လက်ရှိအာဏာရပါတီဖြစ်သည့် ဂျပန်ဝန်ကြီးချုပ်ရှီဂဲရုအီရှီဘ၏ လစ်ဘရယ်ဒီမိုကရက်တစ်ပါတီနှင့် အခြားသောပါတီ ၅ ခုတို့အနေဖြင့် လောင်စာဆီအပေါ် အခွန်လျှော့ချကောက်ခံခြင်းကြောင့် လျော့နည်းသွားမည့်နိုင်ငံ့ဘဏ္ဍာငွေများကို ပြန်လည်ဖြည့်တင်းနိုင်မည့် နည်းလမ်း များကို ၂၁-၈-၂၀၂၅ ရက်နေ့တွင် ဆွေးနွေးသွားရန်ရှိကြောင်း ၁၇-၈-၂၀၂၅ ရက်နေ့ထုတ် The Nikkei Asia သတင်းစာတွင် “Japan corporate tax hike emerges as option for LDP and opposition” ခေါင်းစဉ်ဖြင့် ဖော်ပြ ခဲ့ပါသည်။
အဆိုပါသတင်းတွင် ဂျပန်အစိုးရအနေဖြင့် လောင်စာဆီရောင်းချသည့် ကုမ္ပဏီများထံမှ ရောင်းချရသည့် လောင်စာဆီ ၁ လီတာတိုင်းအပေါ် ထပ်ဆောင်းအခွန်ကောက်ခံခြင်းကို ရပ်ဆိုင်းသွားခြင်းကြောင့် အစိုးရ၏ ဘဏ္ဍာငွေယန်း ၁ ထရီလီယံ(အမေရိကန်ဒေါ်လာ ၆.၈ ဘီလီယံ) လျော့နည်းသွားနိုင်မည်ဖြစ်ကြောင်း၊ လက်ယာယိမ်းပါတီများဖြစ်ကြသည့် လစ်ဘရယ်ဒီမိုကရက်တစ်ပါတီနှင့် မိတ်ဖက်ပါတီဖြစ်သည့် ကိုမေးတိုးပါတီတို့အနေဖြင့် အခွန်လျှော့ချကောက်ခံခဲ့မှုကြောင့်လျော့နည်း သွားမည့် ဘဏ္ဍာငွေများအတွက် ပုံမှန်ဖြည့်ဆည်းပေးမည့် ရန်ပုံငွေရရှိရန်လိုလားလျက်ရှိနေပြီး စီးပွားရေးလုပ်ငန်းများအပေါ် ဝင်ငွေခွန်တိုးမြှင့်ကောက်ခံခြင်းသည် ပုံမှန်ရန်ပုံငွေများရရှိစေနိုင်မည့် နည်းလမ်းတစ်ခုဖြစ်ကြောင်း လစ်ဘရယ်ဒီမိုကရက်တစ်ပါတီ၏ အခွန်မူဝါဒဆိုင်ရာကော်မရှင်အဖွဲ့ဝင်တစ်ဦးက ပြောကြားထားကြောင်း ဖော်ပြထားပါ သည်။
ဂျပန်ဝန်ကြီးချုပ်ဟောင်း ရှင်ဇိုအာဘေးလက်ထက် ၂၀၁၃ ခုနှစ်တွင် စီးပွားရေးပြန်လည်ဦးမော့စေရေးစီမံချက်အရ ဗဟိုအစိုးရနှင့် ပြည်နယ်အစိုးရများမှ စီးပွားရေးလုပ်ငန်းများအပေါ် စုစုပေါင်းကောက်ခံခဲ့သည့် ဝင်ငွေခွန်ကို ၃၇ ရာခိုင်နှုန်းမှ ၂၉.၇၄ရာခိုင်နှုန်းသို့လျှော့ချပေးခဲ့ကြောင်း၊ လစ်ဘရယ်ဒီမိုကရက်တစ်ပါတီအနေဖြင့် ဘဏ္ဍာငွေများခွဲဝေသတ်မှတ်ပေးသည့် အောက်လွှတ်တော်နှင့်အထက်လွှတ်တော်တို့တွင် အမတ်နေရာအများစုရရှိထားခြင်းမရှိသည့်အတွက် အတိုက်အခံပါတီဘက်မှ သဘောတူညီမှုမရှိပါက အခွန်နှင့်ဆက်စပ်သည့်ဥပဒေများကို ပြဌာန်းနိုင်မည်မဟုတ်ကြောင်း၊ သို့သော် လုပ်ငန်းကြီးများအပေါ် ဝင်ငွေခွန်ကောက်ခံခြင်းကို အတိုက်အခံပါတီအများစုအနေဖြင့် သဘောတူကြမည်ဖြစ်ကြောင်း၊ ၂၀၂၅ ခုနှစ်၊ ဇူလိုင်လတွင် ကျင်းပခဲ့သည့် အထက် လွှတ်တော်ရွေးကောက်ပွဲတွင် ငွေကြေးဖောင်းပွမှုကြောင့် ထိခိုက်မှုများခံစားခဲ့ရသည့် အိမ်ထောင်စုများအပေါ် ထောက်ပံ့ပေးနိုင်ရေးမှာ အဓိကအကြောင်းအရာတစ်ရပ်ဖြစ်ခဲ့ကြောင်း၊ အတိုက်အခံပါတီများအနေဖြင့် ထိုစဉ်က စားသုံးခွန်နှင့် ဝင်ငွေခွန်လျှော့ချကောက်ခံရန် အဆိုပြုခဲ့ကြကြောင်း ဖော်ပြထားပါသည်။
လက်ဝဲယိမ်းပါတီဖြစ်သည့် Constitutional Democratic Party of Japan အနေဖြင့် ရွေးကောက်ပွဲကြေညာချက်အဖြစ် စီးပွားရေးလုပ်ငန်းများအနေဖြင့် ရရှိသည့် အမြတ်ဝင်ငွေအပေါ် မူတည်၍ သင့်လျော်သည့်အခွန်ဘဏ္ဍာငွေများကို ပေးဆောင်သင့်သည်ဟု ထုတ်ပြန်ခဲ့ကြောင်း၊ ထို့ပြင် သုတေသနနှင့်ဖွံ့ဖြိုးရေးလုပ်ငန်းများနှင့် ဝန်ထမ်းလစာများကို တိုးမြှင့်ပေးသော စီးပွားရေးလုပ်ငန်းများအပေါ် အထူးအခွန်ကင်းလွတ် ခွင့်ပြုထားခြင်းကိုလည်း ရုပ်သိမ်းစေလိုကြကြောင်းနှင့် စီးပွားရေး လုပ်ငန်းများအပေါ် ထိုသို့အခွန်ကင်းလွတ်ခွင့်ပြုပေးရခြင်းကြောင့် နိုင်ငံ့ဘဏ္ဍာငွေကို ၁ နှစ်လျှင် ၂ ထရီလီယံယန်းလျော့နည်းစေလျက်ရှိကြောင်း ဖော်ပြထားပါသည်။
(သူဇာဖြိုး၊ စီးပွားရေးသံမှူး၊ တိုကျိုမြို့)
