ထိုင်းနိုင်ငံ၌ ၂၀၂၅ ခုနှစ် ပထမ(၂)လအတွင်း နိုင်ငံခြားရင်းနှီးမြှုပ်နှံမှုသည် စီမံကိန်းအရေအတွက်တွင် ၆၈ ရာခိုင်နှုန်းတိုးတက်မှုရှိခဲ့ပြီး တန်ဖိုးအားဖြင့် ၃၃ ရာခိုင်နှုန်းတိုးတက်မှုရှိခဲ့ကြောင်း အစိုးရ၏ ဒုတိယပြောရေးဆိုခွင့်ရှိသူ Ms. Sasikarn Watthanachan က ပြောကြားချက်အရ သိရှိရပါသည်။
နိုင်ငံခြားစီးပွားရေးလုပ်ငန်း အက်ဥပဒေ(၁၉၉၉)အရ ဇန်နဝါရီလနှင့် ဖေဖော်ဝါရီလအတွင်း နိုင်ငံခြားရင်းနှီးမြှုပ်နှံမှုလျှောက်လွှာ ၁၈၁ ခုအပေါ် ခွင့်ပြုခဲ့ပြီး ယခင်နှစ် ကာလတူနှင့်နှိုင်းယှဉ်ပါက ၆၈ ရာခိုင်နှုန်းတိုးတက်မှုရှိခဲ့ကြောင်း၊ ရင်းနှီးမြှုပ်နှံမှုစီမံကိန်း ၄၁ ခုသည် နိုင်ငံခြားစီးပွားရေးလုပ်ငန်းလိုင်စင်လျှောက်ထားမှုလမ်းကြောင်းမှဖြစ်ပြီး ၁၄၀ ခုသည် နိုင်ငံခြားစီးပွားရေးလုပ်ငန်းလက်မှတ်လျှောက်ထားမှုမှဖြစ်ကြောင်း၊ ရင်းနှီးမြှုပ်နှံမှုတန်ဖိုးဘတ် ၃၅.၂ ဘီလီယံရှိပြီး ယခင်နှစ် ကာလတူထက် ၃၃ ရာခိုင်နှုန်း တိုးတက်မှုရှိခဲ့ရာ အလုပ်အကိုင် ၁,၃၄၄ ခု ဖန်တီးပေးနိုင်ခဲ့ကြောင်း၊ ထိပ်တန်းရင်းနှီးမြှုပ်နှံသည့် နိုင်ငံ ၅ ခုမှာ ဂျပန်(စီမံကိန်း ၃၈ ခု၊ တန်ဖိုးအားဖြင့် ဘတ် ၁၃.၆ ဘီလီယံ)၊ တရုတ်(စီမံကိန်း ၂၃ ခု၊ တန်ဖိုးအားဖြင့် ဘတ် ၅.၁၁ ဘီလီယံ)၊ စင်ကာပူ(စီမံကိန်း ၂၃ ခု၊ တန်ဖိုးအားဖြင့် ဘတ် ၄.၄၉ ဘီလီယံ)၊ အမေရိကန်(စီမံကိန်း ၂၃ ခု၊ တန်ဖိုးအားဖြင့် ဘတ် ၁.၃၇ ဘီလီယံ)နှင့် ဟောင်ကောင်(စီမံကိန်း ၁၆ ခု၊ တန်ဖိုးအားဖြင့် ဘတ် ၁.၅၉ ဘီလီယံ)တို့ဖြစ်ကြောင်း သိရှိရပါသည်။
နိုင်ငံခြားရင်းနှီးမြှုပ်နှံမှုများဆောင်ရွက်သည့်နေရာမှာ အရှေ့ဖက်စီးပွားရေးစင်္ကြံတွင်ဖြစ်ပြီး ရင်းနှီးမြှုပ်နှံမှု ၅၇ ခု ရှိပါကြောင်း၊ ဂျပန်မှရင်းနှီးမြှုပ်နှံသူ ၁၉ ဦး၊ တရုတ်မှရင်းနှီးမြှုပ်နှံသူ ၁၄ ဦး၊ စင်ကာပူမှ ၈ ဦးနှင့် အခြားသောနိုင်ငံများမှ ၁၆ ဦးဖြစ်ကြောင်း၊ အရှေ့ဖက်စီးပွားရေးစင်္ကြံတွင် ရင်းနှီးမြှုပ်နှံမှုသည် သိသိသာသာမြင့်တက်လာခဲ့ပြီး ယခင်နှစ်ကာလတူနှင့်နှိုင်းယှဉ်ပါက ၆၃ ရာခိုင်နှုန်း တိုးတက်မှုရှိခဲ့ကြောင်း၊ နိုင်ငံခြားရင်းနှီးမြှုပ်နှံမှုများသည် ထိုင်းနိုင်ငံသားများအတွက် အထူးပြုထားသော ဗဟုသုတနှင့် နည်းပညာမျှဝေရာတွင် အထောက်အကူပြုပါကြောင်း၊အစိုးရအနေဖြင့်လည်း နိုင်ငံကိုဒေသတွင်းရင်းနှီးမြှုပ်နှံမှုအချက်အချာဖြစ်စေရန်အတွက် စက်မှုကဏ္ဍတိုးမြှင့်ရန်နှင့် ထိုင်းနိုင်ငံ၏ ယှဉ်ပြိုင်စွမ်းအားကိုမြှင့်တင်ရန် ရင်းနှီးမြှုပ်နှံမှုများကို ဆွဲဆောင်သွားမည်ဖြစ်ကြောင်း၊ ထို့ပြင် နည်းပညာသစ်နှင့် ဗဟုသုတများကို ထိုင်းလုပ်သားများထံ မျှဝေခြင်းဖြင့် စဉ်ဆက်မပြတ်သော စီးပွားရေးတိုးတက်မှုအခွင့် အလမ်းများကို ဖန်တီးသွားမည်ဖြစ်ကြောင်း Ms. Sasikarn က ဖြည့်စွက်ပြောကြားခဲ့သည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
