တရုတ်နိုင်ငံနှင့်ကိုရီးယားသမ္မတနိုင်ငံတို့အနေဖြင့် သွပ်ရည်စိမ်သံမဏိများကို ဂျပန်နိုင်ငံသို့ တင်ပို့ရောင်းချရာတွင် ဈေးကွက်ပေါက်ဈေးထက် လျှော့ချရောင်းချခဲ့ခြင်းကြောင့် ဂျပန်ပြည်တွင်းထုတ်သံမဏိဝယ်လိုအား ကျဆင်းကာ ဈေးနှုန်းသက်သာသည့်ပြည်ပမှတင်သွင်းလာသော သံမဏိ များကို ဝယ်ယူခဲ့ကြခြင်းကြောင့် Nippon Steel ၊ Kobe Steel နှင့်အခြားသော ဂျပန်ပြည်တွင်းရှိ သံမဏိထုတ်လုပ်သူများအပေါ် ထိခိုက်နစ်နာစေလျက်ရှိသည့်အတွက်စုံစမ်းစစ်ဆေးမှုများပြုလုပ်ပေးရန် ၂၀၂၅ ခုနှစ်၊ ဧပြီလ ၂၈ ရက်နေ့တွင် သံမဏိကုမ္ပဏီများမှ တိုင်ကြားခဲ့ခြင်းကြောင့် ဂျပန်နိုင်ငံ စီးပွားရေး၊ ကုန်သွယ်ရေးနှင့်စက်မှုဝန်ကြီးဌာနမှ စုံစမ်းစစ်ဆေးမှုများစတင်ပြုလုပ်ခဲ့ကြောင်း ၁၃-၈-၂၀၂၅ ရက်နေ့ထုတ် The Nikkei Asia သတင်းစာတွင် “Japan starts anti-dumping probe into steel from China, South Korea” ခေါင်းစဉ်ဖြင့် ဖော်ပြခဲ့ပါသည်။
အဆိုပါသတင်းတွင် စုံစမ်းစစ်ဆေးမှုများပြုလုပ်ရာတွင် ဟောင်ကောင်နှင့် မကာအိုတို့မှ တင်သွင်းလာသည့် သွပ်ရည်စိမ်သံမဏိများမပါဝင်ကြောင်း၊ သွပ်ရည်စိမ်သံမဏိများကို ဆောက်လုပ်ရေးလုပ်ငန်းများတွင် အများဆုံးအသုံးပြုကြကြောင်း၊ တရုတ်နိုင်ငံနှင့်ထိုင်ဝမ်တို့မှ တင်သွင်းခဲ့သော သံပြားအလိပ်များကိုလည်း ဈေးကွက်ပေါက်ဈေးထက် လျှော့ချရောင်းချမှုရှိ-မရှိကို ဂျပန်အစိုးရအနေဖြင့် ၂၀၂၅ ခုနှစ်၊ ဇူလိုင်လတွင် စတင်စစ်ဆေးမှုများပြုလုပ်ခဲ့ကြောင်း၊ ပို့ကုန်ပစ္စည်းများဈေးလျှော့ရောင်းချမှုတိုက်ဖျက်ရေးအခွန်ကို ကောက်ခံနိုင်ရေးအတွက် ဂျပန်နိုင်ငံ ကုန်သွယ်ရေးဝန်ကြီးဌာနနှင့် ဘဏ္ဍာရေးဝန်ကြီးဌာနတို့အနေဖြင့် စုံစမ်းစစ်ဆေးမှုများကို ၁ နှစ်အတွင်း ပြီးစီးအောင်ဆောင်ရွက်သွားမည်ဖြစ် ကြောင်း ဖော်ပြထားပါသည်။
စုံစမ်းစစ်ဆေးမှုများပြုလုပ်သွားမည့် ကုန်စည်များအပြင် ဂျပန်နိုင်ငံတွင်းသို့ မမျှတသည့် ဈေးနှုန်းများဖြင့် တင်သွင်းလာမည့် အခြားသောသံမဏိနှင့်ဆက်စပ်သည့်ကုန်စည်များကိုလည်း လေ့လာစောင့်ကြည့်ကာ လိုအပ်ပါက ကုန်သွယ်ရေးဆိုင်ရာ အရေးယူမှုများပြုလုပ်နိုင်ရေး ဂျပန်အစိုးရထံ တိုင်ကြားသွားမည်ဖြစ်ကြောင်း၊ကမ္ဘာ့နိုင်ငံများတွင် ကိုယ်ကျိုး စီးပွားကာကွယ်ရေးမူဝါဒများကျင့်သုံးမှုမြင့်မားလာခြင်းကြောင့် ဂျပန်နိုင်ငံတွင် ပြည်ပမှတင်သွင်းလာသော ဈေးနှုန်းသက်သာသည့်သံမဏိများ များပြားကာ ပြည်တွင်းထုတ်လုပ်မှုကို ထိခိုက်စေလျက်ရှိကြောင်း Nippon Steel ၏ဥက္ကဋ္ဌ Tadashi Imai က ပြောကြားထားကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
