တရုတ်ရင်းနှီးမြှုပ်နှံသူများ သဘောကျသည့် ဒေသများဖြစ်သည့် အမေရိကန်နှင့် ဩစတြေးလျကဲ့သို့သော ဒေသများတွင် နိုင်ငံရေးအရကွဲပြားမှုနှင့် အတိုးနှုန်းမြင့်မားမှုများကြောင့် အရှေ့တောင်အာရှဒေသ၏ စီးပွားရေးဆိုင်ရာ အဆောက်အဦဈေးကွက်သည် တရုတ်ရင်းနှီးမြှုပ်နှံသူများအကြားတွင် ရေပန်းစားမှု တိုးတက်လာခဲ့ကြောင်း အာရှဒေသ၏ အိမ်ခြံမြေနည်းပညာ လုပ်ငန်းဖြစ်သည့် Juwai IQI ၏ အစီရင်ခံတစ်စောင်တွင် ဖော်ပြထားပါသည်။

တရုတ်နိုင်ငံပြင်ပ အိမ်ခြံမြေရောင်းဝယ်မှုအတွက် တရုတ်ရင်းနှီးမြှုပ်နှံသူများကို အဆွဲဆောင်နိုင်ဆုံးနေရာမှာ အင်ဒိုနီးရှားဖြစ်ပြီး၊ မလေးရှားနိုင်ငံမှ တတိယနှင့် ထိုင်းနိုင်ငံမှာ ပဉ္စမအဆွဲဆောင်နိုင်ဆုံး ဈေးကွက်များဖြစ်ကြောင်း အစီ ရင်ခံစာတွင်ဖော်ပြထားပါသည်။ ၂၀၂၂ ခုနှစ်တွင် အင်ဒိုနီးရှားနှင့် မလေးရှားနိုင်ငံတို့သည် စတုတ္ထနှင့် ပဉ္စမနေရာတွင် ရပ်တည်ခဲ့ပြီး၊ ထိုင်းနိုင်ငံသည် ဆွဲဆောင်မှုအရှိဆုံး ၅ နိုင်ငံစာရင်းတွင်ပင် ပါဝင်ခဲ့ခြင်းမရှိပေ။

ဆန့်ကျင်ဘက်အနေဖြင့် ယခင်နှစ်က ရင်းနှီးမြှုပ်နှံမှု ပြုလုပ်ရန် အားသာသည့် ဒေသဖြစ်ခဲ့သည့် အမေရိကန်မှာ ာထိပ်ဆုံး ၅ နိုင်ငံတွင် မပါဝင်တော့သကဲ့သို့ ယခင်နှစ်က ဒုတိယနေရာတွင်ရှိခဲ့သည့် ဩစတြေးလျနိုင်ငံမှာလည်း စတုတ္ထနေရာသို့ ကျဆင်းသွားခဲ့ပါသည်။

တရုတ်နိုင်ငံနှင့် အပြန်အလှန် ကူးသန်းရောင်းဝယ်မှုအရ တိုးတက်လာခြင်းကြောင့် ထိုအရှေ့တောင်အာရှနိုင်ငံများကို တရုတ်ရင်းနှီးမြှုပ်နှံသူများ မျက်စေ့ကျလာကြောင်းနှင့် ၎င်းတို့၏ စီးပွားရေးတိုးတက်မှုလျှင်မြန်ခြင်းကြောင့် မြေယာဖော်ထုတ်ခြင်း၊ ခရီးသွားလုပ်ငန်းဆိုင်ရာ အဆောက်အဦများ၊ industrial park များ၊ စက်မှုနှင့် ထောက်ပံ့ပို့ဆောင်ရေးဆိုင်ရာ အဆောက်အဦများ တည်ဆောက်ခြင်းအတွက် အခွင့်အလမ်းများရရှိနိုင်ကြောင်း အစီရင်ခံစာတွင်ဖော်ပြထားပါသည်။

ဧပြီလတွင် ထုတ်ပြန်ခဲ့သည့် အပြည်ပြည်ဆိုင်ရာငွေကြေးရန်ပုံငွေအဖွဲ့၏ ခန့်မှန်းချက်အရ ယခုနှစ်တွင်အင်ဒိုနီးရှား၊ မလေးရှားနှင့် ထိုင်းနိုင်ငံတို့၏ စီးပွားရေးတိုးတက်မှုနှုန်း ၃.၄ နှင့် ၅ ရာခိုင်နှုန်းအကြားရှိမည်ဖြစ်ကြောင်းနှင့် အမေရိကန်နှင့် ဩစတြေးလျနိုင်ငံတို့မှာ ၁.၆ ရာခိုင်နှုန်းသာရှိဖြစ်ကြောင်း ဖော်ပြထားပါသည်။

အတိုးနှုန်းအနေဖြင့် အမေရိကန်နိုင်ငံတွင် ၅.၂၅ ရာခိုင်နှုန်း ၊ ဩစတြေးလျနိုင်ငံတွင် ၄.၁ ရာခိုင်နှုန်း ရှိနေချိန်တွင် အင်ဒိုနီးရှား၊ မလေးရှားနှင့် ထိုင်းနိုင်ငံတို့တွင် ၂ ရာခိုင်နှုန်းမှ ၅.၇၅ ရာခိုင်နှုန်းအကြားတွင်ရှိနေပါသည်။

သို့ဖြစ်၍ တိုးတက်မှုအလားအလာကောင်းသည့် ထိုအရှေ့တောင်အာရှနိုင်ငံများသည် ရင်းနှီးမြှုပ်နှံသူများအတွက် ဆွဲဆောင်မှုမြင့်တက်လျက်ရှိကြောင်း Juwai IQI ၏ အစီရင်ခံစာတွင် ဖော်ပြထားပါသည်။

အစိုးရ၏ တင်းကြပ်သည့် အရင်းအနှီးထိန်းချုပ်မှုဖြင့် တရုတ်နိုင်ငံ၏ ပြည်ပရင်းနှီးမြှုပ်နှံမှုများကို ထိန်းချုပ်ထားပြီး အဆိုပါ အရှေ့တောင်အာရှနိုင်ငံများတွင် စီမံကိန်းလုပ်ကိုင်ခွင့် အလွယ်တကူရရှိခြင်းကြောင့်  ထိုနိုင်ငံများအတွက် အားသာနေကြောင်း အစီရင်ခံစာတွင် ဖော်ပြထားပါသည်။

ပြီးခဲ့သောနှစ်များအတွက် ကုန်သွယ်မှုနှင့် နည်းပညာဆိုင်ရာ အငြင်းပွားမှုများကြောင့် တရုတ်နှင့် အမေရိကန်နိုင်ငံတို့အကြား ဆက်ဆံရေးမှာ ဆိုးရွားလာခဲ့သကဲ့သို့ ဩစတြေးလျနှင့် ဆက်ဆံရေးမှာလည်း သိသိသာသာ ကောင်းမွန်လာခြင်းမရှိပေ။

အမေရိကန်နှင့် ဩစတြေးလျနိုင်ငံတို့အနေဖြင့် ၎င်းတို့၏ ငွေရေးကြေးရေးမူဝါဒများကို တင်းတင်းကြပ်ကြပ် ပြန်လည်လုပ်ဆောင်ခဲ့လျှင်ပင် တရုတ်ရင်းနှီးမြှုပ်နှံသူများ အရှေ့တောင်အာရှဒေသ၏ စီးပွားရေးဆိုင်ရာ အဆောက်အဦဈေးကွက်သို့ ဦးလှည့်သွားခြင်းကို တားဆီးနိုင်တော့မည်မဟုတ်ပေ။

အတိုးနှုန်းကိစ္စရပ်တည်ခုတည်းကြောင့် အမေရိကန်၏ စီးပွားရေးဆိုင်ရာ အဆောက်အဦများတွင် တရုတ်ရင်းနှီး မြှုပ်နှံမှုကျဆင်းသွားခြင်းမဟုတ်ကြောင်း Juwai IQI ၏ ပူးတွဲတည်ထောင်သူနှင့် CEO ဖြစ်သူ Kashif Ansari က ပြောကြားခဲ့ပါသည်။

(စီးပွားရေးသံမှူး၊ ဟောင်ကောင်)