၂၀၂၅ ခုနှစ် ဇန်နဝါရီလမှ နိုဝင်ဘာလအတွင်း ထိုင်းနိုင်ငံ၏ ကားတင်ပို့မှုသည် ယခင်နှစ်ထက် ၁၂ % ကျဆင်းခဲ့ပြီး ၇၈,၆၉၂ ယူနစ်သာရှိတော့ကြောင်း၊ ပြိုင်ဆိုင်မှုကြီးထွားလာနေချိန်တွင် အတွင်းပိုင်းလောင်ကျွမ်းအင်ဂျင်(ICE)ယာဉ်များသည် ပြည်ပဈေးကွက်များတွင် ကျဆင်းသွားသည်ဟု ထိုင်းစက်မှုလုပ်ငန်းအဖွဲ့ချုပ်(FTI)က ဆိုထားကြောင်း ဗန်ကောက်ပို့စ်သတင်းစာတွင် “Car exports decline 12%” ခေါင်းစဉ်ဖြင့် ဖော်ပြထားပါသည်။
ထိုသို့ဈေးကွက်ကျဆင်းခြင်းသည် ကမ္ဘာလုံးဆိုင်ရာ မော်တော်ကားထုတ်လုပ်သူများသည် ICE မော်ဒယ်များကို ဘက်ထရီလျှပ်စစ်ယာဉ်များ (BEV)များဖြင့် အစားထိုးခြင်း၊ နိုင်ငံအချို့တွင် ရေနံလောင်စာသုံးကားများအပေါ် ကာဗွန်ထုတ်လွှတ်မှုအခွန်အသစ်များနှင့် ထိုင်းနိုင်ငံ၏ ကုန်သွယ်ဖက်များအကြား စီးပွားရေးနှေးကွေးလာခြင်းတို့ကြောင့်ဖြစ် ကြောင်း၊ တရုတ်နိုင်ငံ၏ BEV ပို့ကုန်မြင့်တက်လာမှုသည် ICE တင်ပို့မှုများကို အဓိကမှီခိုနေရဆဲဖြစ်သည့် ထိုင်းနိုင်ငံထက် ကျော်လွန်သွားကြောင်း၊ ယခုကာလအတွင်း အာရှသို့ ပို့ကုန်များသည် ၅.၆၄ ရာခိုင်နှုန်းကျဆင်းခဲ့ပြီး ဩစတြေးလျသို့ တင်ပို့မှုသည် ၁၆ ရာခိုင်နှုန်းနှင့် EU သို့ တင်ပို့မှုသည် ၃၃ ရာခိုင်နှုန်းကျဆင်းခဲ့ကြောင်း၊ အရှေ့အလယ်ပိုင်းသည် ကောင်းမွန်သောနေရာတစ်ခုဖြစ်ပြီး ၀.၄၅ ရာခိုင်နှုန်းမြင့်တက်ခဲ့ပါကြောင်း၊ စီးပွားရေးကျဆင်းနေသော်လည်း ထိုင်းနိုင်ငံသည် အာရှနှင့်သမုဒ္ဒရာဒေသတွင်အဓိကပို့ကုန်တင်ပို့သူအဖြစ်ရှိနေဆဲဖြစ်ကြောင်း FTI ဒုတိယဥက္ကဋ္ဌနှင့် အသင်းချုပ်၏ မော်တော်ကားလုပ်ငန်းကလပ်၏ ပြောရေးဆိုခွင့်ရှိသူ Mr. Surapong Paisitpatanapong က ပြောကြားခဲ့ပါသည်။
နိုဝင်ဘာလအတွင်း ရောင်းအားမှာ ၂၀.၆ ရာခိုင်နှုန်းမြင့်တက်ကာ ယူနစ် ၅၁,၀၄၄ ရှိခဲ့ရာ ပထမ ၁၁ လအတွင်း ပြည်တွင်းတွင် ကားရောင်းအား ၅.၂ ရာခိုင်နှုန်းမြင့်တက်ခဲ့သဖြင့် နှစ်အလိုက်ရောင်းအားမှာ ယူနစ် ၅၄၆,၀၄၅ ရှိခဲ့ပါကြောင်း၊ တိုးတက်မှုသည် ဝယ်ယူနိုင်သည့် BEV ဈေးနှုန်းများ၊ ထိုင်းဘဏ်၏ မူဝါဒအတိုးနှုန်းလျှော့ချပြီးနောက် ချေးငွေအတိုးနှုန်းများလျော့ကျလာခြင်းနှင့် ဒီဇင်ဘာလ ၁၀ ရက်နေ့တွင် ပြီးဆုံးခဲ့သည့် ၁၂ ရက်ကြာကျင်းပခဲ့သော ထိုင်းနိုင်ငံတကာမော်တော်ယာဉ်ပြပွဲအတွင်း ခိုင်မာသည့် အရောင်းမြှင့်တင်ရေးများကြောင့်ဖြစ်ကြောင်း၊ BEV ရောင်းအားသည် ယခုနှစ်တွင် ယူနစ် ၁၂၀,၀၀၀ အထိရောက်ရှိရန် မျှော်လင့်ထားပြီး မော်တော်ကားပြပွဲမှ ဝယ်လိုအားကြောင့် ယူနစ် ၁၀၀,၀၀၀ မှန်းထားသည်ထက် ကျော်လွန်မည်ဖြစ်ကြောင်း ၎င်းက ဖြည့်စွက်ပြောကြားခဲ့သည်။
အသင်းအနေဖြင့် ၂၀၂၅ ခုနှစ်အတွက် ထုတ်လုပ်မှုခန့်မှန်းထားချက်ကို ၁.၄၅ သန်းတွင် ဆက်လက်ထိန်းသိမ်းထားပြီး ၎င်းပမာဏ၌ ပို့ကုန်အတွက် ၉၅၀,၀၀၀ နှင့် ပြည်တွင်းဈေးကွက်အတွက် ၅၀၀,၀၀၀ ပါဝင်ကြောင်း၊ ပို့ကုန်သည် မှန်းထားသည်ထက် လျော့နည်းသွားနိုင်သော် လည်း ပြည်တွင်းထုတ်လုပ်မှုမှာ ယူနစ် ၆၀၀,၀၀၀ အထိမြင့်တက်လာနိုင်ကြောင်း၊ အစိုးရ၏ လှုံ့ဆော်မှုအစီအစဉ်များအောက်တွင် BEV ထုတ်လုပ်မှုတိုးမြှင့်လာခြင်းကြောင့် နိုဝင်ဘာလတွင် ထိုင်းနိုင်ငံ၏ မော်တော်ကားထုတ်လုပ်မှုသည် ယခင်နှစ်ထက် ၁၁ ရာခိုင်နှုန်းမြင့်တက်လာပြီး ၁၃၀,၂၂၂ ယူနစ်ရှိခဲ့ကြောင်း၊ သို့သော် ဇန်နဝါရီလမှ နိုဝင် ဘာလအထိ စုစုပေါင်းထုတ်လုပ်မှုမှာ ၁.၆ ရာခိုင်နှုန်းကျဆင်းပြီး ယူနစ် ၁,၃၄၁,၇၁၄ ရှိခဲ့ကြောင်း၊ လာမည့်နှစ်အစောပိုင်းတွင် ကျင်းပမည့် အထွေထွေရွေးကောက်ပွဲအပြီးတွင် အစိုးရသစ်သည် တိုးတက်မှုကို လှုံ့ဆော်ရန်နှင့် ယုံကြည်မှုကို ခိုင်မာစေရန်ရည်ရွယ်သည့် စီးပွားရေးအစီအစဉ်များကို မိတ်ဆက်လိမ့်မည်ဟု အသင်းက မျှော်လင့်ထားကြောင်း၊ ယင်းကဲ့သို့သောအစီအမံများသည် မော်တော်ကားလုပ်ငန်းနှင့် စီးပွားရေးနှစ်ခုစလုံးအတွက် အကျိုးရှိသင့်ကြောင်း Mr. Surap-ong က သုံးသပ်ထားပါသည်။
Source: www.bangkokpost.com
(သီတာဝင်း၊ စီးပွားရေးသံမှူး၊ ဗန်ကောက်မြို့)
