မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၌ နှမ်း၊ စားတော်ပဲ၊ ကုလားပဲ၊ ပဲကြီး၊ မြေပဲ၊ ပဲစင်းငုံ၊ နေကြာ၊ ပြောင်း၊ ဝါ၊ ကြက်သွန်နီနှင့် အခြားသီးပင်စားပင်များ စိုက်ပျိုးထွက်ရှိပြီး ဆောင်းသီးနှံကုလားပဲမှာ ၂၀၂၃-၂၀၂၄ဘဏ္ဏာနှစ်အတွက် စိုက်ဧက(၁)သောင်းကျော်စိုက်ပျိုးပြီးစီးခဲ့ကြောင်း မြို့နယ်စိုက်ပျိုးရေးဦးစီးဌာနမှ သိရှိရပါသည်။
အထက်မင်းလှမြို့၊ ပန်းတော်ပြင်ကျေးရွာအုပ်စု၊ ဥယျာဉ်ကျေးရွာတွင် ကုလားပဲစိုက်တောင်သူ (၅၀)ဦးခန့်ရှိပြီး စိုက်ဧကမှာ(၃၀၀)ဧကဝန်းကျင်စိုက်ပျိုးထားကြောင်း၊ စိုက်ပျိုးရာတွင်ထွန်ကြောင်းဆွဲပြီး မျိုးစေ့ချစနစ်ဖြင့် စိုက်ပျိုးကြောင်း၊ မျိုးကို ယခင်နှစ်က ကုလားပဲစိုက်ခင်းမှထွက်ရှိသည့် ကုလားပဲစေ့များကို မျိုးအဖြစ်သီးသန့်ဖယ်ချန်၍ စိုက်ပျိုးခြင်းဖြစ်ကြောင်း၊ မျိုးတွင် ရေဆင်း-၆၊ ရေဆင်း-၁၂၊ ဟောလန် မျိုးဟူ၍ရှိသည့်အနက် ရေဆင်း-၆ မျိုးကို မိမိအနေဖြင့် ဧက(၉)ဧကခန့် စိုက်ပျိုးထားကြောင်း၊ (၁)ဧကလျှင် မျိုး(၂၈)ပြည်ခန့်ကုန်ကျကြောင်း၊ တန်ဆောင်းမုန်းလပြည့်ကျော်တွင် စတင်စိုက်ပျိုးပြီး တပေါင်လတွင်ရိတ်သိမ်းရကြောင်း၊ ကုန်ကျစရိတ်အနေဖြင့် ယခင်နှစ်က ကျပ် (၁၃၀၀၀၀)သာကုန်ကျခဲ့ပြီး ယခုနှစ်တွင်မူ မြေပြုပြင်ရန်ထွန်စက်မောင်းခမှာ ဈေးမြင့်လာသည့်အတွက် လုပ်အားခအပါအဝင် စုစုပေါင်းကုန်ကျစရိတ်မှာ ကျပ်(၁၅၀၀၀၀)ခန့်ကုန်ကျပါကြောင်း၊ အထွက်နှုန်းအနေဖြင့် ယခင်နှစ်က(၁)ဧကလျှင် (၃၆)တင်းထွက်ရှိပြီး (၁)တင်းလျှင် ကျပ်(၅၀၀၀၀ မှ ၆၀၀၀၀)ထိ ဈေးရရှိခဲ့ပါကြောင်း၊ ထွက်ရှိသောကုလားပဲများကို အထက်မင်းလှမြို့ပွဲရုံများတွင် ရောင်းချကြောင်း၊ ယခုနှစ်တွင် အထွက်နှုန်းအနေဖြင့် ယခင်နှစ်ကထက်ပိုထွက်ရှိနိုင်မည်ဟု မျှော်မှန်းထားပါကြောင်း ဥယျာဉ်ကျေးရွာနေ ကုလားပဲစိုက်တောင်သူ ဦးဇော်အောင်ထံမှ သိရှိရပါသည်။
Source: https://www.doca.gov.mm
