ဂျပန်နိုင်ငံ၏ စီးပွားရေးဖွံ့ဖြိုးတိုးတက်မှုနှုန်းမှာ ၂၀၂၅ ခုနှစ်၊ ဇန်နဝါရီလ တွင် ၀.၅ ရာခိုင်နှုန်း ကျဆင်းခဲ့
ဂျပန်နိုင်ငံ၏ နှစ်စဉ်စီးပွားရေးဖွံ့ဖြိုးတိုးတက်မှုနှုန်းမှာ ၂၀၂၅ ခုနှစ်၊ ဇန်နဝါရီလတွင် ၂၀၂၄ ခုနှစ်၊ ဒီဇင်ဘာလနှင့်နှိုင်းယှဉ်ပါက ၀.၅ ရာခိုင်နှုန်းကျဆင်းခဲ့ကြောင်း Japan Center for Economic Research ၏ ထုတ်ပြန်ချက်အရ သိရှိရကြောင်း ၁၂-၃-၂၀၂၅ ရက်နေ့ထုတ် The Nikkei Asia သတင်းစာတွင် “Japan's economy shrinks 0.5% in January from December: JCER” ခေါင်းစဉ်ဖြင့် ဖော်ပြခဲ့ပါသည်။
အဆိုပါသတင်းတွင် အမေရိကန်သမ္မတဒေါ်နယ်ထရန့်အနေဖြင့် သမ္မတအဖြစ် တာဝန်ထမ်းဆောင် ပြီးနောက်တွင် ကုန်သွယ်ရေးဆိုင်ရာမရေရာမှုများမြင့်မားလာသည့်အတွက် ပြည်ပမှ ဝယ်လိုအား သိသိ သာသာကျဆင်းခဲ့ကာ ဂျပန်နိုင်ငံ၏ပို့ကုန်တင်ပို့မှုကျဆင်းပြီး သွင်းကုန်တင်သွင်းမှု များပြားလာခဲ့ကြောင်း၊ ငွေကြေးဖောင်းပွမှုကို ထည့်သွင်းတွက်ချက်ထားသည့် ဂျပန်နိုင်ငံ၏ ပြည်တွင်းအသားတင်ထုတ်လုပ်မှု နှင့်ဝန်ဆောင်မှုတန်ဖိုး(GDP)မှာ ဇန်နဝါရီလမှ မတ်လ အထိ ၃ လပတ်ကာလတွင် ဇန်နဝါရီလ၌ ရှိခဲ့သည့် GDP အတိုင်း ဆက်လက်ရရှိနေမည်ဆိုပါက ဂျပန်နိုင်ငံ၏ စီးပွားရေးဖွံ့ဖြိုးတိုးတက်မှုနှုန်းမှာ ယခင် ၃ လပတ်ကာလနှင့်နှိုင်းယှဉ်ပါက ၁.၅ ရာခိုင်နှုန်း များပြားလာနိုင်မည်ဖြစ်ကြောင်း ဖော်ပြထား ပါသည်။
ဂျပန်နိုင်ငံမှ အီးယူနိုင်ငံများသို့ တင်ပို့မှုမှာ ၂၃.၈ ရာခိုင်နှုန်း၊ အမေရိကန်နိုင်ငံသို့ တင်ပို့မှုမှာ ၆.၄ ရာခိုင်နှုန်း၊ တရုတ်နိုင်ငံသို့ တင်ပို့မှုမှာ ၇.၇ ရာခိုင်နှုန်းနှင့် အာရှနိုင်ငံများသို့ တင်ပို့မှုမှာ ၃.၅ ရာခိုင်နှုန်းကျဆင်းခဲ့ခြင်းကြောင့် ပို့ကုန်မှာ ၂.၈ ရာခိုင် နှုန်းကျဆင်းခဲ့ကြောင်း၊ ကုန်ကြမ်းများတင်သွင်းမှုမှာ ၆.၄ ရာခိုင်နှုန်းမြင့်တက်ခဲ့ခြင်းအပါအဝင် သွင်းကုန်များ များပြားခဲ့ခြင်းကြောင့် သွင်းကုန်စုစုပေါင်းမှာ ၄.၃ ရာခိုင် နှုန်းမြင့်တက်ခဲ့ကြောင်း၊ ထို့ကြောင့် အသားတင်တင်ပို့မှုကျဆင်းခဲ့ပြီး၊ စီးပွားရေးဖွံ့ဖြိုးတိုးတက်မှုကို ၁.၄ ရာခိုင်နှုန်းကျဆင်းစေခဲ့ခြင်းဖြစ်ကြောင်း ဖော်ပြထားပါသည်။
၂၀၂၅ ခုနှစ်၊ ဇန်နဝါရီလတွင် ဂျပန်နိုင်ငံသို့ ပြည်ပခရီးသွားဧည့်သည်လာရောက်မှုမှာ ယခင်လစံချိန်ကို ကျော်လွန်ခဲ့ပြီး၊ ခရီးသွားဝန်ဆောင်မှုဆိုင်ရာ ပို့ကုန်မှာ မြင့်တက်ခဲ့ကြောင်း၊ မော်တော်ယာဉ်အသစ်များရောင်းချရမှုမှာ ၅.၂ ရာခိုင်နှုန်းမြင့်တက်ခဲ့ခြင်းကြောင့် ပုဂ္ဂလိကဝယ်ယူသုံးစွဲနိုင်စွမ်းမှာ ၂.၆ ရာခိုင်နှုန်းများပြားခဲ့ကြောင်း၊ အကြွေးဝယ်ကဒ်သုံးစွဲမှုများကို စိစစ်ရာ၌ ဝယ်ယူသုံးစွဲမှုများတွင် ဝန်ဆောင်မှုများအတွက် သုံးစွဲခဲ့မှုမှာ အများဆုံးဖြစ်ခဲ့ပြီး အိမ်ထောင်ပရိဘောဂနှင့် အဝတ်အထည် ဝယ်ယူမှုမှာမူ ကျဆင်းခဲ့ကြောင်း ဖော်ပြထားပါသည်။
စက်ပစ္စည်းများမှာယူမှု ကျဆင်းခဲ့သည့်အတွက် တစ်ပိုင်းလျှပ်ကူးပစ္စည်းထုတ်လုပ်သည့်စက်ပစ္စည်းများနှင့် Integrated Circuit Chips ကဲ့သို့သောသတင်းအချက် အလက်နှင့် နည်းပညာဆိုင်ရာထုတ်ကုန်များထုတ်လုပ်မှုကျဆင်းခဲ့ပြီး ပုဂ္ဂလိကစီးပွားရေးလုပ်ငန်းများ၏ ရင်းနှီးမြှုပ်နှံမှုမှာ ၂.၅ရာခိုင်နှုန်းကျဆင်းခဲ့ကြောင်း ဖော်ပြ ထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
