ပြီးခဲ့သည့်  ၂၀၂၂-၂၀၂၃ ဘဏ္ဍာနှစ်တွင် ရော်ဘာတန်ချိန် ၃ ဒသမ ၆ သိန်းကျော် ထွက်ရှိခဲ့ပြီး ပြည်ပဖောက်သည် ဈေးကွက်နိုင်ငံများသို့ ရော်ဘာတန်ချိန် နှစ်သိန်းကျော် တင်ပို့ရောင်းချပေးခဲ့ကြောင်းနှင့် ရော်ဘာတစ်တန်လျှင် အမေရိကန်ဒေါ်လာ ၁၆၅၀ မှ ၁၇၀၀ အထိ ဈေးနှုန်းမြင့်တက်လာခဲ့ကြောင်း သိရသည်။ ယင်းကြောင့် ရော်ဘာပြည်ပတင်ပို့မှုလည်းမြင့်တက် လာခဲ့ရာ ယခုဘဏ္ဍာနှစ် မေလတွင် အမေရိကန်ဒေါ်လာ ၂၂ ဒသမ ၄၉ သန်းတန်ဖိုးရှိ ရော်ဘာတန်ချိန် ၁၈၁၉၀ တင်ပို့ရောင်းချခဲ့ကြောင်း သိရသည်။

          မြန်မာနိုင်ငံမှ စိုက်ပျိုးထွက်ရှိသည့် ရော်ဘာများကို တရုတ်၊ အိန္ဒိယ၊ ထိုင်း၊ မလေးရှား၊ အင်ဒိုနီးရှား၊ စင်ကာပူ၊ တောင်ကိုရီးယားနှင့် တရုတ် (တိုင်ပေ)နိုင်ငံများသို့ အဓိကတင်ပို့ရောင်းချနေခြင်းဖြစ်ကြောင်းနှင့် ပြီးခဲ့သည့် ဧပြီလတွင် ပြည်ပသို့ ရော်ဘာတန်ချိန် ၁၁၁၉၀၊ မေလတွင် တန်ချိန် ၇၀၀၀ တင်ပို့ရောင်းချပေးခဲ့ကြောင်း သိရသည်။ မေလတွင် ပင်လယ်ရေကြောင်းကုန်သွယ်ရေးမှ အမေရိကန်ဒေါ်လာ ၁၈ ဒသမ ၄၁၇ သန်းတန်ဖိုးရှိ ရော်ဘာတန်ချိန် ၁၄၈၆၀ နှင့် နယ်စပ်ကုန်သွယ်ရေးလမ်းကြောင်းမှ အမေရိကန်ဒေါ်လာ ၄ ဒသမ ၀၇၃ သန်း တန်ဖိုးရှိ ရော်ဘာတန်ချိန် ၃၃၀၀၊ စုစုပေါင်း အမေရိကန်ဒေါ်လာ ၂၂ ဒသမ ၄၉ သန်းတန်ဖိုးရှိ ရော်ဘာတန်ချိန် ၁၈၁၉၀ တင်ပို့ရောင်းချပေးခဲ့ကြောင်း သိရသည်။

           တင်ပို့ရာတွင် တရုတ်သို့   ရော်ဘာတန်ချိန်   ၁၁၅၃၀၊   အိန္ဒိယသို့   တန်ချိန် ၁၂၇၀၊ မလေးရှားသို့  တန်ချိန် ၈၆၀၊ အင်ဒိုနီးရှားသို့ တန်ချိန် ၄၀၀၊ တောင်ကိုရီးယားသို့ တန်ချိန် ၃၀၀၊  ဘင်္ဂလားဒေ့ရှ်သို့ တန်ချိန် ၂၆၀ နှင့် ဂျပန်နိုင်ငံသို့ တန်ချိန် ၂၄၀၊ စုစုပေါင်း ရော်ဘာတန်ချိန် ၁၄၈၆၀ ကို ပင်လယ်ရေကြောင်းကုန်သွယ်ရေးမှတစ်ဆင့် တင်ပို့ရောင်းချပေးခဲ့ကြောင်းနှင့် နယ်စပ်ကုန်သွယ်ရေးလမ်းကြောင်း မှတစ်ဆင့် တရုတ်နိုင်ငံသို့ တန်ချိန် ၁၈၁၀ နှင့် ထိုင်းနိုင်ငံသို့ တန်ချိန် ၁၅၂၀၊ စုစုပေါင်း ရော်ဘာတန်ချိန် ၃၃၃၀ တင်ပို့ရောင်းချပေးခဲ့ကြောင်း သိရသည်။

Source: Popular News Journal