တောင်ကိုရီးယားနိုင်ငံရှိ Hyundai Motor Group သည် အမေရိကန်ပြည်ထောင်စုတွင် အမေရိကန်ဒေါ်လာ ၂၁ ဘီလီယံ ထပ်မံရင်းနှီးမြှုပ်နှံသွားမည့်အစီအစဉ်ကို Hyundai Motor Group ၏ အမှုဆောင်ဥက္ကဋ္ဌ Mr. Chung Euisun က ၃၁-၃-၂၀၂၅ ရက်နေ့တွင် အမေရိကန်ပြည်ထောင်စုသမ္မတထရမ့်နှင့်အတူ အိမ်ဖြူတော်၌ ကြေညာခဲ့ပါသည်။

အဆိုပါအမေရိကန်ဒေါ်လာ ၂၁ ဘီလီယံ ထပ်မံရင်းနှီးမြှုပ်နှံသွားမည့်အစီအစဉ်ကို လာမည့်(၄)နှစ်အတွင်း(၂၀၂၈ ခုနှစ်နောက်ဆုံးထား၍) အပြီးသတ်ဆောင်ရွက်သွားပြီး ကားများ၊ ကားပစ္စည်းများနှင့် စတီးလ်များထုတ်လုပ်သွားမည်ဖြစ်ကြောင်း ကြေညာခဲ့ပါသည်။

ရင်းနှီးမြှုပ်နှံမှုပမာဏစုစုပေါင်းအနက် ၈.၆ ဘီလီယံကို ကားထုတ်လုပ်သည့် အခြေခံအဆောက်အဦများအတွက် သုံးစွဲသွားမည်ဖြစ်ပြီး တစ်နှစ်လျှင်ကားအစီးရေ ၁.၂ သန်းကျော်ထိ ထုတ်လုပ်သွားရန် ရည်မှန်းထားပါကြောင်း၊ အဆိုပါစီမံကိန်းကို ဂျော်ဂျီယာပြည်နယ်ရှိ Hyundai Motor Group Metaplant America(HMGMA) ဖွင့်ပွဲအပြီးတွင် စတင်ဆောင်ရွက်မည်ဖြစ်ပါကြောင်းနှင့်  HMGMA သည် Hybrids နှင့်  လျှပ်စစ်ကားများ(Electric Vehicles-EVs)ကို တစ်နှစ်လျှင် အစီးရေ ၅၀၀,၀၀၀ ထုတ်လုပ်နိုင်မည်ဖြစ်ပါကြောင်း ကြေညာခဲ့ပါသည်။

Hyundai Motor Group ပိုင် Hyundai Steel ကလည်း လျှပ်စစ်ဓါတ်အားဖြင့် အရည်ကျိုသံမဏိ/စတီးလ်စက်ရုံကို အမေရိကန်ပြည်ထောင်စု၊ လူဝီစီးယားနားပြည်နယ်တွင် တည်ဆောက်သွားမည်ဖြစ်ကြောင်း၊ အဆိုပါစက်ရုံမှ ကားထုတ်လုပ် မှုအတွက် လိုအပ်သည့်စတီးလ်ပြားများကို ၂၀၂၉ ခုနှစ်မှစတင်၍ ထုတ်လုပ်နိုင်ရန်ရည်မှန်းထားကြောင်း၊ အမေရိကန်ဒေါ်လာ ၆.၁ ဘီလီယံရင်းနှီးမြှုပ်နှံထားသည့် အဆိုပါစတီးလ်စက်ရုံသည် အမေရိကန်ပြည်ထောင်စုတွင် အလုပ်အကိုင်ပေါင်း ၁,၃၀၀ ကို ဖန်တီးပေးမည်ဖြစ်ကြောင်း၊ သံမဏိစက်ရုံတွင် ကားအတွက် လိုအပ်သည့်စတီးလ်ပြားများအပြင် အခြားသောအစိတ်အပိုင်းများကိုလည်း ထုတ်လုပ်သွားမည်ဖြစ်ပြီး အမေရိကန်ပြည်ထောင်စုတွင် Hyundai Motor Group မှ ထုတ်လုပ်သည့်ကားများအတွက် လိုအပ်သည့်အစိတ်အပိုင်းအားလုံးကို ထောက်ပံ့ပေးနိုင်သည့် အထောက်အပံ့ကွင်းဆက်ကြီးတစ်ခုအဖြစ် ဖန်တီးသွားမည်ဖြစ်ပါကြောင်း၊  သမ္မတထရမ့်ကလည်း Hyundai Motor Group ၏ရင်းနှီးမြှုပ်နှံမှုကို ကြိုဆိုပါကြောင်းနှင့် မကြာမီကောက်ခံတော့မည့် သွင်းကုန်ခွန်ကောက်ခံမှုများမှ ကင်းလွတ်ခွင့်ရမည်ဖြစ်ပါကြောင်း အမှုဆောင်ဥက္ကဋ္ဌ Mr. Chung Euisun ကပြောကြားခဲ့ပါသည်။

သမ္မတထရမ့်ကလည်း “Hyundai Motor Group သည် အမေရိကန်ပြည်ထောင်စုတွင် စတီးလ်နှင့်ကားများကိုထုတ်လုပ်မည်ဖြစ်သည့်အတွက် သွင်းကုန်ခွန်များကျခံ ရတော့မည်မဟုတ်ပါကြောင်း” ပြောကြားခဲ့ပါသည်။

သမ္မတထရမ့်အစိုးရသည် အမေရိကန်ပြည်ထောင်စုသို့ တင်သွင်းလာမည့်ကားများအားလုံးအတွက် သွင်းကုန်ခွန် ၂၅ ရာခိုင်နှုန်းကို ၂-၄-၂၀၂၅ ရက်နေ့မှစ၍ ကောက်ခံမည်ဖြစ်ပါသည်။ Hyundai Motor Group သည် အမေရိကန်ပြည်ထောင်စုသို့ ကားတင်ပို့ရောင်းချမှု ဆက်လက်မြင့်မားနေသည့်အတွက် သွင်းကုန်ခွန် ၂၅ ရာခိုင်နှုန်းကောက်ခံမည့်အစီအစဉ်သည် Hyundai Motor အပါအဝင် KIA ကုမ္ပဏီအပေါ် ထိရောက်မှုပြင်းထန်မည်ဖြစ်ပါသည်။ လက်ရှိ Hyundai Motor Group ၏ဆောင်ရွက် မှုသည် အခြားသောကုရီးယားကုမ္ပဏီများအတွက် စံနမူနာကောင်းတစ်ခုပင်ဖြစ်သည်ဟု စီးပွားရေးအသိုင်းအဝိုင်းက ချီးကျုးလျက်ရှိပြီး Hyundai Motor နှင့် KIA တို့၏အစုရှယ်ယာများတန်ဖိုးသည် ကိုရီးယားစတော့ရှယ်ယာဈေးကွက် (KOSPI)တွင် ၃.၂၉ ရာခိုင်နှုန်းနှင့် ၂.၁၃ ရာခိုင်နှုန်းစီ မြင့်မားလာခဲ့ပါသည်။

Hyundai Motor Group သည် Future Mobility နှင့် စွမ်းအင်ကဏ္ဍအတွက်လည်း အမေရိကန်ဒေါ်လာ ၆.၃ ဘီလီယံရင်းနှီးမြှုပ်နှံမည်ဖြစ်ပါသည်။ အဆိုပါအစီအစဉ်အရ မောင်းသူမဲ့ယာဉ်များ၊ စက်ရုပ်များ၊ ဉာဏ်ရည်တုများနှင့် အဆင့်မြင့်လေယာဉ်များထုတ်လုပ်မှုတို့တွင် အမေရိကန်ကုမ္ပဏီကြီးများနှင့် ပူးပေါင်းဆောင်ရွက်သွားမည်ဖြစ်ပါသည်။

Source: The Korea Times

https://www.koreatimes.co.kr/www/tech/2025/03/129_394853.html#:~:text=Hyundai%20Motor%20Group%20unveiled%20a,parts%20and%20steel%20through%202028.

(ပပ၊ စီးပွားရေးသံမှူး၊ ဆိုးလ်မြို့)