၂၀၂၅ ခုနှစ်၊ ဇွန်လတွင် ၅၁ ဒသမ ၃၈ ကီလိုမီတာရှည်လျားသော Bairabi–Sairang မီးရထားလမ်းပိုင်းသစ်ကိုဖွင့်လှစ်လိုက်ခြင်းနှင့်အတူ မီဇိုရမ်ပြည်နယ်သည် အိန္ဒိယနိုင်ငံ၏မီးရထားလမ်းကွန်ရက် မြေပုံတွင် သမိုင်းတစ်လျှောက် ပထမဆုံးအကြိမ်အဖြစ် တရားဝင်ပါဝင်လာခဲ့ပြီဖြစ်ကြောင်း၊ အဆိုပါဖွံ့ဖြိုးတိုးတက်မှုသည် ထောက်ပံ့ပို့ဆောင်ရေးဆိုင်ရာ သမိုင်းမှတ်တိုင်တစ်ခုအဖြစ် သတ်မှတ်ခြင်းထက် ကျော်လွန်၍ အိန္ဒိယနိုင်ငံ၏ရှာဖွေစူးစမ်းမှုအနည်းဆုံးဒေသများထဲမှတစ်ခုကို ကမ္ဘာ့အသိုင်းအဝိုင်းထံသို့ တံခါးဖွင့်လှစ်ပေးကာ အိန္ဒိယအရှေ့မြောက်ပိုင်း၏ခရီးသွားလုပ်ငန်းကဏ္ဍကို အဓိပ္ပာယ်ပြန်လည်ဖွင့်ဆိုနိုင်မည်ဖြစ်ကြောင်း India TodayNE သတင်းဌာနက ယခုလ ၁၅ ရက်တွင် ဖော်ပြထားပါသည်။

မီဇိုရမ်ပြည်နယ်သည် ဆယ်စုနှစ်ပေါင်းများစွာ အိန္ဒိယနိုင်ငံ၏ ကျန်ရှိသောမီးရထား လမ်းကွန်ရက်နှင့် အဆက်အသွယ်ပြတ်တောက်နေခဲ့ပြီး၊ ရှည်လျားသော ကားလမ်း ခရီးစဉ်များ သို့မဟုတ် ကန့်သတ်ထားသော လေကြောင်းခရီးစဉ်များဖြင့်သာသွားလာနိုင်ခဲ့သည်။ ယခုအခါ အဆိုပါမီးရထားလမ်းသစ်ကို စတင်လည်ပတ်နေပြီဖြစ်သောကြောင့် ပြည်နယ်မြို့တော် Aizawl သည် Sairang ရှိ မီးရထားဘူတာရုံမှ ကီလိုမီတာ ၂၀ သာအကွာအဝေးရှိကာ ခရီးစဉ်တလျှောက် ဒေသ၏သာယာလှပသော ရှုခင်းများနှင့် ယဉ်ကျေးမှုဆိုင်ရာအမွေအနှစ်များကို ယခင်ကမကြုံစဖူးကြည့်ရှုခံစားနိုင်မည့် အခွင့်အရေးကို ပေးအပ်လျက်ရှိကြောင်း သိရသည်။

ထူထပ်သော တောတောင်များ၊ မတ်စောက်သော တောင်တန်းများနှင့် အမြင့်ပိုင်းဒေသရှိ တောင်ကြားများကို ဖြတ်သန်းဖောက်လုပ်ထားသည့် Bairabi–Sairang မီးရထားလမ်းသည် ထူးခြားသော အခြေခံအဆောက်အအုံဆိုင်ရာ အောင်မြင်မှုတစ်ခုအဖြစ် ထင်ရှားလျက်ရှိသည်။ ၎င်းတွင် ဥမင်လိုဏ်ခေါင်း ၄၈ ခုနှင့် တံတား ၁၄၂ စင်းပါဝင်ပြီး ခရီးသွားများအား နည်းပညာဆိုင်ရာဆန်းသစ်တီထွင်မှုနှင့် ရင်သပ် ရှုမောဖွယ်ရာရှုခင်းများကို ရှားရှားပါးပါးပေါင်းစပ်ခံစားခွင့်ပေးအပ်ထားကြောင်း တွေ့ရှိရသည်။

အိန္ဒိယမီးရထားလုပ်ငန်းသည် ပတ်ဝန်းကျင်ရှုခင်းကို အပြည့်အဝခံစားနိုင်ရန် မှန်အမိုးများနှင့် ကျယ်ပြန့်သောပြတင်းပေါက်များဖြင့် ဒီဇိုင်းထုတ်ထားသည့် Vistadome ရထားတွဲများကို အဆိုပါလမ်းကြောင်းပေါ်တွင် ပြေးဆွဲရန် အစီအစဉ်ရှိကြောင်းအတည်ပြုခဲ့သည်။ ခရီးသည်များသည် မကြာမီ Reiek တောင်တန်းများ၊ Vantawng ရေတံခွန်နှင့် Tam Dil ရေကန်ပတ်ဝန်းကျင်ရှိ မြူနှင်းများဖုံးလွှမ်းနေသော သစ်တောများကဲ့သို့သော ထင်ရှားသည့်နေရာများကို ၎င်းတို့၏ထိုင်ခုံများမှ သက်သောင့်သက်သာကြည့်ရှုနိုင်တော့မည်ဖြစ်ကြောင်း ပြောကြားခဲ့သည်။

ယခင်က တိတ်ဆိတ်သော မြစ်ကမ်းနဘေးမြို့လေးတစ်မြို့ဖြစ်ခဲ့သော Sairang သည် ယခုအခါ မီဇိုရမ်ပြည်နယ်၏ ခရီးသွားလုပ်ငန်းကဏ္ဍအတွက် တံခါးပေါက်တစ်ခုအဖြစ် ပေါ်ထွက်လာလျက်ရှိသည်။ သဘာဝပတ်ဝန်းကျင်ကို အလေးထားသောခရီးသွားများကိုရည်ရွယ်၍ ခရီးသွားများအတွက် ရေရှည်တည်တံ့သော တည်းခိုနေထိုင်စရာများ၊ လက်မှုအနုပညာဈေးများနှင့် ဒေသအစားအစာဆိုင်များ ပါဝင် သည့်အကူးအပြောင်းလွယ်ကူသော ခရီးသွားဗဟိုဌာနတစ်ခုအဖြစ် ဘူတာရုံဧရိယာကို အဆင့်မြှင့်တင်ရန် အစီအစဉ်များကို စတင်ဆောင်ရွက်လျက်ရှိကြောင်း သိရသည်။

Sairang မြို့သည် Reiek အမွေအနှစ်ကျေးရွာ(Reiek Heritage Village)၊ Phawngpui အမျိုးသားဥယျာဉ်(Phawngpui National Park) နှင့် Dampa ကျားထိန်းသိမ်းရေးစခန်း(Dampa Tiger Reserve) ကဲ့သို့သောထိပ်တန်းလည်ပတ်စရာနေရာများနှင့် နီးကပ်မှုကြောင့် ပြည်နယ်ကို လာရောက်စူးစမ်းလေ့လာလိုသော ခရီးသွားဧည့်သည်များအတွက် မဟာဗျူဟာကျသောအခြေစိုက်စခန်းတစ်ခုဖြစ်လာမည်ဖြစ်သည်။ တစ်ချိန်က သွားလာရန်ခက်ခဲခဲ့သော အဆိုပါနေရာများ သည် ယခုအခါ ဘူတာရုံမှတစ်ဆင့် ရှုခင်းသာယာသော ကားလမ်းတစ်လျှောက် ခရီးတိုအတွင်း ရောက်ရှိနိုင်ပြီဖြစ်ကြောင်း သိရသည်။

မီဇိုရမ်ပြည်နယ်သည် ၎င်း၏သဘာဝအလှတရားများအပြင် ဌာနေတိုင်းရင်းသားတို့၏ ရိုးရာဓလေ့များ၊ ဂီတ၊ အကနှင့် ခိုင်မာသောလူမှုအသိုက်အဝန်းဆိုင်ရာ စိတ်ဓာတ်တို့တွင် အမြစ်တွယ်နေသော ကြွယ်ဝသည့် ယဉ်ကျေးမှုအတွေ့အကြုံများကို ပေးအပ်လျက်ရှိသည်။ ဒေသခံအိမ်များတွင်တည်းခိုခြင်း(Homestay)သည် လူကြိုက်များလာသည်နှင့်အမျှ ခရီးသွားများသည် ဒေသဓလေ့ထုံးစံများနှင့် အစား အစာများတွင် နစ်မြုပ်ခံစားရန် အခွင့်အရေးရရှိကြသည်။ ဝါးလက်မှုပညာများ၊ လက်ရက်ထည်များနှင့် မီးခိုးဖြင့်အခြောက်ခံထားသော အစားအစာများသည် ယခုအခါ ပြင်ပမှလာသူများအတွက် ပိုမိုလွယ်ကူစွာ လက်လှမ်းမီနိုင်သည့် နေ့စဉ်ဘဝ၏ တက်ကြွသော အစိတ်အပိုင်းတစ်ခုဖြစ်ကြောင်း တွေ့ရှိရသည်။

အဆိုပါမီးရထားလမ်းသစ်သည် ပြည်နယ်နယ်နိမိတ်ကိုကျော်လွန်၍ သက်ရောက်မှု များလည်းရှိနေသည်။ ၎င်းမီးရထားလမ်းကို မြန်မာနိုင်ငံနယ်စပ်ဘက်သို့ တိုးချဲ့ရန် ဆွေးနွေးညှိနှိုင်းမှုများပြုလုပ်လျက်ရှိပြီး၊မီဇိုရမ်ပြည်နယ်သည် အိန္ဒိယနိုင်ငံနှင့်အရှေ့ တောင်အာရှကိုချိတ်ဆက်ပေးမည့် နိုင်ငံဖြတ်ကျော်ခရီးသွားစင်္ကြံလမ်းများတွင် အဓိကကျသော အချက်အချာနေရာတစ်ခုဖြစ်လာနိုင်ပါသည်။တစ်ချိန်က ပထဝီဝင် အရနှင့် နိုင်ငံရေးအရအထီးကျန်နေသည်ဟု ယူဆခဲ့ကြသော အဆိုပါဒေသကို ယခုအခါ တောင်အာရှနှင့် အရှေ့တောင်အာရှကြား တံတားတစ်ခုအဖြစ် ရှုမြင်လာကြကြောင်း သိရပါသည်။

Source: India TodayNE, Mizoram’s first railway line opens, connecting remote state to India’s tourism mainstream, July 15, 2025.

(ကောင်းထွဋ်အောင်၊ စီးပွားရေးသံမှူး၊ ကော်လ်ကတ္တားမြို့)