ထိုင်းနိုင်ငံက ကင်ဆာရောဂါကုသရန် Imcranib 100 ဟုအမည်ပေးထားသည့် ကင်ဆာရောဂါကုသဆေးလုံးကို ထိုင်းတော်ဝင်မင်းသမီး Chulabhorn Krom Phra Srisavangavadhana ၏ ဦးဆောင်မှုဖြင့် နိုင်ငံအတွင်း၌ ပထမဆုံးအကြိမ်အဖြစ် ထုတ်လုပ်လိုက်ပြီဖြစ်ကြောင်း သိရှိရပါသည်။
အဆိုပါဆေးသည် ခေတ်မီကင်ဆာကုသဆေးချဉ်းကပ်ပုံတစ်ခုဖြစ်ပြီး ကျန်းမာ သောဆဲလ်များကိုမထိခိုက်စေရန် ကင်ဆာဆဲလ်များကို တိတိကျကျတိုက်ထုတ်နိုင်ရန်ထုတ်လုပ်ထားခြင်းဖြစ်ကြောင်း၊ထို့ပြင် ကီမိုသွင်းသည့်ပုံစံဖြစ်သည့် သမားရိုးကျ ကင်ဆာကုသနည်းများကဲ့သို့ ဘေးထွက်ဆိုးကျိုးများ မရှိအောင်လည်း ပြုလုပ်ထားကြောင်း၊ ယင်းကုသနည်းသည် လူနာတစ်ဦးချင်းစီ၏ အခြေအနေပေါ် မူတည်၍ အကောင်းဆုံးကုသမှုပေးနိုင်မည်ဖြစ်ကြောင်း Chulabhorn Royal Academy (CRA)က ထုတ်ပြန်ထားပါသည်။
ကင်ဆာဝေဒနာသည်များအတွက် ထိရောက်သောဆေးဝါးများကို လက်လှမ်းမီရန်မှာ အကန့်အသတ်ရှိနေသောကြောင့် ထိုင်းတော်ဝင်မင်းသမီး Chulabhorn က ဦးဆောင်ပြီး ၂၀၂၀ ပြည့်နှစ်မှစ၍ ထိုင်းနိုင်ငံ၊ Sattahip ခရိုင်၊ ချွန်ပူရိတွင် ဆေးဝါးထုတ်လုပ်ရေးစက်ရုံတည်ဆောက်ခဲ့ပါကြောင်း၊ CRA လက်အောက်တွင် လည်ပတ်နေသော အဆိုပါဆေးဝါးထုတ်လုပ်ရေးစက်ရုံမှနိုင်ငံတကာ GMDP PIC/s စံနှုန်းများနှင့်အညီ ထိုင်းနိုင်ငံ၏ပထမဆုံးကင်ဆာကုသဆေးကို ထုတ်လုပ်ခဲ့ခြင်းဖြစ်ကြောင်း၊ ထိုင်းနိုင်ငံသည် ကုန်ကျစရိတ်များသည့် ဆေးဝါးသွင်းကုန်များအပေါ် မှီခိုနေရမှုကို လျှော့ချရန်နှင့် ပြည်တွင်းဆေးဝါးထုတ်လုပ်မှုစွမ်းရည်မြှင့်တင်ရန်ဆောင်ရွက်ခဲ့ခြင်းဖြစ်ကြောင်း၊ ဓာတ်ခွဲခန်းအတွင်း သိပ္ပံဆိုင်ရာလုပ်ငန်းလည်ပတ်မှုများနှင့် စုံစမ်းစစ်ဆေးရေးတို့တွင်ပါဝင်ခြင်းဖြင့် စက်ရုံ၏တိုးတက်မှုအခြေအနေကို ထိုင်းတော်ဝင်မင်းသမီးက ကြီးကြပ်ပါကြောင်း၊ကုန်ကြမ်းပစ္စည်းမှသည်ဆေးလုံးအဖြစ် ထုတ်ကုန် ဖြစ်မြောက်သည်အထိ ဓာတုဗေဒနှင့်ရုက္ခဗေဒဆိုင်ရာ ဆန်းစစ်ချက်များဆောင်ရွက် ခြင်း၊ ဆေးဝါးထုတ်လုပ်မှုတွင် ကမ္ဘာ့စံနှုန်းများကို ထိန်းသိမ်းရန် အားစိုက်ထုတ်မှုများတွင်လည်း ဦးဆောင်ခဲ့ကြောင်း သိရှိရပါသည်။
ဆေးလုံး ၁ လုံးတွင် Imatinib 100 mg ပါဝင်ပြီး ဆေးဝါးမှတ်ပုံတင်ခြင်းကို ၂၀၂၅ ခုနှစ် မေလ ၂၀ ရက်နေ့တွင် ထိုင်းနိုင်ငံ အစားအသောက်နှင့် ဆေးဝါးကွပ်ကဲရေးဦးစီးဌာန(FDA)၌ ဆောင်ရွက်ခဲ့ကြောင်း၊ ယင်းဆေးသည် tyrosine kinase inhibitor(TKI)တစ်ခုဖြစ်ပြီး ကင်ဆာဆဲလ်များအတွက် ဦးတည်ထားပါကြောင်း၊ chronic myeloid leukaemia (CML)၊ gastrointestinal stromal tumours (GIST)နှင့် ဖြစ်ခဲသည့် အရေပြားကင်ဆာ(rare skin cancers-DFSP)များကို ကုသမှုတွင် အသုံးပြုသွားမည်ဖြစ်ကြောင်း၊ Imcranib 100 ကို အသုံးပြုသည့် ကုသမှုကို Chulabhorn ဆေးရုံတွင် ရရှိနေပြီဖြစ်ရာ ကုသစရိတ်လျော့နည်းပြီး ထိုင်းလူနာများအတွက် စောင့်ရှောက်မှု တိုးမြှင့်ရရှိနိုင်ကြောင်းဖြစ်ကြောင်း CRA က ထုတ်ပြန်ထားပါသည်။
အဆိုပါအောင်မြင်မှုသည် ထိုင်းနိုင်ငံသားများအတွက် ကင်စာကုသစရိတ်ဝန်ထုပ် ဝန်ပိုးကို သက်သာစေရုံသာမက ဆေးဝါးဖော်စပ်မှု၊ ထုတ်လုပ်မှု၊ အရည်အသွေးထိန်းချုပ်မှု၊ ဆေးဝါးစစ်ဆေးမှုနှင့် ကြီးကြပ်ကွပ်ကဲမှုလုပ်ငန်းစဉ်များတွင် ထိုင်းနိုင်ငံ ၏စွမ်းဆောင်ရည်ကိုလည်း တိုးမြှင့်စေပါကြောင်း၊ အနာဂတ်ကင်ဆာဆေးဝါးဖွံ့ဖြိုးတိုးတက်မှုနှင့် စဉ်ဆက်မပြတ်သော ပြည်သူ့ကျန်းမာရေးတိုးတက်မှုအတွက် နိုင်ငံအဆင့်ဆေးဝါးဖူလုံမှုကို ပိုမိုခိုင်မာစေပါကြောင်း၊ ထိုင်းတော်ဝင်မင်းသမီး၏ ဦးဆောင်မှုဖြင့် ထိုင်းနိုင်ငံ၏ ပထမဆုံးဇီဝဆိုင်ရာဆေးဝါးဖြစ်သည့် Trastuzumab (Herdara)အဖြစ် မှတ်ပုံတင်ထားသော)ကို အောင်မြင်စွာထုတ်လုပ်နိုင်ပြီး မေလ ၂၀ ရက်နေ့တွင် FDA အတည်ပြုချက်ရရှိပြီးဖြစ်ကြောင်း၊ နိုင်ငံခြားနည်းပညာများမပါဝင်ဘဲ ထိုင်းသုတေသနပညာရှင်များက ထုတ်လုပ်ခဲ့သော Herdara သည် ဇီဝဆေးဝါးဆိုင်ရာအတွက်မှတ်တိုင်တစ်ခုဖြစ်ကြောင်း CRA က ထုတ်ပြန်ထားပါသည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
