ထိုင်းနိုင်ငံ၏ အဓိက ဘိလပ်မြေစက်ရုံများတည်ရှိရာ ဆာရာဘူရီ (Saraburi) ကို စွန့်ပစ်ပစ္စည်း မှ စွမ်းအင်အဖြစ်ပြောင်းလဲခြင်းဖြင့် စွန့်ပစ်ပစ္စည်း စီမံခန့်ခွဲမှု၏ စံနမူနာနေရာအဖြစ်ဦးတည်ဆောင်ရွက်သွားမည်ဖြစ်ကြောင်း ထိုင်းဘိလပ်မြေထုတ် လုပ်သူများအသင်း ဥက္ကဋ္ဌ Mr. Chana Poomee က ပြောကြားခဲ့ပါသည်။
အသင်းအနေဖြင့် “Ignitable Waste Pallets” ပြုလုပ်မည့် ကနဦးစမ်းသပ်စီမံချက်တစ်ခု ဆောင်ရွက်သွားမည်ဖြစ်ပြီး ဘိလပ်မြေထုတ်လုပ်ရာတွင် လောင်စာအဖြစ်အသုံးပြုရန် တင်သွင်းလာသည့် ကျောက်မီးသွေးနေရာတွင် အစားထိုးသွားမည် ဖြစ်ကြောင်း၊ ဘိလပ်မြေထုတ်လုပ်သူများသည် မိုင်းခွဲခြင်း၊ ဘိလပ်မြေစက်ရုံများနှင့် အနားရှိ ပြည်သူများထံမှ စွန့်ပစ်ပစ္စည်းကို လောင်စာအသစ် ပြုလုပ်ရန် အသုံးပြုနိုင်ပါကြောင်း၊ ပြည်နယ်အတွင်း စွန့်ပစ်ပစ္စည်း လျှော့ချရန် ရည်ရွယ်ပါကြောင်း၊ Tam Diao ခရိုင်ခွဲသည် ဘိလပ်မြေစက်ရုံ ၇ ခုရှိပြီး ထုံးကျောက်တောင်များနှင့်နီးကပ်ပါကြောင်း၊ ထုံး ကျောက်တွင်းများသည် ဘိလပ်မြေထုတ်လုပ်ရာတွင် အလွန်အရေးပါပါကြောင်း Mr. Chana ကဆက်လက်ပြောကြားခဲ့သည်။
ဆာရာဘူရီသည် မြို့ပြဖြစ်ခြင်းနှင့်စိုက်ပျိုးရေးလုပ်ငန်းများ ထွန်းကားလာမှုကြောင့် အမှိုက်များ များပြာလာသဖြင့် ကောင်းမွန်သော စီမံခန့်ခွဲမှုလိုအပ်ပါကြောင်း၊ စွန့်ပစ်ပစ္စည်းပြဿနာကို ဖြေရှင်းမှုအသစ်အဖြစ် အစိုးရအဖွဲ့အစည်းများ၊ လုပ်ငန်းရှင်များနှင့် နေထိုင်သူများပါဝင်သော “Saraburi Sand-box” ကို စတင်ခဲ့ပါကြောင်း၊ အစိုးရ-ပုဂ္ဂလိက ပူးပေါင်းဆောင်ရွက်မှုမှသည် စွန့်ပစ်ပစ္စည်း စီမံခန့်ခွဲမှု နမူနာပုံစံကို အခြားသော ပြည်နယ်များတွင် အသုံးချခြင်းဖြင့် အစိုးရ၏ net-zero ရည်မှန်းချက်ကို လည်း အောင်မြင်စေရန်ဖြစ်ပါကြောင်း၊ အစိုးရ-ပုဂ္ဂလိက ပူးပေါင်းဆောင်ရွက်မှုဖြင့် စွန့်ပစ်ပစ္စည်းမှ စွမ်းအင်ရရှိရန် အထောက်အကူဖြစ်ပါကြောင်း ၎င်းက ဖြည့်စွက်ပြောကြားခဲ့သည်။
“Saraburi Sandbox” သည် အစိုးရ၏ ၂၀၃၀ ပြည့်နှစ်တွင် ကာဗွန်ဒိုင်အောက်ဆိုဒ်ထုတ်လွှတ်မှု လျှော့ချမည့် ကတိကဝတ်ကိုလည်း အထောက်အကူပြုနိုင်ပါကြောင်း၊ ထိုင်းနိုင်ငံသည် ၂၀၆၅ ခုနှစ်တွင် net-zero ဖြစ်ရန် ဆောင်ရွက်သွားမည်ဟု ၂၆ ကြိမ်မြောက် ကုလသမဂ္ဂရာသီဥတု ပြောင်းလဲမှုညီလာခံတွင် ကြေညာခဲ့ကြောင်း သိရှိရပါသည်။
ကမ္ဘာနိုင်ငံအများစုသည် အစားထိုးလောင်စာအသုံးပြုခြင်းဖြင့် သန့်ရှင်းသောစွမ်းအင် ဖြစ်စေ ရေး၊ လောင်ကျွမ်းခြင်းဖြင့် ရရှိလာသော စွမ်းအင်များကို အသုံးပြုခြင်းကို လျော့နည်းစေရေး ပြန်လည် ပြည့်ဖြိုးမြဲစွမ်းအင်များ တိုးမြှင့်အသုံးပြုရန် တိုက်တွန်းလျက်ရှိပါသည်။ ထိုင်းနိုင်ငံသည်လည်း အစားထိုးလောင်စာအသုံးပြုခြင်းဖြင့် ကာဗွန်ဒိုင်အောက်ဆိုဒ်ထုတ်လွှတ်မှုကို လျှော့ချရန် ဦးတည်ဆောင်ရွက်လျက်ရှိကြောင်း သုံးသပ်တင်ပြအပ်ပါသည်။
Source: www.bangkokpost.com
သီတာဝင်း၊ စီးပွားရေးသံမှူး၊ ဗန်ကောက်မြို့။
