တရုတ်နိုင်ငံခြားရေးဝန်ကြီးဌာန၏ စီးပွားရေးနှင့်သံတမန်ရေးရာ သတင်းစာရှင်းလင်းပွဲတွင် ပြောကြားချက်အရ တရုတ်နိုင်ငံသည် ဥရောပသမဂ္ဂအနေဖြင့် တရုတ်လုပ်ငန်းများအတွက် တရားမျှတ၍ ကြိုတင်ခန့်မှန်းနိုင်သော စီးပွားရေးဝန်းကျင်ကို ဖန်တီးပေးရန် မျှော်လင့်ကြောင်း ထုတ်ဖော်ပြောကြားခဲ့သည်။

၂၀၂၅/၂၀၂၆ ခုနှစ်အတွက် ဥရောပသမဂ္ဂရှိ တရုတ်လုပ်ငန်းများ၏ဖွံ့ဖြိုးတိုးတက်မှုဆိုင်ရာအစီရင်ခံစာအရ တရုတ်လုပ်ငန်းများအနေဖြင့် ဥရောပစီးပွားရေးဝန်းကျင်၏ အလုံးစုံအဆင့်သတ်မှတ်ချက်သည် ခြောက်နှစ်ဆက်တိုက်ကျဆင်းလာခဲ့ကြောင်းနှင့် "မသေချာမရေရာမှု"(uncertainty)သည် တရုတ်လုပ်ငန်းများ၏ လုပ်ငန်းလည်ပတ်မှုအတွက် အကြီးမားဆုံးသောအဟန့်အတားတစ်ခုဖြစ်နေကြောင်း ဖော်ပြ ထားသည်။

တရုတ်နိုင်ငံခြားရေးဝန်ကြီးဌာန၊ ပြောရေးဆိုခွင့်ရှိသူ လင်းကျဲန်(Lin Jian) က ဥရောပသမဂ္ဂအနေဖြင့် စီးပွားရေးယှဉ်ပြိုင်မှုကို မြှင့်တင်ခြင်းနှင့်"အန္တရာယ်လျှော့ချခြင်း"(de-risking)ဆိုသည့်အမည်ခံဖြင့်ကာကွယ် ရေးဝါဒဆိုင်ရာအစီအမံများစွာကို ချမှတ်ခဲ့ကြောင်း၊ ခွဲခြားဆက်ဆံသော ကန့်သတ်မှုများပြဌာန်းခဲ့ကြောင်း ထောက်ပြခဲ့သည်။ ၎င်းအချက်များ သည် ကမ္ဘာလုံးဆိုင်ရာ စက်မှုလုပ်ငန်းနှင့် ထောက်ပံ့ပို့ဆောင်ရေးကွင်းဆက်များ၏ တည်ငြိမ်မှန်ကန်သော လည်ပတ်မှုကို အနှောင့် အယှက်ဖြစ်စေခဲ့ကြောင်း ဖော်ပြခဲ့သည်။

ပြောရေးဆိုခွင့်ရှိသူက ဆက်လက်ပြောကြားရာတွင် တရုတ်လုပ်ငန်းများသည် ဥရောပဈေးကွက်အတွင်း ဆက်လက်တိုးချဲ့လာခဲ့ပြီး ဥရောပ၏ စီးပွားရေးတိုးတက်မှု၊ အစိမ်းရောင်အသွင်ကူးပြောင်းမှု၊ အလုပ် အကိုင်အခွင့်လမ်းနှင့် ပြည်သူ့ချမ်းသာကြွယ်ဝမှု(people's well-being) တို့အတွက် အပြုသဘောဆောင်သောပံ့ပိုးမှုများ ဆောင်ရွက်ခဲ့ကြောင်း ဖော်ပြခဲ့သည်။ တရုတ်နိုင်ငံ၏ ခေတ်မီဖွံ့ဖြိုးတိုးတက်ရေး လုပ်ငန်းစဉ်နှင့် ပိုမိုမြင့်မားသော စံနှုန်းမြင့်ဖွင့်လှစ်မှု(greater high-standard opening up)တို့သည် တရုတ်-ဥရောပပူးပေါင်းဆောင်ရွက်မှုအတွက် အခွင့်အလမ်းများ ပိုမိုရရှိစေမည်ဖြစ်သည်။

နိုင်ငံတကာအခြေအနေများ ရှုပ်ထွေးပြောင်းလဲနေချိန်တွင် တရုတ်-ဥရောပဆက်ဆံရေးအတွက် ဒွန်တွဲနေသောစကားဝိုင်း(dialogue)နှင့် ပူးပေါင်းဆောင်ရွက်မှုများထိန်းသိမ်းရန် အလွန်အရေးကြီးကြောင်း၊ ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ အတားအဆီးများကို ဖယ်ရှားသွားရန်လိုအပ်ကြောင်းနှင့် လွတ်လပ်သောကုန်သွယ်မှုနှင့် မျှတသောယှဉ်ပြိုင်မှုတို့ကို ထိန်းသိမ်းသွားရမည်ဖြစ်ကြောင်း Lin က ပြောကြားခဲ့သည်။

ဥရောပသမဂ္ဂအနေဖြင့် ဈေးကွက်ဖွင့်လှစ်မှုဆိုင်ရာကတိကဝတ်များ (commitment on market openness)ကို ဂုဏ်သိက္ခာရှိရှိ ထိန်းသိမ်းရန်၊ တရားမျှတသော ယှဉ်ပြိုင်မှုအခြေခံမူများကို လိုက်နာရန်၊ တရုတ်လုပ်ငန်းများ၏ သင့်တင့်မျှတသောအကြံပြုချက်များနှင့် တရားဝင်တောင်းဆိုမှုများကို လက်ခံပြီး အရေးယူဆောင်ရွက်ရန်၊ တရုတ်လုပ်ငန်းများ ဥရောပသမဂ္ဂတွင် ရင်းနှီးမြှုပ်နှံမှုနှင့် လုပ်ငန်းလည်ပတ်မှုပြုလုပ်နိုင်ရေးအတွက် တရားမျှတ၍ ကြိုတင်ခန့်မှန်းနိုင်သော စီးပွား ရေးဝန်းကျင်ကို ဖန်တီးပေးရန် တရုတ်နိုင်ငံက မျှော်လင့်ကြောင်း ပြောကြားခဲ့သည်။

အရင်းမြစ်။ https://en.people.cn/n3/2025/1115/c90000-20390844.html

(လျန်ရှန်းမုန်၊ စီးပွားရေးသံမှူး၊ ကူမင်းမြို့)