မြန်မာ-တရုတ်နယ်စပ်ကုန်သွယ်ရေးတွင် လာမည့်သြဂုတ်လ ၁ ရက်နေ့မှစတင်ပြီး ဘဏ်စနစ်ကျင့်သုံးဆောင်ရွက်မည်ဖြစ်ကြောင်း ဇွန်လ ၂၃ ရက်က စီးပွားရေးနှင့်ကူးသန်းရောင်းဝယ် ရေးဝန်ကြီးဌာန၊ ကုန်သွယ်ရေးဦးစီးဌာနက ထုတ်ပြန်ကြေညာထားသည်။ ပြီးခဲ့သည့် ၂၀၂၂ ခုနှစ်၊ နိုဝင်ဘာလ ၁ ရက်တွင် ကနဦးအဆင့်အနေဖြင့် မြန်မာ-ထိုင်း နယ်စပ်ကုန်သွယ်ရေးကိစ္စရပ်များအတွက် ဘဏ်စနစ်ဖြင့် ဆောင်ရွက်ခဲ့ပြီး ဒုတိယအဆင့်အနေဖြင့် မြန်မာ-တရုတ်နယ်စပ်ကုန်သွယ်ရေးတွင် ဩဂုတ်လ ၁ ရက်မှ စတင်ကာ ဘဏ်စနစ်ကို ကျင့်သုံးဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

     ယင်းသို့ ဆောင်ရွက်ရာတွင် သွင်းကုန်ပစ္စည်းများတင်သွင်းမှုအတွက် တစ်ဖက်နိုင်ငံသို့ ပို့ကုန်တင်ပို့ခြင်းမှ ရရှိသည့်ဝင်ငွေ၊ အခြားဝင်ငွေများနှင့် ပြည်တွင်းဘဏ်မှဖြစ်စေ ဝယ်ယူရရှိထားသော ငွေစာရင်းလက်ကျန်(ယွမ်ငွေ)ကို အသုံးပြုတင်သွင်းခွင့်ပြုမည်ဖြစ်ကြောင်း၊ သွင်းကုန်တင်သွင်းသူများအနေဖြင့် အဆိုပါ ရငွေများကို အသုံးပြု၍ သက်ဆိုင်ရာဘဏ်များမှတစ်ဆင့် သွင်းကုန်အတွက် ငွေပေးချေမှုများကို ပေးချေဆောင်ရွက်ရမည်ဖြစ်ကြောင်း ဖော်ပြထားသည်။

     သွင်းကုန်လိုင်စင်လျှောက်ထားရာ၌ ကုမ္ပဏီများအနေဖြင့် ဘဏ်ငွေစာရင်းသို့ ပို့ကုန်တင်ပို့ခြင်းမှ ရရှိသည့်ဝင်ငွေ(သို့မဟုတ်) အခြားဝင်ငွေဝင်ရောက်ကြောင်း (သို့မဟုတ်) ပြည်တွင်းဘဏ်မှ ဝယ်ယူထားကြောင်း သက်ဆိုင်ရာဘဏ်မှ ထုတ်ပေးသည့်အထောက်အထား (Credit Advice)နှင့် ဘဏ်ငွေစာရင်းရှင်းတမ်း (Bank Statement) မူရင်းတို့ကို ကုန်သွယ်ရေးဦးစီးဌာနသို့ ပူးတွဲ တင်ပြလျှောက်ထားရမည် ဖြစ်ကြောင်းလည်း သိရသည်။

     ယင်းနောက် ကုန်သွယ်ရေးဦးစီးဌာနအနေဖြင့် သွင်းကုန်တင်သွင်းလိုသည့်ကုမ္ပဏီက တင်ပြလာသော ပို့ကုန်မှရရှိသည့်ဝင်ငွေ(သို့မဟုတ်) အခြားဝင်ငွေဝင်ရောက်မှု (သို့မဟုတ်) ပြည်တွင်းဘဏ်မှ ဝယ်ယူထားမှုပမာဏကိုစိစစ်၍ ဘဏ်ငွေစာရင်းလက်ကျန်ပမာဏထက် မကျော်လွန်ဘဲ သွင်းကုန်လိုင်စင်ကို ခွင့်ပြုထုတ်ပေးသွားမည်ဖြစ်ကြောင်း သိရသည်။ ၎င်းအတိုင်း ဆောင်ရွက်ရာတွင် ဩဂုတ်လ ၃၀ ရက်အထိကာလအတွင်း လျှောက်ထားပြီးဖြစ်သည့် သွင်းကုန်လိုင်စင်လျှောက်ထားမှုများ အကျုံးမဝင်ကြောင်း၊ အဆိုပါ နေ့ရက်မတိုင်မီ ထုတ်ပေးပြီးဖြစ်သည့် သွင်းကုန်လိုင်စင်များဖြင့် ကုန်ပစ္စည်းတင်သွင်းမှုကို ဩဂုတ်လ ၃၁ ရက်မတိုင်မီ ပြီးပြတ်အောင်တင်သွင်းကြရန်နှင့် အဆိုပါသတ်မှတ်ကာလအတွင်း တင်သွင်းနိုင်ခြင်း မရှိပါက သွင်းကုန်လိုင်စင်ပျက်ပြယ်မည်ဖြစ်ကြောင်းလည်း သိရသည်။

     အဆိုပါ တင်သွင်းခွင့်ပြုရာတွင် ပို့ကုန်မှ ရရှိသည့်ဝင်ငွေနှင့် အခြားဝင်ငွေ ဝင်ရောက်မှုများနှင့် ပတ်သက်၍ ပြီးခဲ့သည့် ဇန်နဝါရီလ ၁ ရက်နောက်ပိုင်း ဝင်ရောက်သည့်ဝင်ငွေကိုသာ အသုံးပြု ဆောင်ရွက်ခွင့်ပြုမည်ဖြစ်ကြောင်း၊ ပို့ကုန်တင်ပို့သည့်ကုမ္ပဏီသည် ရရှိသည့် ပို့ကုန်ဝင်ငွေကို မိမိကိုယ်တိုင် သွင်းကုန်တင်သွင်းခြင်းကိုဖြစ်စေ၊ အခြားကုမ္ပဏီတစ်ခုခုသို့ လွှဲပြောင်းပေး၍ သွင်းကုန်တင်သွင်းခြင်းကိုဖြစ်စေ ဆောင်ရွက်နိုင်ကြောင်းနှင့် အဆိုပါပို့ကုန်မှရရှိသည့်ဝင်ငွေကို အသုံးပြု၍ သွင်းကုန်ပစ္စည်းတင်သွင်းရာတွင် မြန်မာ-တရုတ် နယ်စပ်ကုန်သွယ်ရေးစခန်းတစ်ခုခုမှ အခြားတစ်ခုခုသို့ လွှဲပြောင်းသုံးစွဲနိုင်ကြောင်းလည်း သိရသည်။

Source: popular News Journal