ဂျပန်အစိုးရအနေဖြင့် ပြည်ပကုမ္ပဏီများထံမှ ဆိုက်ဘာလုံခြုံရေးဆိုင်ရာဝန်ဆောင်မှုများအပေါ် မှီခိုနေရမှုကို လျှော့ချနိုင်ရေးအတွက် ပြည်တွင်းဆိုက်ဘာလုံခြုံရေးကဏ္ဍဖွံ့ဖြိုးတိုးတက်လာစေရေးအားပေးဆောင်ရွက်သွားမည်ဖြစ်ကြောင်း ၁၆-၃-၂၀၂၅ ရက်နေ့ထုတ် The Kyodo News သတင်းစာတွင် “Japan gov’t to support domestic cybersecurity firms” ခေါင်းစဉ်ဖြင့် ဖော်ပြခဲ့ပါသည်။

အဆိုပါသတင်းတွင် လာမည့်ဧပြီလမှစတင်မည့် ၂၀၂၅ ဘဏ္ဍာနှစ်မှ ၁၀ နှစ်တာကာလအတွင်း ပြည်တွင်းဆိုက်ဘာလုံခြုံရေးဆိုင်ရာရောင်းချရမှုပမာဏကို လက်ရှိရောင်းအားပမာဏ ၉၀၀ ဘီလီယံယန်းမှ ၃ ထရီလီယံယန်း(အမေရိကန်ဒေါ်လာ ၂၀.၂ ဘီလီယံ)အထိ ၃ ဆကျော်မြှင့်တင်နိုင်ရေး ဆောင်ရွက်သွားမည်ဖြစ်ကြောင်း ဖော်ပြထားပါသည်။

ဂျပန်နိုင်ငံမှ သုံးစွဲသူများအနေဖြင့် ဗိုင်းရပ်စ်ကာကွယ်ရေးဆော့ဝဲလ်နှင့်အခြားသော ဆိုက်ဘာလုံခြုံရေးဆိုင်ရာ ဝန်ဆောင်မှုများရယူရာတွင် ဂုဏ်သတင်းကောင်းမွန်မှုနှင့် ဈေးနှုန်းများအပေါ်မူတည်၍ ပြည်တွင်းမှ ဆိုက်ဘာဝန်ဆောင်မှုများထက် ပြည်ပမှ ဝန်ဆောင်မှုများကို အဓိကထားသုံးစွဲလေ့ရှိကြကြောင်း ဖော်ပြထားပါသည်။

ဂျပန်နိုင်ငံသို့ ဦးတည်လာမည့် ဆိုက်ဘာတိုက်ခိုက်မှုများကြောင့်ဖြစ်ပေါ်လာမည့် သက်ရောက်မှုများကို ကာကွယ်နိုင်သည့် ထုတ်ကုန်များကို ထုတ်လုပ်နိုင်ရေးနှင့် ဆိုက်ဘာခြိမ်းခြောက်မှုများကို ဖော်ထုတ်နိုင်ရန်အတွက် ပြည်တွင်းကုမ္ပဏီများ၏ ဆိုက်ဘာစွမ်းဆောင်ရည်ကို မြှင့်တင်နိုင်ရန် လိုအပ်လျက်ရှိကြောင်း ဂျပန်နိုင်ငံ စီးပွားရေး၊ ကုန်သွယ်ရေးနှင့် စက်မှုဝန်ကြီးဌာနက ပြောကြားထားကြောင်း ဖော်ပြထားပါသည်။

ဂျပန်ဆိုက်ဘာကုမ္ပဏီများအနေဖြင့် ပြည်တွင်း၌ ဆိုက်ဘာလုံခြုံရေးဆိုင်ရာ ထုတ်ကုန်များထုတ်လုပ်နိုင်ရေးအတွက် လုံလောက်သည့်ရင်းနှီးမြှုပ်နှံမှုများ မရှိကြကြောင်းနှင့် ထုတ်ကုန်များရောင်းချရာတွင်လည်း အမြတ်ရရှိမှုနည်းပါးလျက်ရှိကြောင်း ဖော်ပြထားပါသည်။

ဂျပန်အစိုးရအနေဖြင့် ပြည်တွင်းဆိုက်ဘာလုံခြုံရေးကဏ္ဍ အားကောင်းလာစေရေးအတွက် အစိုးရ၏ပြည်တွင်းဆိုက်ဘာလုံခြုံရေးကဏ္ဍဖွံ့ဖြိုးတိုးတက်စေရေးစီမံကိန်းအရ ပေါ်ထွန်းစကုမ္ပဏီများကို ဆိုက်ဘာလုံခြုံရေးဆိုင်ရာဝန်ဆောင်မှုများနှင့် ထုတ်ကုန်များကို ကာလသတ်မှတ်၍ ပံ့ပိုးပေးသွားမည်ဖြစ်သည့်အပြင် သုတေ သနနှင့် တီထွင်ထုတ်လုပ်မှုမြှင့်တင်နိုင်မည့် ပြိုင်ပွဲများကိုလည်း ကျင်းပပေးသွားမည်ဖြစ်ကြောင်း ဖော်ပြထားပါသည်။

(သူဇာဖြိုး၊ စီးပွားရေးသံမှူး၊ တိုကျိုမြို့)