထားရှိ ပြီး ၎င်းအနက် အမှု ၅၅၇၇၉ မှုကို ညှိနှိုင်းကျေအေးခဲ့ကြောင်း၊ ဒုတိယအကြိမ် ပြစ်မှုကျူးလွန်မှုမှာ ၁၁ မှုရှိပြီး ၎င်းအနက် အမှု ၇ ခုကို တရားရုံးတင် စစ်ဆေးခဲ့ကြောင်း သိရှိရသည်။

အိန္ဒိယအစိုးရသည် စီးပွားရေးလုပ်ငန်းများအပေါ် ဝန်ထုပ်ဝန်ပိုးလျော့ချရေး၊ ရင်းနှီးမြှုပ်နှံသူများအကြား ယုံကြည်မှုကို လှုံ့ဆော်နိုင်ရေး၊ စီးပွားရေး တိုးတက်မှုနှင့် စားသုံးသူများ၏ အကျိုးစီးပွား အကာအကွယ်ပေးရေးတို့ကို ရှေ့ရှုလျက် ၂၀၀၉ ခုနှစ်၊ တိကျစွာတိုင်းတာမှု အက်ဥပဒေပါ ရာဇဝတ် ကြောင်းအရ အရေးယူရန် ပြဌာန်းချက်များအား ဖြေလျော့ခြင်းကို ဆောင်ရွက်မည်ဖြစ်ကြောင်း သိရှိရပါသည်။

(မြန်မာစီးပွားရေးသံမှူး၊ နယူးဒေလီမြို့)
Source:    1. National Workshop to discuss decriminalization of Legal Metrology Act, 2009, 8-5-2022, Press Information Bureau of India
          2. Shri Piyush Goyal emphasises balance between need to protect consumers, and preventing harassment of entrepreneurs, 9-5-2022, Press Information Bureau of India