ကမ္ဘောဒီးယားနိုင်ငံသည် ၂၀၂၃ ခုနှစ် ပထမ ၉ လအတွင်း နိုင်ငံပေါင်း ၅၇ နိုင်ငံသို့ ဆန် ၄၅၆၅၈၁ တန် တင်ပို့ခဲ့ပြီး စုစုပေါင်း၀င်ငွေ အမေရိကန်ဒေါ်လာ ၃၂၇.၄ သန်း ရရှိခဲ့ကြောင်း၊ တရုတ်နိုင်ငံသည် ဆန်ဝယ်ယူသည့် ထိပ်တန်းနိုင်ငံအဖြစ် ဆက်လက်ရပ်တည်လျက်ရှိကြောင်း ကမ္ဘောဒီးယား ဆန်စပါးအသင်းချုပ် (CRF) ၏ သတင်းထုတ်ပြန်ချက်တွင် ဖော်ပြထားသည်။
ကမ္ဘောဒီးယား၏ ပြည်ပတင်ပို့သည့် ဆန်အမျိုးအစားများတွင် ဆန်မွှေး၊ အော်ဂဲနစ်ဆန်၊ ဆန်ဖြူ၊ ပေါင်းဆန်နှင့် ဂျပွန်နီကာဆန်များ ပါဝင်သည်။ CRF ၏ အထွေထွေအတွင်းရေးမှူးချုပ် Lun Yeng က အစိုးရအဖွဲ့သစ်၏ ဆန်တင်ပို့မှု မြှင့်တင်ရန် ကြိုးပမ်းအားထုတ်မှုများနှင့်အတူ ဆန်စပါးဈေးကွက်သစ်များကို ဖွင့်လှစ်တင်ပို့နိုင်ခဲ့ကြောင်း Khmer Times သို့ ပြောကြားခဲ့သည်။ CRF သည် ၂၀၂၃ ခုနှစ်တွင် ဆန်တန်ချိန် ၇၀၀၀၀၀ တင်ပို့နိုင်ရေး ရည်မှန်းချက် ချမှတ်ထားပြီး တရုတ်နိုင်ငံသည် ကြီးမားသော စျေးကွက်တစ်ခု ဖြစ်သည်ဟုဆိုသည်။
ကမ္ဘောဒီးယားနိုင်ငံသည် ၁ နှစ်လျှင် ဆန်တန်ချိန် ၂၅၀၀၀၀ တင်ပို့ရန် အင်ဒိုနီးရှားနိုင်ငံနှင့် ဆန်ကုန်သွယ်ရေး သဘောတူစာချုပ်ကို စက်တင်ဘာလတွင် ချုပ်ဆိုခဲ့ပြီး လာမည့်နှစ်မှစတင်၍ တင်ပို့မည်ဖြစ်ပါသည်။ ထို့ပြင် ကမ္ဘောဒီးယားနိုင်ငံသည် ဇူလိုင်လတွင် ဖိလစ်ပိုင်ဈေးကွက်သို့ ပထမဆုံးအကြိမ် ဆန်တင်ပို့နိုင်ခဲ့သည်။
Source: Khmer Times, 9 Oct 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)
Source:https://www.doca.gov.mm/my/node/14260
