အမေရိကန်နိုင်ငံနှင့် ကုန်သွယ်ရေးဆိုင်ရာ တင်းမာမှုများဖြစ်ပေါ်နေသော်လည်း ၂၀၂၅ ခုနှစ်၊ ဧပြီလမှ ဇွန်လအထိ ၃ လပတ်ကာလတွင် ဂျပန်နိုင်ငံ၏ပို့ကုန်မှာ မြင့်တက်ခဲ့ခြင်းကြောင့် ဂျပန်နိုင်ငံ၏ နှစ်စဉ်စီးပွားရေးဖွံ့ဖြိုးတိုးတက်မှုနှုန်းမှာ ယခင် ၃ လပတ်ကာလနှင့်နှိုင်းယှဉ်ပါက ၁ ရာခိုင်နှုန်းမြင့်တက်ခဲ့ကြောင်း ၁၅-၈-၂၀၂၅ ရက်နေ့ထုတ် The Nikkei Asia သတင်းစာတွင် “Japan Q2 GDP expands annualized 1.0%, beating forecasts” ခေါင်းစဉ်ဖြင့် ဖော်ပြခဲ့ပါသည်။
အဆိုပါသတင်းတွင် ၂၀၂၅ ခုနှစ်၊ ဧပြီလမှ ဇွန်လအထိ ၃ လပတ်ကာလတွင် ဂျပန်နိုင်ငံ၏ နှစ်စဉ်စီးပွားရေးဖွံ့ဖြိုးတိုးတက်မှုနှုန်းမှာ ၀.၃၇ ရာခိုင် နှုန်းမြင့်တက်နိုင်ကြောင်း Japan Center for Economic Research (JCER)က ခန့်မှန်းခဲ့ကြောင်း၊ ၂၀၂၅ ခုနှစ်၊ ဇန်နဝါရီလမှ မတ်လအထိ ၃ လပတ်ကာလတွင် ဂျပန်နိုင်ငံ၏စီးပွားရေးမှာ ၀.၂ ရာခိုင်နှုန်းကျဆင်းနိုင်ကြောင်းခန့်မှန်းခဲ့ရာမှ ၀.၆ ရာခိုင်နှုန်းသို့မြင့်တက်ခဲ့ကြောင်း၊ ၂၀၂၅ ခုနှစ်၊ ဧပြီလမှ ဇွန်လအထိ ၃ လပတ်ကာလတွင် အမေရိကန်နိုင်ငံနှင့် ဂျပန်နိုင်ငံအကြား ကုန်သွယ်ရေးဆိုင်ရာသဘောတူညီမှုများမရရှိသေးသော်လည်း ဂျပန်နိုင်ငံ၏ပို့ကုန်မှာ ၂ ရာခိုင်နှုန်းနှင့်သွင်းကုန်မှာ ၀.၆ ရာခိုင်နှုန်းမြင့်တက်ခဲ့ကြောင်း၊ပို့ကုန်မြင့်တက်ခဲ့ခြင်းကြောင့် ၂၀၂၅ခုနှစ်၊ ဧပြီလမှ ဇွန်လအထိ ၃ လပတ်ကာလတွင် ဂျပန်နိုင်ငံ၏စီးပွားရေးဖွံ့ဖြိုးမှုကို ၀.၃ ရာခိုင်နှုန်းအထောက်အပံ့ဖြစ်စေခဲ့ကြောင်း၊ ထို့အတူ ၂၀၂၅ ခုနှစ်၊ ဧပြီလမှ ဇွန်လအထိ ၃ လပတ်ကာလတွင် ပုဂ္ဂလိကရင်းနှီးမြှုပ်နှံမှုမှာ ယခင် ၃ လပတ်ကာလနှင့်နှိုင်းယှဉ်ပါက ၁.၃ ရာခိုင်နှုန်းများပြားခဲ့ကြောင်း ဖော်ပြထားပါသည်။
ဂျပန်နိုင်ငံ၏ စီးပွားရေးဖွံ့ဖြိုးတိုးတက်မှုအတွက် များစွာအထောက်အပံ့ဖြစ်စေသော ပုဂ္ဂလိကဝယ်ယူသုံးစွဲနိုင်စွမ်းမှာ ယခင် ၃ လပတ်ကာလနှင့်နှိုင်းယှဉ်ပါက ၀.၂ ရာခိုင်နှုန်းမြင့်တက်ခဲ့ကြောင်း၊ လာမည့် ၃ လပတ်ကာလများတွင် ဂျပန်နိုင်ငံ၏ပို့ကုန်တင်ပို့မှုကျဆင်းနိုင်သည့်အတွက် ဂျပန်နိုင်ငံ၏စီးပွားရေးလည်းကျဆင်းနိုင်မည်ဖြစ်ကြောင်းနှင့် ဂျပန်ဗဟိုဘဏ်အနေဖြင့် တင်းကြပ်သည့်ငွေကြေးမူဝါဒများကို အောက်တိုဘာလတွင်ချမှတ်နိုင်ဖွယ်ရှိကြောင်း၊ ဂျပန်နိုင်ငံ၏ ကုန်စည်များအပေါ် အမေရိကန်နိုင်ငံမှ အကောက်ခွန်ကောက်ခံမှုကြောင့် ဂျပန်နိုင်ငံ၏နှစ်စဉ်စီးပွား ရေးဖွံ့ဖြိုးတိုးတက်မှုနှုန်းမှာ ၀.၂ ရာခိုင်နှုန်းမှ ၀.၄ ရာခိုင်နှုန်းအကြားကျဆင်းနိုင်မည်ဖြစ်ကြောင်း စီးပွားရေးပညာရှင်များက ခန့်မှန်းထားကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
