ဥရောပသမဂ္ဂ(EU)သည် ရုရှားရေနံအပေါ် သတ်မှတ်ထားသော ဈေးနှုန်းအမြင့်ဆုံးကန့်သတ်စျေး (Price Cap)ကို လက်ရှိ တစ်စည်လျှင် အမေရိကန်ဒေါ်လာ ၄၇ ဒသမ ၆ မှ ၄၄ ဒသမ ၁ သို့ ထပ်မံ လျှော့ချမည်ဖြစ်ပြီး ၂၀၂၆ ခုနှစ်၊ ဖေဖော်ဝါရီ ၁ ရက်နေ့မှစတင်၍ အကျိုးသက်ရောက်မည်ဖြစ်ကြောင်း ဥရောပကော်မရှင်က ထုတ်ပြန်သောစာရွက်စာတမ်းများအရ သိရသည်။
၂၀၂၂ ခုနှစ်၊ ဒီဇင်ဘာ ၅ ရက်နေ့တွင် ဥရောပသမဂ္ဂသည် ရုရှားရေနံကို ပင်လယ်ရေကြောင်းဖြင့် တင်ပို့ခြင်းအပေါ် ပိတ်ပင်သော အရေးယူပိတ်ဆို့မှုကို ချမှတ်ခဲ့သည်။ G7 နိုင်ငံများ၊ ဥရောပသမဂ္ဂနှင့် သြစတြေးလျတို့သည် ပင်လယ်ရေကြောင်းမှ တင်ပို့သော ရုရှားရေနံအတွက် တစ်စည်လျှင် အမေရိကန်ဒေါ်လာ ၆၀ ဈေးနှုန်းကန့်သတ်ချက်ကို တစ်ပြိုင် နက်တည်းစတင်ခဲ့ပြီး ယင်းဈေးနှုန်းထက် မြင့်မားသော ရေနံအတွက် သယ်ယူပို့ဆောင်ရေးနှင့် ဆက်စပ်ဝန်ဆောင်မှုများကို တားမြစ်ခဲ့သည်။
ထို့အပြင် ရုရှားရေနံထုတ်ကုန်များအပေါ် အလားတူကန့်သတ်ချက်များကို ၂၀၂၃ ခုနှစ်၊ ဖေဖော်ဝါရီ ၅ ရက်နေ့တွင် စတင်အသက်ဝင်ခဲ့သည်။ ၂၀၂၅ ခုနှစ်၊စက်တင်ဘာ ၃ ရက်နေ့တွင် ရေနံဈေးနှုန်းကန့်သတ်ချက်ကို တစ်စည်လျှင် အမေရိကန်ဒေါ်လာ ၄၇ ဒသမ ၆ အထိထပ်မံလျှော့ချခဲ့ပြီး ဇန်နဝါရီလ ၃၁ ရက်နေ့တွင် သက်တမ်းကုန်ဆုံးမည်ဖြစ်သည်။
ရုရှားနိုင်ငံတွင် ရေနံဈေးနှုန်းအမြင့်ဆုံးကန့်သတ်ဈေးများ၏အစီအမံအောက်တွင် ရေနံရောင်းချခြင်းကို တားမြစ်ထားသည်။ ရုရှားသည် ဥရောပသမဂ္ဂမှ ချမှတ်ထားသည့် ဈေးနှုန်းအမြင့်ဆုံးသတ်မှတ်ချက်ကို ဈေးကွက်မဟုတ်သော တူရိယာတစ်ခုအဖြစ် သတ်မှတ်ထားပြီး ယင်းကို “ရုရှားရေနံနှင့်ရေနံထွက်ကုန်များအပေါ် ဈေးနှုန်းကန့်သတ်ချက်များချမှတ်ခြင်းနှင့်ဆက်စပ်၍ လောင်စာနှင့် စွမ်းအင်ကဏ္ဍတွင် အထူးစီးပွား ရေးအစီအမံများ ကျင့်သုံးခြင်းဆိုင်ရာ” အမိန့်ဖြင့် ထုတ်ပြန်ထားသည်။
ယင်းအမိန့်သည် ၂၀၂၃ ခုနှစ်၊ ဖေဖော်ဝါရီ ၁ ရက်နေ့တွင် စတင်အသက် ဝင်ခဲ့ပြီး အကြိမ်ပေါင်းများစွာ သက်တမ်းတိုးခဲ့ကာ မကြာသေးမီက ၂၀၂၅ ခုနှစ်ကုန်အထိ သက်တမ်းရှိခဲ့သည်။ လက်ရှိတွင် အဆိုပါအမိန့်ကို ၂၀၂၆ ခုနှစ်၊ ဇွန်လ ၃၀ ရက်အထိ ထပ်မံသက်တမ်းတိုးမြှင့်ခဲ့သည်။
Source : https://www.interfax.ru/business/1067709
(ခွန်မျိုးသူ၊ စီးပွားရေးသံမှူး၊ မော်စကိုမြို့)
