၂၀၂၂-၂၀၂၃ ဘဏ္ဍာနှစ်အတွင်း ကုန်သွယ်မှုပိုငွေ ဒေါ်လာသန်း ၁၅၀၀ ရှိရန် ရည် မှန်းထားသော်လည်း ၁၁ လခွဲအတွင်း  ကုန်သွယ်မှုလိုငွေ ဒေါ်လာ ၇၅၄ သန်းကျော်အထိ ဖြစ်ပေါ်နေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်သည့်စာရင်းများအရ သိရသည်။ ၂၀၂၂-၂၀၂၃ ဘဏ္ဍာနှစ် ဧပြီမှ မတ်လအထိကာလအတွင်း မြန်မာနိုင်ငံ၏ ပြည်ပကုန်သွယ်မှုပမာဏတွင် ပို့ကုန်ကဏ္ဍမှ ဒေါ်လာ ၁၅ ဒသမ ၅ဘီလီယံ(၁၅၅၀၀ သန်း)၊ သွင်းကုန်ကဏ္ဍမှ ဒေါ်လာ ၁၄ဘီလီယံ(၁၄၀၀၀ သန်း)ဖြင့် စုစုပေါင်းကုန်သွယ်မှုဒေါ်လာ ၂၉ ဒသမ ၅ ဘီလီယံ(၂၉၅၀၀ သန်း)၊ ကုန်သွယ်မှုပိုငွေ ဒေါ်လာသန်း ၁၅၀၀ ရရှိရန် ရည်မှန်းထားကြောင်း ၂၀၂၂-၂၀၂၃ ဘဏ္ဍာနှစ် အရအသုံးခန့်မှန်းခြေ ငွေစာရင်းဆိုင်ရာ အချက်အလက် များအရ သိရသည်။

       ၂၀၂၂-၂၀၂၃ ဘဏ္ဍာနှစ် ဧပြီမှ မတ် ၁၇ ရက်အထိ ပို့ကုန်တန်ဖိုး ဒေါ်လာ ၁၅၉၅၂ ဒသမ ၄၆၁ သန်း(၁၅ ဒသမ ၉၅၂ ဘီလီယံ)၊ သွင်းကုန်တန်ဖိုးဒေါ်လာ ၁၆၇၀၇ ဒသမ ၀၅၂  သန်း(၁၆ ဒသမ ၇၀၇ ဘီလီယံ)ရှိခဲ့ကာ ကုန်သွယ်မှုလိုငွေ ဒေါ်လာ ၇၅၄ ဒသမ ၅၉၁ သန်း ဖြစ်ပေါ်ခဲ့သည်။ ၂၀၂၂-၂၀၂၃ ဘဏ္ဍာနှစ် ဧပြီမှ မတ် ၁၇ ရက်အထိ မြန်မာနိုင်ငံ၏ စုစုပေါင်း ကုန်သွယ်မှုပမာဏဒေါ်လာ ၃၂ ဒသမ ၆၅၉ ဘီလီယံရှိပြီး ယခင်နှစ် ကာလတူက ဒေါ်လာ ၂၈  ဒသမ ၆၄၂ ဘီလီယံရှိသည်။ လက်ရှိဘဏ္ဍာ နှစ် ၁၁လခွဲတွင် ယခင်နှစ်ကာလတူထက် ပြည်ပကုန်သွယ်မှုဒေါ်လာ ၄ ဒသမ ၀၁၆ ဘီလီယံအထိ ပိုမိုဆောင်ရွက်နိုင်ခဲ့ခြင်းဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ သိရသည်။

       အဆိုပါကာလအတွင်း ပြည်ပနိုင်ငံများသို့ တင်ပို့သည့် ပို့ကုန်ပမာဏဒေါ်လာ ၁၅ ဒသမ ၉၅၂ ဘီလီယံရှိပြီး ယခင်နှစ်ကာလတူထက် ၁ ဒသမ ၃၆၈ ဘီလီယံပိုမိုတင်ပို့နိုင်ခဲ့ခြင်းဖြစ်သည်။ ထို့အတူ ပြည်ပနိုင်ငံများမှ တင်သွင်းသည့်သွင်းကုန်ပမာဏ ဒေါ်လာ ၁၆ ဒသမ ၇၀၇ ဘီလီယံရှိပြီး ယခင်နှစ်ကာလတူ ထက် ဒေါ်လာ ၂ ဒသမ ၆၄၇ ဘီလီယံ ပိုမိုတင်သွင်းထားခြင်းဖြစ်သည်။ မြန်မာနိုင်ငံအနေဖြင့် ပြည်ပနိုင်ငံများ သို့လယ်ယာထွက်ပစ္စည်း၊ တိရစ္ဆာန်ထွက်ပစ္စည်း၊ ရေထွက်ပစ္စည်း၊ သတ္တုတွင်းပစ္စည်း၊ သစ်တောထွက်ပစ္စည်း၊ စက်မှုကုန်ချော၊ အခြားကုန်ပစ္စည်းများကို တင်ပို့လျက်ရှိသည်။

    ပြည်ပနိုင်ငံများသို့ ရင်းနှီးမြှုပ်နှံမှုပစ္စည်း၊ လုပ်ငန်းသုံးကုန်ကြမ်းပစ္စည်း၊ လူသုံးကုန်ပစ္စည်း၊ CMP ကုန်ကြမ်းစသည်တို့ကို အဓိက တင်သွင်းနေခြင်းဖြစ်သည်။ မြန်မာနိုင်ငံမှ ပို့ကုန်တိုးမြှင့်တင်ပို့နိုင်ရေးအတွက် အမျိုးသားပို့ကုန်မဟာဗျူဟာ အကောင်အထည်ဖော်နေပြီး အမျိုးသားပို့ကုန်မဟာဗျူဟာ ၂၀၂၀- ၂၀၂၅ ၏ အဓိက ဦးစားပေးကဏ္ဍများတွင် လယ်ယာထွက်ကုန် ပစ္စည်းအခြေခံစားသောက်ကုန်ထုတ်လုပ်ခြင်းကဏ္ဍ၊ အထည်အလိပ်နှင့်အဝတ်အထည်ကဏ္ဍ၊ စက်မှုနှင့်လျှပ်စစ်ပစ္စည်းကဏ္ဍ၊ ရေထွက်ကုန်လုပ်ငန်းကဏ္ဍ၊ သစ်တောထွက်ပစ္စည်းကဏ္ဍ၊ ဒစ်ဂျစ်တယ်ထုတ်ကုန်များနှင့် ဝန်ဆောင်မှုကဏ္ဍ၊ ထောက်ပံ့ပို့ဆောင်ရေး ဝန်ဆောင်မှုကဏ္ဍ၊ အရည်အသွေးစီမံခန့်ခွဲမှုကဏ္ဍ၊ ကုန်သွယ်မှုသတင်းအချက်အလက် ဝန်ဆောင်မှုကဏ္ဍ၊ တီထွင်ဆန်းသစ်မှုနှင့် စွန့်ဦးတီထွင်ဆောင်ရွက်ခြင်းကဏ္ဍစသည်တို့ ပါဝင်ကြောင်းသိရသည်။

     ၂၀၂၀-၂၀၂၁ ဘဏ္ဍာနှစ် အောက်တိုဘာမှ စက်တင်ဘာလကုန်အထိ မြန်မာနိုင်ငံ၏ ပြည်ပ ကုန်သွယ်မှုတွင် ပို့ကုန်ဒေါ်လာ ၁၄၉၂၇ ဒသမ ၀၆၅ သန်း(၁၄ ဒသမ ၉၂၇ ဘီလီယံ)၊ သွင်းကုန်ဒေါ်လာ ၁၄၆၅၈ ဒသမ ၀၈၄ သန်း (၁၄ ဒသမ ၆၅၈ ဘီလီယံ) ဖြင့် ကုန်သွယ်မှုပမာဏဒေါ်လာ ၂၉၅၈၅ ဒသမ ၁၄၉ သန်း (၂၉ ဒသမ ၅၈၅ ဘီလီယံ) ရရှိခဲ့သည်။ ၂၀၁၉-၂၀၂၀ ဘဏ္ဍာနှစ် အောက်တိုဘာမှ စက်တင်ဘာလအထိ ပို့ကုန်တန်ဖိုး ဒေါ်လာ ၁၇၆၈၁ ဒသမ ၀၈၇ သန်း၊ သွင်းကုန်တန်ဖိုး ဒေါ်လာ ၁၉၀၅၀ ဒသမ ၈၅၅ သန်းဖြင့် ကုန်သွယ်မှုပမာဏ ဒေါ်လာ ၃၆၇၃၁ဒသမ ၉၄၂ သန်းရရှိခဲ့သည်။ ၂၀၁၈-၂၀၁၉ ဘဏ္ဍာနှစ်တွင် ပို့ကုန် ဒေါ်လာ ၁၇၀၆၀ ဒသမ ၄၁၅ သန်း၊ သွင်းကုန် ဒေါ်လာ ၁၈၀၈၆ ဒသမ ၅၉၇ သန်းဖြင့် ကုန်သွယ်မှု ပမာဏဒေါ်လာ ၃၅၁၄၇ ဒသမ ၀၁၂ သန်းရရှိခဲ့သည်။

Source: https://news-eleven.com