ဂျပန်နိုင်ငံ၏ ပျမ်းမျှလစာနှုန်းထားများကို ၂၀၂၅ ခုနှစ်၊ ဧပြီလမှစတင်၍ ၅.၄၆ ရာခိုင်နှုန်းတိုးမြှင့်ပေးရန် တောင်းဆိုနိုင်ခဲ့ကြောင်းနှင့် ယခုလစာတိုးမြှင့်မှုနှုန်းမှာ ယခင်နှစ်ကထက် များပြားကြောင်း ဂျပန်နိုင်ငံ၏ အကြီးဆုံးအလုပ်သမားသမဂ္ဂက ၁၄-၃-၂၀၂၅ ရက်နေ့တွင် ကြေညာခဲ့ကြောင်း ၁၄-၃-၂၀၂၅ ရက်နေ့ထုတ် The Nikkei Asia သတင်းစာတွင် “Japan’s unions win 5.46% wage hike, larger than previous year” ခေါင်းစဉ်ဖြင့် ဖော်ပြခဲ့ပါသည်။
ဂျပန်နိုင်ငံတွင် ဘဏ္ဍာနှစ်သစ်စတင်သည့် ဧပြီလမတိုင်မီ မတ်လတွင် အလုပ် သမားသမဂ္ဂများနှင့် ကုမ္ပဏီမန်နေဂျာများအနေဖြင့် လစာနှုန်းထားများ သတ်မှတ်ရန်ညှိနှိုင်းဆောင်ရွက်လေ့ရှိကြောင်း၊ ဂျပန်နိုင်ငံရှိ ကုမ္ပဏီကြီးများအနေဖြင့် ရှန်တိုဟုခေါ်သည့် လုပ်ခလစာဆိုင်ရာညှိနှိုင်းအစည်းအဝေးကို ဆောင်ရွက်ခဲ့ပြီးဖြစ် ကြောင်းနှင့် လစာနှုန်းထားများမှာ ယခင်နှစ်ကထက် များပြားခဲ့ကြောင်း ဖော်ပြ ထားပါသည်။
လစာဆိုင်ရာညှိနှိုင်းအစည်းအဝေးတွင် အဖွဲ့ဝင် ၇ သန်းနီးပါးရှိသည့် ဂျပန်ကုန်သွယ်ရေးသမဂ္ဂအဖွဲ့ချုပ်(Japanese Trade Union Confederation or Rengo)အနေဖြင့် ဂျပန်နိုင်ငံရှိ သမဂ္ဂ ၇၆၀ ၏ဆွေးနွေးမှုရလဒ်များကို တွက်ချက်ကြည့်ရာတွင် အခြေခံလစာနှင့် ပုံမှန်လစာအပါအဝင် လစာတိုးမြှင့်မှုမှာ ယခင်နှစ်တွင် ၅.၂၈ ရာခိုင်နှုန်းရှိခဲ့ရာမှ ၅.၄၆ ရာခိုင်နှုန်းသို့ မြင့်တက်ခဲ့ကြောင်း၊ အသေးစားနှင့် အလတ်စားလုပ်ငန်းများ၏ ပျမ်းမျှလစာတိုးမြှင့်မှုနှုန်းမှာ ယခင်နှစ်တွင် ၄.၄၂ ရာခိုင်နှုန်းရှိခဲ့ရာမှ ၅.၀၉ ရာခိုင်နှုန်းသို့ မြင့်တက်ခဲ့ကြောင်း ဖော်ပြထားပါသည်။
ဂျပန်ကုန်သွယ်ရေးသမဂ္ဂအဖွဲ့ချုပ်လက်အောက်ရှိ သမဂ္ဂ ၃၀၀၀ နီးပါးအနေဖြင့် ၂၀၂၅ ဘဏ္ဍာနှစ် အတွက် လစာနှုန်းထားကို ၆.၀၉ ရာခိုင်နှုန်းသို့ တိုးမြှင့်သတ်မှတ်ပေးရန် တောင်းဆိုခဲ့ကြကြောင်း၊ ထိုသို့ ၆ ရာခိုင်နှုန်းအထက် လစာတိုးမြှင့်ပေးရန် တောင်းဆိုခဲ့မှုမှာ ၁၉၉၃ ခုနှစ်မှစတင်၍ ၃၂ နှစ်အတွင်း ပထမဆုံးအကြိမ်ဖြစ်ခဲ့ကြောင်း ဖော်ပြထားပါသည်။
ဂျပန်နိုင်ငံ၏ပျမ်းမျှလစာတိုးမြှင့်မှုနှုန်းမှာ ငွေကြေးဖောင်းပွမှုနှုန်းကို ကျော်လွန်နိုင်ခြင်းမရှိသေးကြောင်း၊ ၂၀၂၅ ခုနှစ်၊ ဇန်နဝါရီလတွင် ဂျပန်နိုင်ငံ၏ငွေကြေး ဖောင်းပွမှုနှုန်းမှာ ၃.၂ ရာခိုင်နှုန်းရှိခဲ့ပြီး၊ လစာရရှိမှုမှာ ၁.၈ ရာခိုင်နှုန်းကျဆင်းခဲ့ကြောင်း၊ ၂၀၂၄ ဘဏ္ဍာနှစ်တွင် ပျမ်းမျှလစာတိုးမြှင့်မှုနှုန်းမှာ ၅.၂၈ ရာခိုင်နှုန်းရှိခဲ့ပြီး၊ ၁၉၉၁ ခုနှစ်မှစတင်၍ ၅ ရာခိုင်နှုန်းအထက် တိုးမြှင့်ပေးမှုမှာ နှစ်ပေါင်း ၃၃ နှစ်အတွင်း ပထမဆုံးအကြိမ်ဖြစ်ခဲ့ကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
