ကမ္ဘာ့ကုန်သွယ်ရေးအဖွဲ့(WTO)ဆိုင်ရာ တရုတ်ကိုယ်စားလှယ်အဖွဲ့၏ ထုတ်ပြန်ချက်အရ တရုတ်နိုင်ငံသည် အာဖရိကရှိ နိုင်ငံပေါင်း ၅၃ နိုင်ငံအတွက် ကုန်သွယ်ရေးလိုင်းများ၏ ၁၀၀ ရာခိုင်နှုန်းအထိ အကောက်ခွန်ကင်းလွတ်ခွင့်သက်တမ်းတိုးမြင့်ပေးရန် ပြင်ဆင်ထားကြောင်းသိရှိရသည်။ ယင်းသို့ဆောင်ရွက်ခြင်းသည် အာဖရိကနိုင်ငံများမှ ကုန်စည်များအတွက် ပိုမိုကျယ်ပြန့်သောဈေးကွက်ဝင်ရောက်ခွင့်ကို ဖန်တီးပေးလိမ့် မည်ဖြစ်သည်။

တရုတ်နိုင်ငံရှိ စူပါမားကတ်များတွင် တောင်အာဖရိကနိုင်ငံထုတ်ဝိုင်များ (South African wines)၊ ဆီနီဂေါနိုင်ငံထုတ် တူနာငါးများ(Senegalese tuna)၊ ကင်ညာနိုင်ငံထုတ် ထောပတ်သီးများ(Kenyan avocados)နှင့် ဘီနင်နိုင်ငံထုတ် နာနတ်သီးများ(Beninese pineapples)ကို ပိုမိုတွေ့ရှိရပြီး အာဖရိကထုတ်ကုန်များအတွက် တရုတ်အကောက်ခွန်ပြုပြင်မှုများ ၏ထင်ရှားသောရလဒ်များကို ပြသနေသည်။

မကြာသေးမီနှစ်များအတွင်း တရုတ်နိုင်ငံသည် အာဖရိကနိုင်ငံများ၏ ဈေးကွက်ဝင်ရောက်နိုင်မှုကို တဖြည်းဖြည်းချဲ့ထွင်ခွင့်ပြုလာခဲ့သည်။ ၂၀၂၄ ခုနှစ်၊ ဒီဇင်ဘာလ ၁ ရက်နေ့မှစတင်၍ တရုတ်နိုင်ငံသည် အာဖရိကနိုင်ငံ ၃၃ နိုင်ငံအပါအဝင် သံတမန်ဆက်ဆံရေးရှိသောဖွံ့ဖြိုးဆဲနိုင်ငံများ(LDCs)အားလုံးအတွက် ကုန်ပစ္စည်းအားလုံး၏ ၁၀၀% အကောက် ခွန်ကင်းလွတ်ခွင့်ကို ပေးအပ်ခဲ့ပြီးဖြစ်သည်။

မကြာသေးမီက တရုတ်နိုင်ငံသည် ၎င်းနှင့်သံတမန်ဆက်ဆံရေးရှိသော အာဖရိကနိုင်ငံ ၅၃ နိုင်ငံအတွက် အကောက်ခွန်လိုင်း ၁၀၀ ရာခိုင်နှုန်းကို အကောက်ခွန်ကင်းလွတ်ခွင့် ဆက်လက်သက်တမ်းတိုးသွားမည်ဖြစ် ကြောင်းကြေညာခဲ့သည်။ စက်မှုလုပ်ငန်းဆိုင်ရာလေ့လာသူများက ယင်းလုပ်ဆောင်ချက်သည် ပိုမိုနက်ရှိုင်းသော စက်မှုပူးပေါင်းဆောင်ရွက်မှုကိုမြှင့်တင်နိုင်ပြီး တရုတ်-အာဖရိကနှစ်ဖက်စလုံးအတွက် တန်ဖိုးမြင့်ပူးပေါင်းဆောင်ရွက်မှုများ ဖန်တီးပေးလာနိုင်မည်ဟု ယုံကြည်ကြသည်။

တရုတ်၏အကောက်ခွန်ကင်းလွတ်ခွင့်မူဝါဒသည် အာဖရိကထုတ်ကုန်များ တရုတ်ဈေးကွက်သို့ ဝင်ရောက်နိုင်ရန် အခက်အခဲများကို သိသိသာသာလျှော့ချပေးပြီး ပိုမိုများပြားသောတင်ပို့မှုများနှင့် ပိုမိုစုံလင်သော ကုန်ပစ္စည်းအမျိုးအစားများဖလှယ်လာနိုင်မည်ဖြစ်ကြောင်း ပေကျင်းတက္ကသိုလ်၊ အာဖရိကလေ့လာရေးဌာန၏ ဒုတိယအတွင်းရေးမှူး Wang Jinjie က ပြောကြားခဲ့သည်။

ယခင်နှစ် တရုတ်-အာဖရိကကုန်သွယ်မှုသည် အမေရိကန်ဒေါ်လာ ၂၉၅ ဒသမ ၆ ဘီလီယံသို့ရောက်ရှိခဲ့ပြီး စတုတ္ထမြောက်နှစ်မြောက်စံချိန်တင်မြင့်တက်ခြင်းဖြစ်သည်။ တရုတ်နိုင်ငံသည် အာဖရိက၏ အကြီးဆုံးကုန်သွယ်ဖက်နိုင်ငံအဖြစ် ၁၆ နှစ်ဆက်တိုက်ရပ်တည်နိုင်ခဲ့သည်။

အကောက်ခွန်ကင်းလွတ်ခွင့်မူဝါဒ စတင်အကောင်အထည်ဖော်ခဲ့သည့်အချိန်မှစ၍ ၂၀၂၅ ခုနှစ်၊ မတ်လအထိ တရုတ်နိုင်ငံ၏ အာဖရိကဖွံ့ဖြိုးဆဲနိုင်ငံများမှ တင်သွင်းမှုသည် တစ်နှစ်ကာလတွင် ၁၅.၂ % တက်လာပြီး တင်သွင်းမှုတန်ဖိုး အမေရိကန်ဒေါ်လာ ၂၁ ဒသမ ၄၂ ဘီလီယံသို့ ရောက်ရှိခဲ့သည်။ ယခုနှစ် ပထမသုံးလပတ်အတွင်း တရုတ်နိုင်ငံ၏ အာဖရိကထုတ် ကော်ဖီတင်သွင်းမှုတွင် ၇၀.၄% မြင့်တက် လာခဲ့ပြီး ကိုကိုးစေ့(cocoa bean)တင်သွင်းမှုတွင် ၅၆.၈% မြင့်တက်လာခဲ့သည်။

ရှုပ်ထွေးသော ညှိနှိုင်းဆွေးနွေးမှုများ လိုအပ်သည့် အပြန်အလှန်အကျိုး ပြုသော လွတ်လပ်သောကုန်သွယ်ရေးပုံစံများနှင့်မတူဘဲ တရုတ်နိုင်ငံ၏ ချဉ်းကပ်မှုသည် အာဖရိကမိတ်ဖက်အားလုံးအတွက် တဖက်သတ်၊ တန်းတူညီမျှသောဈေးကွက်ဝင်ရောက်နိုင်မှု(unilateral,equal market access)ကို ကမ်းလှမ်းခဲ့သည်။ သက်သာသော အကောက်ခွန်လုပ်ထုံး လုပ်နည်းများနှင့်ပေါင်းစပ်မည်ဆိုပါက စနစ်ပိုင်းဆိုင်ရာဆန်းသစ်မှုသည် အာဖရိကနိုင်ငံများ၏ ကမ္ဘာ့ကုန်သွယ်ရေးတွင် တရားမျှတစွာ ပါဝင်လိုသည့် ဆန္ဒနှင့်လည်းကိုက်ညီကြောင်း Wang က ဖြည့်စွက်ပြောကြားခဲ့သည်။

အာဖရိကနိုင်ငံများသည် ပထဝီအနေအထား(geography)၊ သဘာဝအရင်းအမြစ်ပေါကြွယ်ဝမှုများ(resource endowments)နှင့် စီးပွားရေးပုံစံများ(economic structures)၌ များစွာကွာခြားကြသည်။ ဥပမာအားဖြင့် ကင်ညာနိုင်ငံသည် ပန်းများတင်ပို့ရာတွင် အဓိကနိုင်ငံဖြစ်ပြီး တန်ဇန်းနီးယားနိုင်ငံသည် သီဟိုဠ်စေ့(cashews)နှင့်sisal(ကြိုးမျှင်ထုတ်သောအပင်တစ်မျိုး)တို့ဖြင့် ကျော်ကြားသည်။ တောင်အာဖရိကနိုင်ငံသည် အာဖရိကတွင် စီးပွားရေးအရ အဖွံ့ဖြိုးဆုံးနိုင်ငံများထဲမှ တစ်ခုဖြစ်ပြီး သတ္တုတူးဖော်ရေး(mining)နှင့်စိုက်ပျိုးရေး(agriculture)ကဲ့သို့သော ရင့်ကျက်သည့်လုပ်ငန်းများဖြင့် ပြီးပြည့်စုံသော စက်မှုလုပ်ငန်းစနစ်တစ်ခုကို ထိန်းသိမ်းထားနိုင်ခဲ့သည်။

တရုတ်စိုက်ပျိုးရေးတက္ကသိုလ်၊ လူမှုရေးနှင့် ဖွံ့ဖြိုးရေးလေ့လာမှုဌာန၏ ပါမောက္ခ Zhang Chuanhong အဆိုအရ သဘာဝအရင်းအမြစ်ပေါကြွယ်ဝသည်ဖြစ်စေ၊စိုက်ပျိုးရေးအခြေခံကောင်းမွန်သည်ဖြစ်စေ၊ စက်မှု လုပ်ငန်းမဖွံ့ဖြိုးသေးသည်ဖြစ်စေ အာဖရိကနိုင်ငံများသည် အကောက် ခွန်ကင်းလွတ်ခွင့်မူဝါဒကို အသုံးချ၍ ၎င်းတို့၏ပို့ကုန်များကို တိုးမြှင့်နိုင်ပြီး ၎င်းတို့၏ စက်မှုလုပ်ငန်းနှင့် တန်ဖိုးမြင့်ကွင်းဆက်များကို ဖွံ့ဖြိုးစေခြင်းဖြင့် ဒေသတွင်းစီးပွားရေးတိုးတက်မှုကို အရှိန်မြှင့်တင်နိုင်ဖြစ် ကြောင်း တွေ့ရှိရသည်။

တရုတ်နိုင်ငံသည် စက်မှုလုပ်ငန်းစွမ်းဆောင်ရည်မြှင့်တင်ခြင်းမှတစ်ဆင့် အာဖရိကကို ထပ်မံပံ့ပိုးပေးလျက်ရှိသည်။ တရုတ်စီးပွားရေးနှင့် ကူသန်းရောင်းဝယ်ရေးဝန်ကြီးဌာန၏ အတွင်းဝန် Tang Wenhong က တရုတ်လုပ်ငန်းရှင်များအနေဖြင့် အာဖရိကတစ်ဝှမ်း စီးပွားရေးနှင့် ကုန်သွယ် ရေးဇုန်များတည်ဆောက်ရန် ရင်းနှီးမြှုပ်နှံလျက်ရှိကြောင်း၊ စက်မှုလုပ်ငန်းဆိုင်ရာပူးပေါင်းဆောင်ရွက်မှုကို မြှင့်တင်၍ ဒေသတွင်းအခွန်အခများ(tax revenues)၊ အလုပ်အကိုင်အခွင့်အလမ်းများနှင့် ပို့ကုန်ရငွေများ(export earnings)ကို ပံ့ပိုးပေးလျက်ရှိကြောင်း ပြောကြားခဲ့သည်။

အီဂျစ်နိုင်ငံတွင် တရုတ်လုပ်ငန်းရှင်များတည်ဆောက်ထားသည့် တရုတ် -အီဂျစ်ဆူးအက်စီးပွားရေးနှင့် ကုန်သွယ်ရေးပူးပေါင်းဆောင်ရွက်မှုဇုန် (China-Egypt Suez Economic and Trade Cooperation Zone) သည် ချည်မျှင်များ(textiles)၊ ဖန်(glass)၊ ဆောက်လုပ်ရေးပစ္စည်းများ (building materials)နှင့် အိမ်သုံးလျှပ်စစ်ပစ္စည်းများ(home appliances) စသည့်လုပ်ငန်းများတွင် အစုအဖွဲ့များ ဖွဲ့စည်းထားရှိပြီး အာဖရိကစက်မှုလုပ်ငန်းအတွက် စံနမူနာတစ်ခုဖြစ်လာခဲ့သည်။

တန်ဇန်းနီးယားတွင် တရုတ်လုပ်ငန်းရှင်များတည်ထောင်ထားသည့် အရှေ့အာဖရိကစီးပွားရေးနှင့် ကုန်သွယ်ရေးစင်တာ(East Africa Commercial and Logistics Center)သည် အသေးစားနှင့် အလတ်စားစီးပွားရေးလုပ်ငန်းပေါင်း ၄၃၀ ကျော်ကို စုစည်းထားရှိပြီး အပြည့်အဝလည်ပတ်နိုင်ပါက ဒေသတွင်းအလုပ်အကိုင်အခွင့်အလမ်း ၂၀,၀၀၀ ကျော်ဖန်တီးပေးနိုင်မည်ဟု မျှော်မှန်းထားသည်။

ဇမ်ဘီယာနိုင်ငံတွင် တရုတ်လုပ်ငန်းများထည်ထောင်ထားသည့် ဇမ်ဘီယာ-တရုတ်စီးပွားရေးနှင့် ကုန်သွယ်ရေးပူးပေါင်းဆောင်ရွက်ရေးဇုန် (Zambia-China Economic and Trade Cooperation Zone)သည် ကြေးနီတူးဖော်ခြင်းမှစ၍ အရည်ကျိုခြင်းနှင့် ပြုပြင်ထုတ်လုပ်ခြင်းအဆင့်ထိပြည့်စုံသော ကြေးနီလုပ်ငန်းကွင်းဆက်တစ်ခု(a complete copper industry chain)ကို ဖော်ဆောင်လျက်ရှိပြီး အာဖရိကနိုင်ငံများ၏ သတ္တုတွင်းထွက်ပစ္စည်းများတန်ဖိုးမြှင့်တင်ခြင်းကို ပံ့ပိုးကူညီပေးလျက်ရှိသည်။

တရုတ်နိုင်ငံသည် အာဖရိကမိတ်ဖက်နိုင်ငံများ၏ အထူးအခြေအနေများနှင့် လိုအပ်ချက်များကို ဆက်လက်ထည့်သွင်းစဉ်းစားသွားမည်ဖြစ်ပြီး ကုန်သွယ်ရေးလွယ်ကူချောမွေ့မှု(trade facilitation)၊ အလုံးစုံဖွံ့ဖြိုးတိုးတက်မှု(inclusive growth)၊ ခံနိုင်ရည်ရှိသော ထောက်ပံ့ရေးကွင်းဆက်များ(resilient supply chains)နှင့် စက်မှုလုပ်ငန်းဆိုင်ရာ ခေတ်မီဖွံ့ဖြိုးမှု(industrial modernization)တို့နှင့်စပ်လျဉ်း၍ ညှိနှိုင်းဆွေးနွေးရာတွင် ပြောင်းလွယ်ပြင်လွယ်ရှိပြီး လက်တွေ့ကျသောချဉ်းကပ်မှုကို ဆက်လက်ကျင့်သုံးသွားမည်ဖြစ်သည်။

တရုတ်နိုင်ငံသည် ကမ္ဘာ့ကုန်သွယ်ရေးအဖွဲ့၏ စည်းမျဉ်းများနှင့်ကိုက်ညီပြီး နှစ်ဦးနှစ်ဖက်အကျိုးစီးပွားကို ဖြည့်ဆည်းပေးနိုင်သော သဘောတူညီချက်များကို အမြန်ဆုံးရရှိရန်နှင့် နောက်ဆုံးတွင် အကောက်ခွန်လိုင်းများ၏ ၁၀၀%အကောက်ခွန်ကင်းလွတ်ခွင့်ရရှိရန်မျှော်မှန်းထားကြောင်း တရုတ်စီးပွားရေးဌာန၏ပြောကြားချက်အရ သိရှိရသည်။ တရုတ်နိုင်ငံ ၏ကျယ်ပြန့်သော ဈေးကွက်အကျိုးကျေးဇူးများနှင့် တရုတ်ခေတ်မီရေးလုပ်ငန်းစဉ်၏တိုးတက်မှုများကို အသုံးချ၍ တရုတ်နိုင်ငံအနေဖြင့် အာဖရိကနိုင်ငံများအတွက် အခွင့်အလမ်းများပိုမိုဖန်တီးပေးရန်နှင့် အာဖရိကနိုင်ငံများ ကမ္ဘာ့ကုန်သွယ်ရေးတွင် ပိုမိုတန်းတူညီမျှစွာပါဝင်နိုင်ရန်အတွက် ပံ့ပိုးပေးရန် ရည်ရွယ်လုပ်ဆောင်ခြင်းဖြစ်ကြောင်း သိရှိရသည်။

အရင်းမြစ်။ https://en.people.cn/n3/2025/0813/c90000-20352561.html

(လျန်ရှန်းမုန်၊ စီးပွားရေးသံမှူး၊ ကူမင်းမြို့)