တရုတ်နိုင်ငံသို့ အေးခဲထားသောဒူးရင်းသီးများ တင်ပို့ရန်အတွက် လက်ရှိတွင် ဖိလစ်ပိုင်နိုင်ငံမှ လုပ်ငန်း(၃)ခုသည် တရုတ်နိုင်ငံ၏ တင်သွင်းလာသောစားသောက်ကုန်လုပ်ငန်းများအတွက် မှတ်ပုံတင်စနစ် (China’s Import Food Enterprise Registration system) မှတစ်ဆင့် မှတ်ပုံတင်ထားသည်ဟု Davao City Durian Industry Council ၏ ဥက္ကဋ္ဌ Emmanuel Belviz က မကြာသေးမီက ကြေညာခဲ့ကြောင်း ဖိလစ်ပိုင်မီဒီယာတစ်ခု၏ ဖော်ပြ ချက်အရ သိရှိရပါသည်။ အဆိုပါလုပ်ငန်း(၃)ခုမှာ Eng Seng Food Products ၊ SQ Fresh Fruit Corporation နှင့် D' Farmers Market Fruits and Pastries Center တို့ဖြစ်ကြောင်း သိရှိရပါသည်။
၂၀၂၄ ခုနှစ်၊ ဩဂုတ်လတွင် တရုတ်နိုင်ငံ၏ အကောက်ခွန်အထွေထွေအုပ်ချုပ်အာဏာပိုင်အဖွဲ့၏ သွင်းကုန်နှင့် ပို့ကုန်အစားအသောက်ဘေးကင်းရေးဗျူရို (the Bureau of Import and Export Food Safety)သည် အေးခဲထားသောသစ်သီးများတင်သွင်းမှုအတွက် ၎င်း၏ လိုအပ်ချက်များကို ပြောင်းလဲမှုတစ်ရပ်ပြုလုပ်ခဲ့ပြီး အေးခဲထားသောသစ်သီးထုတ်ကုန်များအတွက် ဈေးကွက်ဝင်ရောက်ခွင့်ဆိုင်ရာ လိုအပ်ချက်များကို ဖယ်ရှားပေးခဲ့ကြောင်း၊ ထိုပြုပြင်ပြောင်းလဲမှုသည် ကမ္ဘာတစ်ဝန်းရှိ မည်သည့်ဒေသမှမဆို အေးခဲဒူးရင်းသီးများအပါအဝင် အေးခဲထားသော သစ်သီးမျိုးစုံကို ပုံမှန်တင်သွင်းခြင်းဆိုင်ရာ Quarantine လုပ်ငန်းစဉ်များမလိုအပ်ဘဲ တရုတ်ဈေးကွက်သို့ ဝင်ရောက်ခွင့်ပြုခဲ့ကြောင်း သိရှိရပါသည်။
တရုတ်နိုင်ငံသို့ အေးခဲထားသော ဒူးရင်းသီးများ တိုက်ရိုက်တင်ပို့မှုကို ယခင်က ခွင့်မပြုသဖြင့် တရုတ်နိုင်ငံသို့ တင်ပို့ခြင်းမပြုမီ ထိုင်းနိုင်ငံမှတစ်ဆင့် တင်ပို့ရခြင်းဖြစ်ကြောင်း၊ ယခုအခါ အေးခဲသစ်သီးများ တင်သွင်းမှုအပေါ် ကန့်သတ်ချက်များ ရုပ်သိမ်းလိုက်ပြီဖြစ်သောကြောင့် တင်ပို့သူများသည် ၎င်းတို့၏ အေးခဲထားသော ဒူးရင်းသီးများကို တရုတ်နိုင်ငံသို့ တိုက်ရိုက်တင်ပို့ရန် လျှောက်ထားလာကြသည်ဟု Belviz က ပြောကြားခဲ့ကြောင်း သိရှိရပါသည်။
လက်ရှိအချိန်တွင် ထိုင်းနိုင်ငံသည် ဖိလစ်ပိုင်နိုင်ငံမှ အေးခဲထားသောဒူးရင်းသီးများကို အများဆုံးဝယ်ယူသည့် နိုင်ငံဖြစ်ပြီး ယခုနှစ်တွင် မက်ထရစ်တန် (၃,၁၃၀)ခန့် တင်ပို့ခဲ့ကာ ၎င်းနောက်တွင် တောင်ကိုရီးယား (၁၈၆ မက်ထရစ်တန်)နှင့် မလေးရှားနိုင်ငံ (၂၆ မက်ထရစ် တန်)တို့ဖြစ်ကြောင်း သိရှိရပါသည်။
Davao City Durian Industry Council မှ အချက်အလက်များအရ Davao ဒေသမှ တရုတ်နိုင်ငံသို့ လတ်လတ်ဆတ်ဆတ် ဒူးရင်းသီးတင်ပို့မှုသည် ယခုနှစ် ပထမကိုးလအတွင်း (၉,၂၉၅) မက်ထရစ်တန်အထိ ရောက်ရှိခဲ့ပြီး စင်ကာပူသို့ (၅၆)မက်ထရစ်တန်နှင့် ဂျပန်နိုင်ငံသို့ (၁၈၄)ကီလိုဂရမ်သာ တင်ပို့ခဲ့ကြောင်း သိရှိရပါသည်။ ဒူးရင်းသီးတင်ပို့မှု စုစုပေါင်းသည် (၉၃၅၁) မက်ထရစ်တန်ရှိပြီး ၂၀၂၃ ခုနှစ်တွင် တင်ပို့ခဲ့သည့် (၄၀၈၈)မက်ထရစ်တန်၏ နှစ်ဆကျော်ရှိကြောင်း သိရှိရပါသည်။
Davao ၏ ဒူးရင်းသီးရာသီသည် လက်ရှိအချိန်အထိ ဆက်လက်ရှိနေပြီး အမြင့်ပိုင်းဒေသများတွင် အသီးများခူးဆွတ်နေဆဲဖြစ်ကြောင်း၊ တင်ပို့သူများသည် ၎င်းတို့၏ မှတ်ပုံတင်ခြင်းလုပ်ငန်းစဉ် အောင်မြင်ပါက ရာသီကုန်သည်နှင့် အေးခဲထားသော ဒူးရင်းသီးများကို ပိုမိုတင်ပို့နိုင်မည်ဖြစ်ကြောင်း သိရှိရပါသည်။
အောက်တိုဘာလလယ်၌ ကျင်းပခဲ့သည့် မီဒီယာဖိုရမ်တစ်ခုတွင် တရုတ်နိုင်ငံသို့ လတ်လတ်ဆတ်ဆတ် ဒူးရင်းသီးတင်ပို့မှုနှင့်ပတ်သက်၍ Belviz က ဆွေးနွေးရာတွင် ဒူးရင်းသီး၏ဆူးများပျက်စီးခြင်းနှင့် အသီးအပွန်းပဲ့ခြင်းများကို ကာကွယ်ရန် ခူးဆွတ်စဉ်တွင် ဒူးရင်းသီးများကို မြေပေါ်မချရဟု အလေးပေးပြောကြားခဲ့ပြီး ဝယ်ယူသူများထံမှ တိုင်ကြားမှုများကို ရှောင်ရှားရန် တင်ပို့သူများအနေဖြင့် ဒူးရင်းသီးများ အမှည့်လွန်ခြင်းနှင့် အသီးပုတ်ခြင်း မရှိစေရေး သေချာစွာ ဆောင်ရွက်သင့်သည်ဟု အလေးပေးပြောကြားခဲ့ကြောင်း သိရှိရပါသည်။
ဖိလစ်ပိုင်နိုင်ငံသည် လတ်လတ်ဆတ်ဆတ် ဒူးရင်းသီးတင်ပို့မှု၌ တစ်ကမ္ဘာလုံးတွင် အဆင့် (၆)နေရာ၌ ရပ်တည်နေပြီး Davao ဒေသသည် ဖိလစ်ပိုင်နိုင်ငံ၏ ဒူးရင်းသီး စုစုပေါင်းထွက်ရှိမှု၏ (၇၈)ရာခိုင်နှုန်းရှိကြောင်းနှင့် အဆိုပါဒေသသည် ၂၀၂၃ ခုနှစ်တွင် ဒူးရင်းသီး (၆၀,၃၃၁)မက်ထ ရစ်တန် ထွက်ရှိခဲ့ပြီး ယခင်နှစ်ကထက် (၂.၉) ရာခိုင်နှုန်းခန့် တိုးလာခဲ့ကြောင်း သိရှိရပါသည်။
ယခုအခါ တရုတ်နိုင်ငံသည် အေးခဲထားသော သစ်သီးများတင်သွင်းခြင်းအတွက် quarantine requirement များကို ဖြေလျော့လိုက်ပြီဖြစ်၍ မြန်မာနိုင်ငံမှ ဒူးရင်းသီး၊ ထောပတ် သီးစသည့် သစ်သီးများကို အေးခဲထားသည့်ပုံစံဖြင့် တင်ပို့နိုင်မည်ဖြစ်ရာ China’s Import Food Enterprise Registration system(CIFER)၌ ဝင်ရောက်မှတ်ပုံတင်၍ တရုတ်ဈေးကွက်သို့ မြန်မာ နိုင်ငံမှ သစ်သီးများ တိုးမြှင့်တင်ပို့နိုင်ရေး ဆောင်ရွက်သင့်ပါသည်။
Source: https://www.producereport.com/article/philippines-ready-export-frozen-durians-china
(စီးပွားရေးသံမှူး၊ နန်နင်းမြို့)
